23-10-2005

Comelgo

Le scole dal dovèr dal Comelgo inà verto el porte a la lönga ladina, con convinzion e col tornà sora ogni ön a l argomöinto e csi i canai capis che la cultura dla so val iné tgnuda in bon respeto dal Stato taliön.
Zle tröi sorascole de San Piöro, Sa Stefin e Comelgo d Sora iné tacade zun ste stmane i programes fate dai maestres e profesores che stà dòi al ladin e un bon numar d canai pö avöi informaziogn e föi ativites liede ai argomöinte btude in cantiör.A San Piöro la scola voraa ricordà i cuaranta ane da inclota dal 1966, cuön ch é gnuda l aluvion. Dopo avöi sintù la storia, carù fora fotografii, rizercó i canbiamöinte e el fride ncamò averte, i canai provarà a inbastì un teatro, per contà par ladin come ch na famöia d inclota inà vivù su la so pel la desgrazia da restà zenza ceda. S la gnarà fata, sta storia sarà btuda sul palco con atores e nascuante canzogn dal Grupo musical d Costauta. A Sa Stefin, dopo el bele esperienze di ane pasade, picsöia zle medie, st ota i profesores inà pensó da dorà l'argomöinto dal vistì par verde na fonestra su la storia di pöide dal Comelgo zi secui pasade. Al lin, la lana, la madalana, al laoro di omin e dle fömne, el maniöre da vistise, le storie contade dai veces e pensade dai canai par sintilie ncamò soi. Sarà ncamò n ota un laoro intrà nascuance profesores, che btarà arente el materie ch pö avöi a che föi aped l argomöinto dal ladin, par avöi in ció dl ön na informazion pi largia posibil. La fantasia di canai d terza media farà pensà e scrive un teatro su sto argomöinto e portalo sul palco dal cinema Piave inante che fnisa la scola de dugn.
A Comelgo d Sora, dopo dle mostre e dle esperienze fate col profesor Danilo Sarinuto, dirà inante anche sote dal preside Giandomenico Zanderigo di Rodi l antares par la lönga ladina dinze dle scole elementar e medie.
Aped el scole dal Comelgo colaboröia li Uniogn ladine dla valada, zla convinzion che insigné ai canai al valor dla so lönga iné l unico mödo par tgnila zla considrazion ch la merita. E propio par mostrà al valor de sta colaborazion, al grupo d Costauta iné là ch al inbastis na publicazion, fata da un libruto col parole dle canzogn e un Cd gno ch iné registrede 14 canzogn di canai dle scole d Auronzo, d Sa Stefin, d Pardnöi e d Costauta. Sto laoro gnarà fora inante d Nadà.

Lucio Eicher Clere