AMANTEANI NEL MONDO

RIZZETTI ’I PASCA

Attienti:

’Si pitti su ppe mammi ricchi ’i sangu e ppe granni cumpagnìji.

Ppe famiglielli arrisinàti, ognedùnu s’a regulàsse a modu sua.

Pitti ccu ll’ova

Chillu ca cci vò:

• sia chili ’i farina,
• vinticinqua ova,
• ’nu chilu e mmienzu ’i zùccuru,
• menzu chilu ’i grassu ’i puorcu,
• duacientucinquanta grammi ’i lievitu ’i birra,
• ’nu litru e nnu quartu ’i lattu,
• ova vullùti, chilli ca cci vuonu.

Cumu si pripare:

1. sbattìti l’ova mmisc‑cànnucci ’u zùccuru;

2. scioglìti ’u grassu a vagnumaria e, ’ntramènti ca si scioglie, mmisc‑càtulu ccu l’ova ch’avìti sbattutu ccu llu zùccuru;

3. paru a paru, quadiàti pocu, pocu, ’u lattu, tantu ppe cci scioglìri ’u lievitu ’i birra;

4. mmisc‑càti ’nziemi ’u lattu ccu l’ova sbattuti e jungìtici chjanu, chjanu, ’a farina;

5. ammassàti tutta ’sa grazia ’i Ddiu e benadicìtila;

6. ’na vota cu ’mpastu è prontu, va misu dintra ’na cista e cuverùtu ccu garbu, usànnu ’nu pannu e ’na cuvèrta ’i lana ppe llu fari dujjhàri;

7. quannu ’a pasta s’è dujjhàta si fanu i tortanielli o ’u nùmuru uottu e, allu mmienzu, duvu è rimàsu vacàntu, si mìntunu l’ova vullùti;

8. vuliènnu, si ponu fari dujjhàri ancora e doppu si mìntunu ’ntr’u furnu a 140°, ccu lla bona saluta!

Pitti ccu niebbiti

Chillu ca cci vò ppe fari ’a pasta ducia:

• dudici ova ppe sbattìri (uottu sani e d’i quattru sulu ’u russu),
• ’nu chilu e duacientu grammi ’i zùccuru,
• ’nu litru d’uogliu d’alìvi,
• ’nu mienzu litru d’acqua,
• quattru ’mbustìni ’i lievitu,
• quattru chili ’i farina.

Chillu ca cci vò ppe lla ’mmuttitùra:

• ’nu chilu e mmienzu ’i miènnuli arrussicàti e macinati fini, fini,
• dua chili ’i mustarda,
• tricientu grammi ’i pàssuli,
• ’nu chilu ’i ciucculata,
• cannella e garofalu cumu cchjù vi piace.

Cumu si pripare:

’A sira prima priparàti ’u ’mpastu dintra ’na gàvita cumu Ddiu cummànne, ccu tuttu chillu ca cce vulùtu ppe lla ’mmuttitùra e lla matìna apprièssu avìti ’i fari accussì:

1. sbattìti l’ova ccu llu zùccuru, jungìtici l’uogliu e l’acqua senza lassàri ’i sbattìri, ppe lli fari ligàri allu miegliu;

2. ’mpastàti tuttu ccu lla farina e ccu llu lievitu e doppu stennìti ’na spoglia vascia, vascia;

3. ppe ritagliàri ’a spoglia pigliàti ’na brodèra rutùnna;

4. dinchjìti ’i spogli rutùnni ch’avìti ritagliatu, ccu llu ’mpastu d’a ’mmuttitùra, chjiudìtili e ’mpurnàtili… Dicìmu a 140°.