18-12-2005

"Maghe, strie... e etre ciantade"

Vögn do fora in sti dis al novo laoro dal Grupo musical d Costauta, un libruto e un Cd intitolede "Maghe, strie... e etre ciantade".
A rende particolar sta nova publicazion (iné la registrazion numar 11 ch al Grupo inà fato da cuön ch l è nasù zal 1983), iné i protagoniste dle canzogn scrite e registrede sul disco, i canai dle scole d Auronzo, Costauta, Pardnei, Sa Stefi. I pizi ciantarins inà do os a canzogn scrite e musichede aposta par i canai dle scole, dinze dal progeto pl insegnamöinto dal lönga ladina arente a cöla taliana e cöla inglese. Al laoro fato dai maestres e profesores inà cetó bona sponda zal Grupo musical d Costauta, picsöia zal so autor dle musiche, Daniele De Bettin. Zun sti ane al brau conpositor inà tiró fora dal so scrin d melodii un bon numar d canzogn fate aposta par i pi pizi e al resultato s à podù sintì e vöde zi spetacui d fin d ön zle scole gno ch li inà colaboró, ma restarà fisede su carta e disco con sta publicazion "Maghe, strie e etre ciantade".
Al libruto inà su la copertina un disögno fato da na reda dle elementar d Costauta e ciapa al titul da la prima canzon, ch iné stada fata aped i canai de cuinta elementar d Oronz zl ön de scola 2003-04. Storie e legende dla tradizion dle valade ladine, canzogn d Nadà, ma anche momöinte d legria e insegnamöinte dla vita. 14 canzogn, tröi ciantade dai canai d Oronz, siö da cöi d Costauta, dói da cöi dle elementar d Pardnöi, tröi dai canai dle medie d Sa Stefin.
Al Grupo musical d Costauta, zal ringrazié duce i insegnantes ch inà loró par portà inante sta iniziativa, à ricordó, clase par clase, duce i canai ch inà inprestó la so os a föi gni legro e original al CD.
Va dito che ste dói publicaziogn riva a la fin d un ön doloros par al pöis d Costauta, ch inà visto la tastardadura d un sindaco a volöi par forza sarà le scole proprio cuön ch el conpii zento ane. De fronte a sto ato parverso la roba ch à fato stà pi mal iné la colaborazion dada al sindaco dai tröi consiliöre d Costauta, Manuel Consiör, ch à votó in Giunta a favor dla insardureda, e Debora Carpuza e Gige Plon ch à tgnu bazin in consilio.Al valor dla scola d Costauta s lo vöde e s lo sente zun sto libruto e CD.
La presentazion iné stada fiseda par döiba 22 dizenbre, a li 11 bonora al cinema Piave d Sa Stefin.
Lucio Eicher Clere

Maghe, strie... e etre ciantade (i testi delle canzoni in ladino e in italiano e la canzone "Costauta" in formato .mp3)