![Costalta... su "Il Gazzettino di Belluno"](images/gazzlogo.jpg)
30-10-2005
Stota e nautrota iné
al ciodön di cuaranta ane
dle grön montane ch inà batù i pöide
d San Piöro
I ricorde dl aluvion dal
1966
Al maltenpo ch
inà batù la val dal Comelgo par diös dis zal
möis d otobre, inà fat gni zal ció a tance
el montane dle dói anade pi brute dal secul pasó:
cölie dal '65 e dal '66. Par fortuna stòta la piova
inà fato snoma calche pizal dön, ma la paura d inclota
fa pensà senpro al pedo. I pöide pi batude dla val
era stade cöi d Pardnöi e Mare ai prime d setenbre
dal 1965, par tornà danovo, zi prime cuatro dis d novenbre
dal 1966, a ese ciapade dinze zla furia dla Piai.
Par ricordà cla desgrazia, gno ch iné morte parsone,
iné stade portade via cede, tabies, strade, pontes, ativites
dla dente, el sorascole d San Piöro inà btu in pes
un progeto da presentà in Region dal Veneto par föi
capì ai canai e ricordà ai grögn sto momöinto
ntoco bruto dla storia di pöide. L idea iné cöla
da còi su el fotografii e i ricorde dle parsone ch inà
vivù su la so pel la desgrazia, per inbastì na
storia pi fidela posibil a cöl ch è sozeso in chi
dis. Par slargé la colaborazion, la sorascola d San Piöro
inà domandó al Regole, al Parochie, a li asociaziogn
da portà al so contributo par sta iniziativa. Duce inà
respondù lontera e inà inpromtù da dà
algo, fora ch la Regola d San Piöro e al Comun, che zun
cösta, come zun etre iniziative, continua a responde "Ne
n é sode!".S la region dal Veneto tlarà in
considrazion al progeto, entro la prosma insuda dovaraa ese fata
na mostra d fotografii dl aluvion dal 1966, na publicazion di
ricorde dle parsone, un convegno su la protezion dl anbiente
e anche un teatro di canai su na storia vivuda inclota. Al testo
dal teatro iné stó scrito dal Grupo musical d Costauta
e gnarà insignó ai canai dle medie, par ch i lo
faza zun spetacul a la fin dl ön. La storia inà come
protagonista na famöia da Costauta, ch se vöde portà
via la ceda da na boa in chi dis dl aluvion d novenbre. L idea
da böt inze zal ricordo di cuaranta ane da l aluvion anche
un teatro par ladin iné stada dla profesora Yvonne Toscani,
ch iné responsabil dal ladin par le scole d Pardnöi.
Al Grupo d Costauta inà bel dó la so disponibilité
a portà inante sta iniziativa.
Lucio Eicher Clere |