Vai al brano corrispondente in Italiano

Si lex erravit, puto, ab homine concepta est: neque enim de caelo ruit. Miramini hominem aut errare potuisse in lege condenda aut resipuisse in reprobanda? Non enim et ipsius Lycurgi leges, a Lacedaemoniis emendatae, tantum auctori suo doloris incusserunt, ut in secessu inedia de semet ipso iudicarit? Nonne et vos cotidie, experimentis illuminantibus tenebras antiquitatis, totam illam veterem et squalentem silvam legum novis principum rescriptorum et edictorum securibus caeditis? Iudicatos retro in partes secari a creditoribus leges erant: consensu tamen publico crudelitas postea erasa est. In pudoris notam capitis poena conversa est: bonorum adhibita proscriptio suffundere maluit sanguinem hominis quam effundere. Quot adhuc vobis repurgandae latent leges, quas neque annorum numerus neque conditorum dignitas commendat? Et ideo, cum iniquae recognoscuntur, merito damnatur.