I omin, ...e là lör. Vi sul ponte, su p na ciadura, sentad du sora algo ch'pasa fora o cuzed du gno ch'bicia, csi, n tin a la vecia a... "contasla". Duc conta la soa: un ciaröia e chi etre scota e...
- As reson tu, diau, parii bögn!
- Se save bel ch'la dee a fnì csì.
- Ades cont la mia.
E csì pasa li ore, pasa i dis, ma al "Trenta" n pasa pì.
E da savöi che sti omin ne ne chi söia iló a bimblonà, ma inè snoma parchè ch'ne ne d'laoro, ne ne d'laoro aniò, e alora: "Che s'ha da föi mo!?" E ti vöde, o tlo vöde, co na cadnela impigneda zla zantura (proprio cöla tireda) ch'va a fnì z fonda (vöita) a tgnì na britla, ogni un una e mai una compagna de cl'autra, ogni un una e...
- Spia ca che una ch'inöi va! Taia com un fer da barba!
E un autro:
- Spia un tin la mia va, inà al mango d latesin, roba dla Slovenia, me risulta... apò n dig pi!
Intanto un se cuza du, un va colà dl là, un autro un tin pì in lè e torna ilò, ilò ingrumede com inante, ma con naschè z mön, un pi longo, un un fià pi curto, ma sempro un "bacöto!" Fora le britle, sot al bacöto e via a turututè duce al sò. E che "fantasia": un voraa föi un spizoot, ma picè! na ponta sola! un voraa föi un sbat vöve...picè! masa sotì! Cl autro voraa e voraa föi algo d polito, algo d möio, ma n la fà, e risultò snoma un bacöto spizo.
E gnù mad-dì:
- Don nöi, don a ceda che ora da...
Ne ne un ch öbia dito "Don a mangè, don a marenda".
"Bon apetito" é masa fin p la fame e alora basta dì dòn a ceda, apò alg sozdarà.
E la lör. Domanda a so mare:
- Alora, söi cà iö! Ast alg là incöi pò!?
- Spia ilò zal ciodruzo ch'dev ese ncamò I croste dl autar dì. E bögn burded le si, ma cà n se pö es delicat no tua. Apò, scota se t vös savöi la pi bela: Mariuta cialò d cà m'ha dito ch'la so vacia é la par föi é pöna ch'la fato ch'la me dà la prima dusa. Proprio la prima! Cöla é una va! Te vdaras che n tin de pöta ch sauta fora va! Na borba de pöta chen tavaras mai apò mai mangiò zla to vita, dop mo tua, rangte e ne sta impresionate s le n tin bdanta, t sas bögn, noi son abituede e mangè mös z I aga. Bona fömna Mariuta! Inè pensada d nöi sasto! parion ch'la so vacia faza polit mo!
- S'è par cösto, dipend dut da öla mo va!
- Da chi mo?
- Da ch'la vacia po! da Mariuta no va! Ma scota mo tua. E n pezo c pöinso: tu es ca zenza laoro, zenza föi un sciopo, snoma via sul ponte aped chi quatro a spizè bacöte e alora, n pöins nent mo tu da dì inalgò a vöd algo!? Cialò a mna al parcaz no va!
- Öi bögn anch pensò iö si, ma gno-mo? chi me tol su mo? Provaröi mo, ciaparöi la Pusteria a vöd mo, provaröi ilò mo.
Saraa ora che t dezida d'algo.
Saluda la mare e parte. Ciapa la Pustaria co la so bicicleta contra pedal e sù, fìn in Montecrôs a pè con cal articul parentse du e ogni tanto cal pedal, che n ferma mai, riva inze ple ciovi. "Ah, söi ca in zima!" Ades e da ciapà da d'sora in du e alora...na sputeda sul mögn par via dal manubrio e, par iutè i frene, ha pensò da impignè na bariuta zal pedal a föi da rasadòi e du, no dut fumo, ma duto troz, a fracà ch'la bröia. "vela vela, rasa! ve na ota! rasa! ve Sesto. Söi rivò in Pustaria". Da la fadia a tgnise a gni du doi Montecrôs, i sauta fora un flaat. "inè tudös po, pasarà bögn, intanto inveze da sta cialò a scotà, fazo un giro a vöde s cet algo da boclà e (dato c vögn nöte) algo da dormì, e gno po, n savaraa". E rivò un bacan, e farmò dant na corte de grasa. Riva fora la "pàura", un bocon defömna infàldada, lo spia, lo squadra e:
- Grüßgot.
- Si mo si, saràbögn!
Co la mön a sventla fa capì ch'la fame e pal resto avarà vist'da la zera I sporde na pöta del soi, dura com un salìn e... "la mangiaröi pompianin vi pla nöte. Un tin aloota la faröi bögn!" Sta fömna l'ha vist com a dì insemenù co la bicicleta ilò par traverso e... "che dirala ades po. " Com "schlaten" lo möna inze z la so ceda (la bicicleta d fora), inze e du, du p na sala a torvela e inze, inze z na stala, la stala dal ciavàl.
Com ciaudo ne n'era mal no, ma se stadee ströinte, tanto ch' I à scognù poies du da pè de sto bestiòn. Cösto i à bögn fat capì ch nal morde, ma li avee pi paura dle sbdazade proprio ilò doi al cu. Ha pasò la nöte parent du sto ciaval a pariè dalduto, ch'vögna dì corögn. In cöla ha tacò a rudiè la pöta. Al ciavàl e voltò a sintì sto rudiamöinto, ma lì istöso ne na zedù, l'a fata fora duta e intant e gnù dì. Leva su, se sgorla du, dis un bel gramarzöi a la parona e via co la bicicleta contra pedal a cetà laoro. Gira d ca, gira dla, dut un "guten morgen" e, nanche fnù da domandà s l'à d laoro, "ràus!!" ch'me par c voia di "camina, tàia, fila e ne sta pì a lasàt föi vöde!"
E csì, co la so bicicleta, sempro col so rasadòi sot al pè... "Comelgo, a ceda da mi mare".
- Tua! est danov ca mo! ne n as cetò nent-mo tu, ma proprio proprio nente!?
- Po, avaraa anch cetò zun bacan par doi dì a spande grasa, ma iö, dop che fàzo? Apò, nöi son taliane e à fat capì che n son viste tant lontera.
Pasa doi tröi dì e pöinsa, pöinsa ncamò e... ciapa la Ciargna, sempro co la so bicicleta: Pis, Sapada, du, la Cleva e finalmöinte, la Ciargna. Ncamò na pedalada (zenza bröia) e riva a Valpiceet. Un bel pöiduto, pice cle 'piceet. Bate el porte a domandà si avös d laoro ma... "nuia, nuia, filait filait" (c vö sempro di fila, camina inant c autro söia). Intanto so mare speta algo e se spaventa cal torne a ceda zenza d laoro. Nanche fnù da pensà, ch'al se presenta su la porta e...Mare, nent da föise, co ne nè, ne nè! Sta Ciargna! A sintì la dente sumie ch'era l'America, inveze... pedo d nöi! ma n toc ped mo va!
Ciapa al Cadore e... compagn! Nsa proprio pi gno dì. Alora... ceda e basta! "Iö mare m indögno a föi dalduto, ne sta avöi paura da morì da fame, ch'da fame ne mài morte nsugn, apò iö co vói proprio...!"
Un bel dì, anze, na meda nöte, cösto leva su, ciapa un fral e via, va sote Pra Monzin a rane (par n morì da fame). Ha bögn ciapò nasquante, ma masa pöce par dói parsone! Ne ne al so mistiör e alora a scognù impiantà la. Leva bonora, ciapa su na gabiuta con un ozluto (un riciamo) e parte, s invia verso un boscuto, gno ch'inè anche bruse e se poia du, sconde sta cabia, e. .. tend al visçio. Al riciamo sconto pigolee, cöi d fora dolaa ze cla visçeda, ma..."Nanch un! Mare, öi provò dute! ades n savaraa pi che föi!"
Che ne ne, riva la fömna dla prima dusa col condal. So Mare dis.
- Öh! söda Dio est ca mo! Avau dit iö ch'la providenza e granda e alora... pöta n ne mancia, patate inon par dut l'ön, un tin de scöta ciaparon e che volon n camò? Pariòn la salute zenza paura da morì da fame! Visto! la providenza!
E paso l'ön, al trenta, e zenza tirè su al "trentun", inon vivù, e ca son ca.