Vai al brano corrispondente in Italiano

Marcus Valerius, iterum consul, ex auctoritate patrum ac populi iussu Caritibus bellum indixit. Tum primum verus belli terror Caerites invasit: et eos paenitebat agrorum populationis, qua Romanos lacessierant, et Tarquinienses exsecrabantur, qui fuerant defectionis auctores. Interim, omni belli apparatu neglecto, legatos ut a Romanis veniam peterent, mittere statuerunt. Hi, cum adissent senatum, a patribus reiecti sunt ad populum. Ibi legati rogaverunt ut sui misericordia Romanos caperet; deinde conversi ad delubra Vestae, hospitium memorabant quo ipsi Vestales et Romanorum sacra olim accepissent. Orabant denique ut Caere, sacrarium populi Romani, intactum inviolatumque servarent. Movit populum non tam praesens quam vetus meritum. Itaque pax populo Caeriti data est indutiaeque in centum annos factae sunt.