Bollezzumme!
| L'òmmo
o l'ëa stiggio, co-a barbetta. I euggi grixi m'ammiàvan de
derrê à un pâ de spegetti drùi: Sciâ
vorrieiva dîme che dappeu da mòrte de seu barba, unna mòrte
- dìmmoghe coscì - che no gh'é guæi da ambîsene,
sciâ l'à perso arrëo a confiansa into Goerno e inte tutti
i seu atti?
- Pe dîghea tutta, no me fïo manco ciù de quello che fasso mi. No sò ciù chi me segge, à momenti. - O seu caxo o no l'é ræo, - o me fa lê, con aggaibâse o càmixo gianco, - e n'emmo zà guæïo pe pe coscì. Unna personn-a ch'a patisce zà un pittin de mâ de nervi e che gh'accàpita un despiaxei, a peu aveighe de ste reaçioin. Se dà a corpa à tutto o mondo, se vedde di nemixi da tutte e bande... ma gh'é de meixinn-e appòsta, gh'é de cùe chi fa miäcoi. Sti sentimenti de rebellion, st'angoscia verso a soçietæ, en di scìntomi ben ben conosciùi da do bello e no gh'è raxon de stâ in lagno. Sciâ se deve rende conto che a mòrte de seu barba inte quelle condiçioin... - Sciâ ô digghe sensa gena: tramëzo à doe scorlùssoe. - E ben, a mòrte de seu barba a no l'é corpa de nisciun... quell'òmmo o s'à vosciùo asgreiâ inte pöchi giorni tutta a vitta ch'o s'aiva ammuggiòu inte tanti anni... o saiva ciù che ben a fin ch'o l'avieiva fæto, nisciun no ghe l'à assequæòu. - Mæ barba, - ò dïto mi, che comensava à vegnîme a fïa - o l'é de longo visciùo pe-o seu travaggio e a seu famiggia e söo che de sti ùrtimi tempi o s'ëa misso à boffâ in coerta, à spende à deseuvio... o l'ëa despiòu, perchè o l'aiva accapïo quarcösa, che giusto òua mi arriescio à figuâme... O Professô o m'à ammiòu de brutto: - E òua sciâ vorrieiva dâ a corpa a-o Goerno e a-o Ciuccheçervello, ch'an fæto mai tanto de quello ben a-a nòstra Naçion? Accapiscio che e neuve régole peuan pai tròppo dùe: ma, in sciâ fin, ognidun o no fa nint'ätro che spéndise a seu vitta comme gh'é ciù cäo. - A l'é stæta tròppo crùa - ò dïto mi - avei scangiòu i dinæ co-e Crënse de Vitta. Miga tutti semmo in condiçion de giudicâ se ne conven gödî de'n çerto piaxei inte 'n çerto momento, ciuffïto che vive di meixi ò di anni in de ciù. E fâne pagâ o mangiâ, i vestî, e bollette da luxe e tutto o resto, con di giorni, de öe, finn-a di menuti da vive de meno, a l'é unna cösa da vegnîghe scemmi. - Sciâ sa benìscimo - o dixe lê - che quande se deuviava ancon i dinæ, se creava tròppo differense de tra e personn-e. Tròppo corruçion, tròppo traghetti e gazibbe. A-a giornâ d'ancheu l'é tutto bello ciæo e ordenòu. D'ätra parte, co-o giammin e co-o sagrifiçio, tutti poemmo aslonghîçela, a vitta, con guägnâçe di anni in ciù. Semmo stæti un momento sitti. Dappeu, con çerne ben e pòule inta bocca sciuta, gh'ò dïto: Me son de longo domandòu: e s'accàpita unna desgraçia e un o meue avanti o seu tempo? - Desgraçie no n'accàpita ciù, inta Grande Naçion - o dixe lê - ma se ne dovesse accapitâ, o saieiva stæto o Ciuccheçervello à fâle succede, e sciâ peu stâ segùo che saieiva tutto pe-o nòstro ben. - Ma quanti ghe n'é che peuan comportâ de vive à sta mainëa? - Ghe pòsso asseguâghe che o perçento de quelli chi s'allamenta o l'é contegnùo inte di confin fixiològichi:o zero vìrgola zero un via çento. O scistema o l'é tòsto perfetto. Se quarchidun o no l'é satisfæto, a-a reixe de tutte e làstime gh'é de longo unn'incomprenscion verso i sfòrsci che o Goerno o l'é appreuvo à fâ pe megioâ a vitta de tutti. Tutt'assemme me son fæto do cheu: Ma mi accaxonn-o o Goerno de sadìximo, e ciù che tutto d'arröbâneli, quelli anni de vitta, scibben ch'o dixe de voeine aggiuttâ à sarvâli. No arriesciva ciù à stâ fermo, e gambe se me mesciàvan da pe lô, pe tanto che foïsan ligæ. - Ma sciâ se rende conto de cöse sciâ dixe? - o fa o Professô - Tutti i biggetti magnetizzæ che deuviemmo pe anâ à fâ a speisa en sotta o contròllo do Ciuccheçervello. O Ciuccheçervello o l'é unna màcchina ch'a no peu fallî. O l'é lê ch'o tegne i conti do tempo chi n'arresta da vive. O l'é lê ch'o l'ammenestra i giorni da vive in ciù, che çe guägnemmo co-o travaggio e o ne ghe leva o tempo che çe spendemmo. No ghe peu ëse de äri e o no peu fâ di compæxi, appreuvo ch'o no l'é programmòu pe fâ di compæxi! Nisciun no se saieiva mai ciù appensòu che fämo mai tanta stradda, co-e reçerche in sciô DNA. Descreuve che, into patrimònio genético de ciaschidun, gh'emmo zà scrïto l'öa, o menuto e a mainëa da nòstra mòrte o l'é stæto o primmo passo. Òua, con un dispoxitivo telecomandòu, ch'o ven inseïo into lìchido çefalorachidian, finn-a di figgeu da nascion, o Ciuccheçervello o peu, con modificâ i geni, azzonzine da vitta ò levânela, e registrâ o dâ e l'avei in scê schede magnetizzæ, che ne sèrve pe tutti i uxi cotidiæn. S'accapiva fin à che ponto gh'ëa cäo st'argomento chì. Mi gh'ò dïto: E sciâ sa che piaxei, con quelli biggetti lìe, anâ à accattâ, fâ unna telefonâ, e vedde in sciô displæi do registratô de cascia, ò do telefono, i menuti, e öe de vitta che ne s'ammèrman, che végnan à ëse de longo de meno? - Ma unn-a de raxoin ciù importante do nòstro neuvo scistema - o fa lê - a l'é pròpio quella de incoraggî i çittæn à travaggiâ ciù tanto, à avansâ a matëia de scangio, comme à dî a vitta, e desventegâ i desurpi da-o strallattâ. E finalitæ do Goerno en pedagògiche. E, in sciâ fin, sciâ l'é zoeno, sciâ l'é fòrte, sciâ peu travaggiâ ancon pe coscì, ammuggiâse ancon di belli anni da vive e scampâ ciù che Noè. Ghe torno à dî: cöse ne poemmo, niätri, se seu barba o s'à straggiòu ciù de trent'anni de vitta inte pöchi giorni, de tra sciampradde, cialumme, viægi e con anâ à pe dònne? Pëzo pe lê, s'o l'à vosciùo fâ quella fin lìe! - Ma mi ghe diggo che no peu ëse - gh'ò dïto, e comensava à sciätâme in davvei - i anni ch'o s'ëa allugòu mæ barba ëan pe coscì ciù de trenta! Ëan a-o manco çinquanta: o no peu aveiseli speixi mai tanto fïto. Quarcösa o ghe î à consummæ sensa ch'o s'accorzesse. E mi ghe diggo ch'o l'é o Ciuccheçervello. O gh'avià quarche mendo, no diggo grande, quarche mendo piccinetto, ma o se mangia ciù vitta de quella che ghe pertocca. - L'é normale che unna parte da speisa a vegne introggiâ da-o Stato - o te me fa con un fattorisetto de presumî - pe sostegnî e grænde euvie che dévimo affrontâ. Sciâ vorrieiva tutto de badda? E tasce s'en de longo pagæ. E ciù che mai se dévan pagâ òua, con sto Ciuccheçervello ch'o n'assegùa a perfeçion assolùa into mançinâ e cöse do Stato; mantegnîlo in fonsion a no l'é miga unna focciära. Voscià sciâ me pâ un zoeno chi raxonn-a; che l'agge portòu chì e guardie, tutto ligòu moæn e pê, in caxon di seu dubbi appreuvo a-a polìtica do Goerno, ghe passemmo de refesso. Ma sciâ me dagghe a mente: sciâ vagghe à cà e sciâ s'ascòrde tutto; a soçietæ a veu söo che o seu ben. A Grande Naçion a veu o seu ben, tutti quanti voemmo o seu ben. Sciâ s'appaxente e sciâ lasce quetâ. Segondo lê a saieiva finïa lì. - Ma mi no diggo - ghe fasso - che o Ciuccheçervello o no l'agge da fonsionâ ciù mëgio che se peu. Diggo ch'o consumma tròppo. A nòstra vitta, che lê o se còlla un giorno appreuvo à l'ätro, a saieiva basta pe mantegnîlo pe di sécoli e sécoli. Levòu quello chi ghe serve pe-a seu manutension, o no dovieiva avei de mestê de nint'ätro, appreuvo che inti servixi pùbbrichi no ghe travaggia ciù nisciun, da dòppo ch'o fa tutto lê. Cös'o se ne fa mai, de tanta vitta ammuggiâ? Percöse o no ne â dà in derrê? - E voscià, pöveo meschinetto, comme sciâ fà à savei se o Ciuccheçervello o se tegne da vitta pe lê? - o me dixe o Professô, co-a mæxima esprescion de bòrnia - Comme sciâ peu créddise unna cösa pægia? - Ò fæto i conti. Chi se segge o peu fâse doì conti: basta aveighe un lapi e un tòcco de papê. Con savei che inta Grande Naçion gh'é un çerto nùmeo de çittæn, che travàggian quelle dæte öe e che ciù de tanto no peuan spende, e de fæti no spéndan, se fa fïto à accapî che ognidun de niätri o dovieiva scampâ çentoçinquant'anni ò pöcoassæ, e in cangio a va zà ben se s'arriva a-i ottanta. Donde van à finî i anni ch'ammanca? O se î ten o Ciuccheçervello! Ma cös'o se ne fa? L'é quello, che no capiscio! - Ma allöa voscià sciâ l'è un de quelli che pe fâ i conti deuvian ancon un lapi e un tòcco de papê? - o Professô o l'ëa vegnùo rosso comme un biscion, o no saiva ciù onde méttisea - E con mai tanti terminali do Ciuccheçervello, ch'en de badda à dispoxiçion de tutti, che seunnan, càntan e bàllan e inte 'nna fraçion de segondo peuan fâne arrivâ notiçie e spettàcoli de da tutto l'Universo, voscià sciâ me sta à carcolâ à mente quanti anni o dovieiva scampâ, de media,ciaschidun de niätri? - Ma perché? - ghe diggo - ghe pâ che, se ô fäva con un computer, o càrcolo o me vegniva despægio? - Peu dâse ascì - o fa lê - de zà che no l'è dïto che doì e doì fàssan de longo quattro: peuan fâ de meno ò de ciù, à segonda de cöse ven ciù à taggio, in ponto progresso e çiviltæ. O Ciuccheçervello o deçidde tutto lê, ma o ne lascia à ognidun de niätri a libertæ de çerne quæ a segge a realtæ che n'é ciù cäo de credde. L'é pe quello che me domando se se peu dâ che inte'n mondo mäveggioso comme sto chì, donde o fäso e l'imaginäio en vegnùi à ëse ciù vertadëi che a veitæ, sciâ stagghe à perde tempo à fâ di conti co-o lapi, e sciâ segge mai tanto mäfiaddo da voei scindicâ quello ch'o fa o Ciuccheçervello. O l'ëa pròpio inveninòu fòrte. Dappeu, stæto vegnùo ciù paxe tutt'assemme, o continua: E va ben, paçiensa. Veu dîse che con voscià i raxonamenti no cóntan. Sciâ dovià ëse sottapòsto à un trattamento, p'ëse torna educòu segondo i neuvi e ciù sæn prinçipi che régolan a vitta da Grande Naçion. Òua ghe deslighiò un pittin i pê e coscì sciâ porrià vegnîme appreuvo co-e seu gambe, tanto che ghe diggo comme sta e cöse. O m'à allascòu un pò e ligagge de gambe, ma o m'à lasciòu a camixa de fòrsa, de mainëa che no poeiva ancon mesciâ e brasse. (1 - o continua) |