Mastru
Raffeli La Scala racconta la
propria vita alla nipote Daniela
"Quannu
iu nascìu me patri era già mortu e me matri
stava a casa di so patri, me nonnu.
Quannu avia cinc' anni, ‘ncuminciai a gghiri
a scola; passavu menza junnata a scola e mezza
junnata no mastru di carretta.
Me nonna pi fàrimi gghiri no mastru, ci dava du
sordi a iddu, accussi 'u mastru mi putìa rari a
simana e iu era cuntentu e continuavu a gghìrici.
Ddivintatu rannuzzu, a scola non ci ivu cciù, ja
sulu no mastru.
A ricissett' anni mi ‘nni ju 'nta avutru
mastru, Palazzolo.
Quannu i tedeschi vinniru all’aeroportu ri
Comisu 'stu mastru si rapìu na lavanderia e
quindi nun ci ju cciù a travagliari ni iddu e mi
nnì ju ni Puglisi, ca era in società cu
Floridia.
Pui era ranni, bravu di misteri, mi nnì ju all’aeroportu
a travagliari picchì c’erano i tedeschi ca
circavano operai e pui picchì mi davano quattro
mila lire o iornu, mentri co mastru vuscava
quattru mila liri a simana.
Comu ‘ncuminciò a guerra però ci furono i
bombardamenti all’aeroportu e nun ci ju cciù.
Doppu un pocu m’arrivau a cattullina pi pàttiri
militari e mi nni ju vicinu Napoli, unni mi
desiru 'u patentinu di montatore, picchì allora
l’apparecchi erinu di lignu e s’avianu
aggiustari. Fici 'u cursu e mi desiru 'u
patentinu.
Doppu cincu misi niscìu 'a liggi pi ccù era
figliu unicu e mi congedarunu.
Appena turnai o Comisu mi misi a fari i carretta
cu ddu mastri 'i carretta.
'A genti mi diciva 'u prezzu ro carrettu, iu mi
calcolavu quantu c’avìa stari e si mi
cumminìa ci lu facia.
Doppu un pocu mi nni ju a travagliari a
Rammicheli pi tri anni.
Doppu sti tri anni mi maritaiu e mi nni ju
arrieri o Comisu, unni mi rapìu ‘na putìa
e facìa carretta.
Un jornu vinniru dui di Agrigentu ca avianu
accattari tri carretta a picca prezzu pi
vinnirasilli ad Agrigentu e iu ci li fici
accattari e no mentri mi vulivanu cummìnciri a
jri a travagliari ad Agrigentu cu iddi; cche
riparazioni dda si vuscava cciossài, ma iu
mprima ci rissi di no.
Pui turnarunu arreri pp' accattarisi avitri
carretta e mi dissiru arreri di jri a travagliari
cu iddi e stavota iu, cu me muglieri, ci ju.
Arrivati ad Agrigentu mi misi a travagliari cu
iddi ‘mprima, e doppu un pocu iu rapìu un
generi alimentari pi me muglieri, ma iu no.
R'arrieri a putìa facìa e riparava i carretta
finu a quannu lu potti fari; pui ca carretta nun
ci nn’eranu cciù avìa sulu a putìa.”
Raffaele La Scala
|
