"La mucca pazza in India, xe na bestemmia? Un sik col motorin, se mete prima el casco o prima el turbante? Quando to mojere se dà el spray, quala xe la catastrofe pezo, el buso nel'ozono o to mojere spetenà? Perché se la Monsanto fa na piantagion de nuova soja i ghe dà el brevetto, e se ti te te fe na piantina de vecia canapa i te dà tre giorni de galera? Perché na Coca Cola attraversa l'Atlantico in sie ore e un albanese attraversa l'Adriatico in do giorni e po el se nega? Perchése un stracomunitario nol ga passaporto lo rispedimo a casa, ma se sa zugare a calcio ghe demo anca schei? Se pole fare una vendita de beneficenza per aiutare i putei del Bangladesh che cusise i baloni, vendendo baloni cusii dai putei del Bangladesh? Pole ciamarse veneta la Benetton, che compera la lana in Australia, la fa lavorare in Turchia e i schei li spende nel gran premio del Brasile? 0 - 12 xe la marca dei maioni o l'età de assunsion dei operai? Guidoni, el primo astronauta italiano, xe el nostro primo esploratore o l'ultimo emigrante? Quando ariverà sula luna, i ghe domanderà el permesso de soggiorno? Xe vero che Radio Vaticana te fa andare in paradiso?".