Una dle sodisfaziogn pi grande, da cuön ch'on tacó a scrive e ciantà par dialeto, iné stada cöla d avöi visto e sintù un cambiamöinto zla dente verso la so parlata.
Se prinante tance s vargognee da parlà fora via, o gnee tloste in giro zun etre pöide dal Comelgo por zörte carateristiche dal dialeto d Costauta, dopo ch'on portó depiön dal Cadore e da tante bande dla provinzia e dal Veneto i nos spetacui, el nostre storie, el canzogn, al teatro, iné pöce pi che considra al dialeto ladin snoma na lönga da diora o da parlase sme in famöia o zal pöis.
Ne n on mai avù la partesa da föi concorenza al taliön e nanche n son sarade col ció da n capì che la lönga de duto al mondo sarà l inglese. Ma avöi podù sintì la lönga parlada par dapì d mile ane zle nostre valade e coiosto i so colores pi ciaude, n à convinto ch'son l ultma generazion ch'pö pasà al cöre dla parlata al generaziogn ch'gnarà dopo d nöi. E alora iné dover föi duto cöl che s pö par mantgnì vivo e adatà al dì d incöi al ladin dal Comelgo.
Aped i maestres dle scole d Costauta ncamò zi ane Setanta dal secul d ignöre s era fate diverse iniziative por föi conose el parole e i mode da dì ai canai. In pi ocasiogn löre inà btu inze l insegnamöinto dal ladin ze scola.
Al progeto de sto ön de scola, pi largo e longo, va zla direzion pensada da etre bande, gno ch'el lönghe pi pizle prova a resiste a cölie grande. L idea saraa cöla da böte dinze come programa fiso, compagn de chelietre materie, anche al ladin. Sta roba iné posibla, parcheche na lege dlo Stato taliön inà riconosù, intramedo chelietre, anche la lönga ladina.
Stota al laoro fato dal maestre, da cal on ch'inà insignó a disigné e la stampa de sto libro, iné stó pagó picsöia dal Grupo musical d Costauta, ch'ciapa nasché sode da la lege regional ple minoranze. Pi ane ch'gnarà saraa bel che sto laoro dösa inante come programa dla scola e gnösa sostgnù coi finanziamöinte dla lege 482 dal 1999, che prevöde proprio ch'se insögne zle scole elementor e media la lönga dla minoranza dal posto.
Al fato che zun pöis pizal e fora via söia restada ncomò averta la scola, fata su zi prime ane dal secul pasó; che ze sta scola i canai dal pöis posa parlà auto al so dialeto, o magare imparalo s i parla taliön a ceda; che al pi bel laoro ch'é stó fato zun ön söia un libruto, gno ch'é stade scrite storie imparade da la tradizion di veces, somöia un pizol miracul.
E alora chi che cröde podaraa anche pensà che zi prosme ane al pöis continue a vive coi so canai, co la so scola e col dialeto ladin insignó e imparó. Un zavario ch'faron dalduto par ch'al reste zle nostre mögn e n al se desfante compagn d cöi dal sono dla nöte.

Lucio Eicher Clere
presidente dal Grupo musical d Costauta