Bollezzumme! Attualitæ
Bollezzumme!
Attualitæ
| Sti pöchi meixi che gh'é
"Bollezzumme!" gh'ò avùo a preuva che da
gente chi s'inteessa da lengua zeneise e de l'ötonomìa
da Liguia ghe n'é pe coscì; quello ch'ammanca a l'é
unna conoscensa exatta da scituaçion: ò sentïo à fâ
di paragoin co-a Catalògna - ò, pe stâ ciù da-a vexin
à niätri, co-o Véneto e a Lombardìa - che fan
appensâ, ma che no sò scin à che ponto arrëzan. Mi
son lontan ben da l'ëse un soçiòlogo, ma me pâ ciæo
che, inte l'avvoxòu Nordeste, o sponcion verso
l'ötonomìa e verso a proteçion di parlæ do pòsto o
parte da'n tesciùo soçiale ben ben despægio da-o
nòstro. Da quelle bande gh'è unna borghexìa allouïa e
precaccinn-a, tanto che a vitta da comunitæ a l'è basâ
in sciâ valorizzaçion de capaçitæ personale; in sciô
cian econòmico, sto fæto o veu dî che dan unna gran
importansa à l'iniçiativa privâ e a-e impreise
piccinn-e; chì coscì, in cangio, femmo un pittin comme
i meridionali e, à son de contâ in sce l'intervento do
Stato, in sciô travaggio che ne dà e grænde fàbbriche
irizzæ e e mortinaçionale, çe semmo missi arrëo inte
moæn di foresti e, à vegnîne feua, a saià de grammo
fâ. O no l'é miga un caxo che, chì coscì, i partïi ciù fòrti en quelli da Senestra, co-a seu conçeçion do Stato ch'o pensa à tutto lê; ma se no perdemmo o viçio di susciddi, de arreccomandaçioin, e de collâ tutto, ruzzo e bozzo, basta aveighe o "pòsto fisso", no saiëmo mai boin da levâçe d'inti pê. E da maniman che scenta l'orgheuggio e a conoscensa de quello che semmo e che semmo stæti, meno se peu fâ quarcösa de serio pe avvardâ a lengua zeneise. D'ätra parte, a borghexìa, che de'n movemento ötonomìstico a dovieiva ëse a chinòlla, comme into resto do mondo, chì da niätri a l'à misso da banda ògni idea de ötonomìa da Naçion Zeneise, tutto zù da l'Euttoçento, quand'a l'à attrovòu ciù còmodo de pe coscì stâ co-i Savòia, e òua i seu inteesci en i mæximi che quelli do Stato çentralizzòu. Ma ghe â veddei, viätri, "a gente chi conta", i grændi industriali, i grændi buttegæ che se pìggian a-o cheu i inteesci e a libertæ da Liguia? E che, pe fâ e raxoin da Liguia, se vìran contra Scìndichi e Prefetti, che magara ghe son stæti à scheua insemme, a-o Döia, e a-a doménega ghe zeugan à tënis? A-a giornâ d'ancheu, se peu dî che no gh'emmo manco ciù unna vëa classe dirizzente, ma manco quande ghe l'æivimo, manco a-i tempi "mìtichi" do Taviani, no gh'é mai stæto nisciun ch'o s'agge piggiòu a-o cheu o destin da lengua zeneise, ò ch'o s'agge fæto càrego de quarche instansa ötonomista, manco piccinn-a coscì: a-o conträio, tutta l'istöia da borghexìa zeneise a ne dixe che tutti i seu sfòrsci en stæti de longo in favô de l'unificaçion coltuale e lenguìstica con l'Italia. In sciâ fin, che o mâ o l'é vegio e incarognïo e mi no sò miga se peu bastâ, de mostrâ un pittin de zeneise inte scheue e de cangiâ a mainëa de votâ, comme o ne vorriæ dî l'amigo Gàmbao into seu artìcolo in sce sto nùmeo de "Bollezzumme!" Ascì ben che - se sa - a speansa a l'é a derrëa ch'a meue. |