4-10-2002
PLATA DI LADINS

Spetacul cultural

Imbastù dal grup musical d Costauta

BLUN. Taca sta stmana al primo d nascuance spetacui dal Grupo musical d Costauta intitoló "Pinochio ladin". Zal so pizal anche al Comelgo pö ese btu inze zle tante traduziogn dal libro de Carlo Collodi in grazia dla scritura fata sta insuda pasada da Giovanni De Bettin Linc' da Costauta. Se ste prosme stmane se sentirà parlà ntoco d Pinochio, parcheche gnarà mandó fora zun dute el sale da cinema l ultmo film de Roberto Benigni, anche un libruto e n spetacul sul pupo d lögn pi consù zal mondo, nasude zna valada ladina dle Dolomiti, podarà föi cröse ntin la curiosité dla dente e portala a lede no snoma al libro par taliön ma anche cöl par ladin. Pinochio ladin iné na traduzion fidela dal libro de Collodi, ma propio pla vivöza dla parlata comeliana dorada da Nane d Linc', la storia e i personages s fa lede con gusto.

Al spetacul su Pinochio ladin iné sto imbastù sta istede dal grupo musical d Costauta e inà tlosto fora nascuance cuadre dal libro par föi recité sul palco i diverse personages, da Pinochio, a Beputo a Mangiafögo, al Get... e ciantà nascuante canzogn fate aposta par sto spetacul.

Vendre söra, al dì 4 d otobre, al Pinochio ladin gnarà presentó a Sa Stefin, zal cinema Piave, pla organisazion dla biblioteca comunal. Ilò sarà anche na ocasion par föi vöde e sintì ai maestres e ai canai dle scole la recitazion par ladin e l canzogn, ch'podaraa ese btude dinze ze li ore dl insegnamöinto dal ladin zla sorascola d Sa Stefin, come che prevöde un di progetes mandade a Roma dal Distretto de Piöve.

Dopo d Sa Stefin, al spetacul gnarà fato a San Vido, pla organisazion dl Union di Ladins D Oltreciusa, al dì 19 d otobre.

Al dì 26 d otobre sarà fato a Ciamplongo e al 2 d novembre a Dudlè d Comelgo d Sora.

Lucio Eicher Clere