RESTITE MI, IZBOJI ZELENI
(dičini)
Dok je vijar od istoči lupa
mlateć naše jur dospilo lozje,
sa mog trsa izbila dva pupa
domalo će sazorit u grozje.
Pupi moji, sva intrado moja
usala bi loza da vas nima,
Bože, čuvaj ova dva izboja
filokseri ne daj blizu njima.
Restite mi, izboji zeleni
izdaleka čovik nek' se vidi,
u nevoji, riči se spomeni:
Savist slidi, vojon zapovidi!
Itajuć se za dovatit sunca
staren panju ne činite lada,
sa višjega lipji pogled puca
ma pri zemji, boji razum vlada.
O' jematve dok ne dojde vrime
žile svoje natapajte poton,
za istrajat omare i zime
škropite i' čestitin životon.
Restite mi, izboji zeleni
panju svome nastavite vika,
svidočite juski narešeni:
di ko nika, tu je i obika!
Ćaća, 1. srpnja 2005.