Bollezzumme! Lettiatùa da giornâ d'ancheu
Bollezzumme!
Lettiatùa da giornâ d'ancheu
| "Sciâ
se credde - o me dixe, tanto ch'o me fa montâ in
sciô marciapê mòbile ch'o ne camalla de pe-i longhi
corrieu da fortessa metàllica - che o
Ciuccheçervello o no pòsse provâ di sentimenti, ammâ,
soffeî comme niätri? Sciâ l'é in errô. Lê o ne veu
ben, o se recilla tutto de poei coiosâ inte nòstre
vitte, o se ê sciorbe pægio che se foïsan rosòlio. O
l'é programmòu pe voeine ben. E quande un de niätri o
comensa fando unna vitta discipâ e o se spende de ciù
de quello che ghe serve pe vive, l'é quello che ghe fa
ciù de mäpró e, se se sta ben in oegion, se sente ch'o
ghe fa finn-a sciortî un zemî lëgio de d'inti sò
ventraggi metàllichi. Cöse accapitieiva se tutti se
consumméssan fin à l'ùrtimo e seu poscibilitæ vitale?
Tutti moieivan fïto. A çiviltæ a finieiva. Sciâ no
s'arregòrda di tempi grammi che gh'ëa ancon i dinæ? E
gente pensàvan söo che à consummâ comme tutto. Eimo
cæiti sotta o dominio da matëia, ciù ninte
spïtualitæ. E 'matëia", inta nòstra lengua, veu
dî 'mattô'. Ma o Ciuccheçervello, lê, o l'é
spïtuale; e allöa o l'à deçiso de premmiâ i ciù
allouïi, i ciù sparagnin, con fâli vive ciù tanto. E
de affermâ ciù fïto quelli ätri, avanti che pòssan
fâ do mâ a-a soçietæ con l'exempio, tanto che, quelli
che vedde moî ciù zoeni i ciù straggioin, s'attreuvan
poïa e càngian de vitta." "E mi - l'ò interrotto - comenso pensando che o Ciuccheçervello o ghe tegne à fâne vive pægio che di ratti inte'n coniggio, sensa fâne tiâ sciù a testa, appreuvo che a vitta, che no vivemmo niätri, o se â pitta lê. Scibben che no sò ancon cös'o se ne fa, ma... un momento, òua maniman ghe so'arrivòu... o l'é coioso, sciâ l'à dïto, o se sciorbe e nòstre vitte comme un rosòlio... anni e anni de vitta in cangio da demöa... ma scì! Quello che niätri no çe gödimmo in ponto qualitæ do vive, o Ciuccheçervello o ô peu cangiâ inte do tempo, inte di anni da vive; ma o peu fâ ascì a-a reversa: cangiâ o tempo inte do piaxei. De tutto o tempo che ç'ammuggemmo, con renonsiâ à tecciâçe, lê o se ne piggia unna bella parte e o se â cangia torna in piaxei... tutti i viægi che renonsiemmo à quarcösa con l'idea de guägnâçe di anni da vive, lê o l'arranfa ciù ch'o peu... à deçidde do nòstro destin gh'emmo misso un drogòu, do nòstro piaxei e da nòstra demöa..." "Sciâ me ô pâ voscià un drogòu! - o fa o Professô, tanto ch'o me compagna da maniman ciù drento a-o Ciuccheçervello - Sta màcchina chìe a gh'à unn'ànima ch'a l'è ciù grande da nòstra pe do bello. Inti seu miliardi de miliardi de gigabaiti ghe giandonn-a de pascioin che no çe ê poemmo manco figuâ de da lonxi. Finn-a i seu construtoî l'an posciùo compagnâ söo che à un çerto ponto, dappeu o l'à fæto tutto da lê. O l'é bon da antevedde e cöse che accapitià fra de çentanæe d'anni, quande niätri saiëmo mòrti e assotterræ. O no gh'à de beseugno de niätri, ma o l'é mai tanto de quello larghê e tanto de bonn-a con sta nòstra rassa sciagagnâ, ch'o se piggia lagno do nòstro destin. E no voemmo lasciâ ch'o se demöe? Mi, pe mi, ghe daiæ finn-a tutti i anni che m'arresta, se poësan servî à demoâlo, un ëse mai tanto ciù megio che niätri! Costion a l'è che me n'arresta ciù pöco, de anni. Lê o ne pòrta verso a grandixe, verso a perfeçion; che drïto gh'emmo, niätri, de dâghe breiga?" À sto ponto, mi diggo ch'o l'ëa feua comme un poggiòlo. "Ma mi ghe l'aviò, ò no, o drïto de deçidde mi cöse veuggio fâ da mæ vitta?" gh'ò repricòu. "Na - o dixe lê, co-o scciummasso da-a bocca - na che no ti ghe l'æ, quello drïto lìe, appreuvo che nisciun de niätri no peu savei cös'o l'é o seu ben. L'é vëa: o Ciuccheçervello o fa moî i desurpi, de zà ch'o no sa cöse fâsene de da gente ch'a no fa nint'ätro che consummâ, e bòn! Quelli che renonsia à consummâ perché gh'an poïa de moî o î fa scampâ de ciù. E seu vitte no mai stæte visciùe o se ê göde lê. E allöa? Ti te creddi de poei giudicâ? Chi se meita tutti i piaxei da vitta, feua che lê, o Ciuccheçervello ch'o vivià in sempiterno? O modello despægio da tutti, che tutti çerchemmo à assomeggiâseghe? Tutti i rebelli comme ti dévan ëse educæ à respëtâlo, pe-o vòstro ben, e söo che lê o peu aggiuttâve à vegnî normali, à guæî da-e vòstre fissaçioin." "Ma cöse veu dî normali?" ghe diggo mi, che me sento da maniman ciù attapinòu. "Normali en quelli che se affïa arrëo a-o Ciuccheçervello e a-a seu grandixe, e à sta vitta no ghe ciàmman nint'ätro." e, con dîme de coscì, o me fa chinâ d'in sciô marciapê e, inte'nna stnsiëta co-o soffïto basso, o me fa vedde un garbo into teito, tòsto unna göga, inti ventraggi da màcchina. À 'miâlo da-a vexin, o paiva un tempialapi. "L'é chì che se vegne normali. Stanni paxe. Quande tutto o saià stæto finïo, ti staiæ ciù ben, pe de longo. Ti me diæ graçie, quande o Ciuccheçervello o t'avià inandiòu a matëia çerebrale de mainëa de levâte d'inta testa tutto o presumî d'ëse chi sa cöse ciù che i ätri, tutte e idee despæge da quelle di ciù tanti. Saià comme dev'ëse; pe ti tutti i òmmi saian di fræ. Ti te demoiæ mai tanto, che no ti te ô creddi manco: ti te scampiæ à anâ à vedde a partïa de ballon, in scê scainæ di nòstri campi da zeugo belli ordenæ, donde no l'accàpita ciù de lidde, feua che quelle stæte stabilïe - inte di momenti particolæ - da-o Ciuccheçervello, pe dâ sfeugo de semme in semme a-i instinti aggrescivi de l'ëse uman; ti t'appascioniæ à zugâ a-o Gratta e Guägna; ti moiæ da-o rïe à ammiâ o varietæ do sabbo seia in televixon. Ma, ciù che tutto, ti saiæ orgoggioso de piggiâ parte de personn-a a-i grændi cangiamenti da nòstra soçietæ e ti te scriviæ à quarche importante partïo de Pòpolo, de quelli che n'à portòu tutti in sciô cammin da sarvessa, tutto zù da tanti anni, da quande an avùo deçiso de mette in deuvio o Ciuccheçervello. Vegni, infïite co-a testa chì drento e de chì in avanti ti veddiæ tutto sotta unna luxe neuva. L'opeaçion co-o laser a l'è curta, a l'indùa pöco menuti, o tempo de rascciâ via de d'into teu çervello tutto o frazzo, e fâtelo vegnî ùmeo pægio che a sæa." E lì dagghe à sponciâme a testa into pertuso de quella smersa de tempialapi. Ma mi ëa arriescïo à delibeâme e brasse con un cotellin piccin che gh'aiva inta mànega e che e Guardie, in perquixîme avanti che me portéssan da-o Professô, no me l'aivan attrovòu. Tutto o tempo aiva fæto mostra d'ëse ancon ligòu, ma à quello ponto, con un button, te ghe l'ò arronsòu lê, co-a testa into pertuso do seu Ciuccheçervello, pròpio lê, ch'o ghe voeiva mai tanto de quello ben. E quell'angæzo, tòsto ch'o l'à sentïo intrâ unna testa, o s'é misso in fonsion. "Scì, che son mi - o braggiava o Professô, che se vedde che o trattamento o ghe gustava - son o teu scciavo in sempiterno, pìggite a mæ vitta!" e, tanto che o tempialapi o te ghe mondava a çervella pægio che 'nna patatta, mi son camminòu de pe-i corrieu ciù prefondi do palaçio. Inta sala verde ò attrovòu un cavo, o ciù gròsso e ciù importante, o collettô de tutti quelli che serve à portâ a nòstra vitta a-o Ciuccheçervello. "E scì - m'appenso - òua me repiggio a mæ, co-i inteesci!" Co-o mæximo cotellin, ch'o m'ëa servïo avanti, ò taggiòu o cavo e, tutt'assemme, de d'inte quella feia l'é comensòu à sccioî, con un roggio de tutti i coî, tutta a vitta che da di anni l'ëan appreuvo à marmellâne: à lampi à sguari a sciorte, pægia do derluio de 'n sciumme, ch'o sccionfa de pe tutte e sale e i recanti do palaçio e o se rebella via tutto inta seu luxe de tutti i soî de tutte e galasce che l'è stæto che son che saian e mattin fïto e seie tardi unna zoena con de belle cheusce longhe ch'a se despeuggia o profî do monte de Portofin o profummo do tùmmao scinfonia K 551 Juppiter o canto agùo do dòmmo de Köln de l'Empire State Building a media luz Don Giovanni a cenar teco m'invitasti oh caminito mio ravieu e çimme pinn-e mæ poæ ch'o meue in sce'n letto d'uspiâ rock around the clock a vegia strìa ch'a braggiava o scabbio a gnisca a ciòrnia a bile a bïra a sböra abbæra a-a sbæra a bära tratrà katrà kraprà brafrà mmrammrazzrà. Paf. (2 - fin.) |
A primma pontâ de "O ciuccheçervello" a l'è sciortïa in sciô nùmeo doì de "Bollezzumme!"