10-4-2003

PLATA DI LADINS

LA SCOLA LADINA DAL COMELGO

Se misia aped cöglie de dute el minoranze

COMELGO. La scola ladina dal Comelgo se misia aped cölie de dute el minoranze dal Friul, la furlana, la todösa e la slava zun progeto d valorisazion dla so parlata. Sarà la scola elementar d Costauta, in comun d San Piöro, par al ladin e cöla d Sapada pal todösco a portà i frute di so laore fate via pl ön de scola a na manifestazion ch'se farà a Tolmedo a la fin d mai. Aped la sorascola d San Piöro se cetarà aùna cölie d Ampezo in Ciargna, Paluzza con Timau e Cleulis, Tarcent, San Piöro dal Natison, Cividal, Moggio e Resia, Tarvisio. Sto raduno sarvirà par böte a confronto esperienze d insegnamöinto dla lönga pizla dle diverse sone, par cetà insieme cualie ch'posa ese i metode pi valide par föi imparà ai canai pi polito la so lönga e cultura.
I maestres d Costauta inà parció aped i canai un cd rom su pal pöis, con riferimöinte a dute el materie, da la storia a la giografia, a la lönga scrita e parlada. Iné stada btuda inze anche la musica zun sto programa e iné stade fate aposta dói canzogn, ch'é stade insignede ai canai dal musicista Daniele De Bettin, ch'inà rinovó la musica ladina zi ultme vinte ane. Propio a De Bettin, zal raduno d Tolmedo, gnarà dó l compito da parlà su pla musica nova dal Comelgo ladin. Bel da nasché ane, in grazia dla produzion fata dal Grupo d Costauta, diverse canai iné carsude con ste musiche nove e inà podù imparalie e ciantalie, söia a spié i spetacui dal grupo, söia a scotà i disches registrede zun sti ane.
La manifestazion d Tolmedo iné na bela ocasion par föi conose al ladin dal Comelgo zna tera, come la Ciargna, ch'iné sö zla cultura e la lönga ladina. Zun sto raduno i canai dla scola d Costauta mostrarà al so laoro dal cd rom.

Lucio Eicher Clere