A Luigi Volpi

De det del «Gambiras» (a m' par l'otrer)

Vajana, 'l Cinto, 'l Volpi e amò du o tri,

i discütia de Storia, ognü per dì

sö certi personagi, ol so parer:

ghe sere a mé (per bïen ü bicer)

prope quando i sircaa de stabilì

perchè Pio Nono l'à ölit finì

in Vaticano come ü presuner.

«Ve l' dighe mé: - gh'ó décc - ol Papa urmai

'n del Vaticano a sent e nocc e dé

ol popol a vüsà: "Ma-stai! Ma-stai!"

a l'à pensat: "I völ che staghe ché?

Vox populi vox Dei, la sbaglia mai!

E la decis, infati, de sta lé».

«Piero - l' me dis ol Gigio che l'ghe sa

töta la storia del Risorgiment

e chel ch'è söcedit nel Quatersent

al poer Coleù là sö in Sità -

adess che te me décc la erità

söl gran Mastai, gh'avress piasser de sent

perchè Pio Vöndes, papa issé sapient,

a l'è restat a lü serat in cà,

acassibé che la "Conciliassiù"

la ghe metia, per mess de chel contrat,

töt quant ol mond a so disposissiù».

E mé: «Probabilment ol Papa Rat

l'è mai vegnìt de fò del so portù,

perchè l' sentia lé in gir... odur de gat».

Versetti dialettali di Piero Terzi (Bergamo)

homepage