Haec sunt manifesta per conversos de secta Waldesium 

Notandum quod rectores sectae Waldesium talem habent modum et conversationem. Primo quia diebus quatuor ieiunant in ebdomada, scilicet feria secunda, quarta, sexta et sabbato; unum illorum in pane et aqua, scilicet feria sexta nisi sint in itinere vel aliquo gravi labore impediti. Septies orant in die, non aliud nisi «Pater noster ». Senior inter eos incipit orationem et facit eam prolicam vel brevem secundum quod sibi videtur. Pro maiori autem parte superiores eorum sunt  illitterati et Scripturam Sacram un corde retinentes. si verbis sunt cauti, mendacia voluntaria et verba turpia solent evitare. Vestimentis vilibus utuntur. Diligenter subditos suos informant ad virtutes exercendas et vitia cavenda. Et quia conversatio eorum apparet commendalis ideo subditi eorum fidem eis adhibent in omnibus ex hoc et nimium confortantur. Primo purgatorium negant, et per consequens suffragia defunctorum; venerationes sanctorum omnium etiam Virginis gloriose idolatriam asserunt, nec concedunt quod concedunt quod aliquid valeant pro nobis sancte eorum intercessiones. Omne iuramentum indifferenter dicunt esse peccatum; et nullum etiam maleficum qualemcumque morte esse puniendum. Et quod apostolici episcopi, religiosi et omnes clerici non debeant habere possessiones. Indulgentias ecclesiae nichil advertunt; peregrinationes non curant nec faciunt; horas canonicas et alia divina officia dicunt esse quasdam deceptiones. Caetera omnia remedia ecclesiae praeter sacramenta, sicut aquam benedictam, structuras ecclesiarum et similia dicunt esse superflua. Confitentur puris laici non ordinatis, etiam illitteratis. Item quando volunt aliquem assumere ad eorum habitum, prius per aliquod tempus probant eum et tempore ordinationis faciunt eum confiteri a iuventute omnia peccata sua, quia nullus suscipitur ab eis nisi sit castus et ab omni consortio mulierum immunis quod opera carnalia. Et cum aliquis ex ipsis ad confessiones audiendas debet ordinari et a superioribus assumi, interrogatur primo de septem articulis fidei, scilicet utrum credat unum Deum in trinitate personarum et unitate essentie; secundo quod idem Deus sit creator omnium visibilium et invisibilium; tertio quod tradidit legem Moisi in monte Sinai; quarto quod misit Filium ad incarnandum de virgine Maria; quinto quod elegit sibi ecclesiam immaculatam; sexto carnis resurrectionem; septimo quod venturus est iudicare vivos et mortuos. Item idem interrogatur de septem sacramentis scilicet de baptismo et deteris. Vota vero quae requiruntur ab eo sunt haec: primo ut promittat obedientiam Deo et ordini suo; secundum castitatem: tertio quod non redimat vitam suam  in civitate constitutus sive quocumque periculo mortis preventus et hoc falso iuramento vel peccato mortali: quarto quod nulla habeat spem de operibus manuum sed quod paupertatem  voluntariam innitetur; quinto quod non habeat maiorem confidentiam de consanguineis suis quam de alii eiusdem sectae. Et sic per impositionem manuum semel et non plus per suos superiores ordinatur.

Haec sunt conscripta et manifesta per conversos de illa secta.