Poesie tratte dalla raccolta poetica

Poesie tratte dalla raccolta poetica:

" 'A Scola Mia "

'A scola mia	'A recita d''a vita	Natale	'O pensionato
Via Sulagna	'A figlia 'e Napule	'A penna	Analise d''o sanghe
'O viaggio	L'eredità	Fino all'urdimo	'O lietto
Tiranno 'a rezza	'A Dummenica a mmatina	'A mmiria	'A festa d''a mamma
'O compleanno

Poesie tratte dalla raccolta poetica:

" 'O Calennario "

Gennaio	Febbraio	Marzo	Abbrile
Maggio	Giugno	Luglio	Austo
Settembre	Uttombre	Nuvembre	Dicembre

Poesie tratte dalla raccolta poetica:

" Ll'Albero 'e Natale "

Ringrazianno a Dio	'O nonno		Me sento sulo		Malincunie 'e Natale
'O chiù sincero amico	Sentimente 'e pueta		'E panne spase		L'aborto
Figlio mio!		Cane senza padrone		Acrostico

'A SCOLA MIA

Io songo quase quase analfabeta

pecchè nisciuno a’ scola m’ha mannato,

mò me songo fissato a fa ‘o pueta,

songo ‘gnurante e faccio ‘o letterato.

Nun è che io me sento prufessore,

p’ammore ‘e Dio! Me voglio lusingà?

‘O vierze si m’ ‘o scrive chistu core

nun c’è bisogno ‘e l’università.

‘E viche songo state ‘a scola mia,

‘e prufessore ‘a gente che stà ccà,

aggiu campato sempe ‘n miez’a via

scassanno tutt’e lastre d"a città.

C’ ‘ a mazza e pivize, ‘a purtuvallare,

c’ ‘o strùmmelo, currenno p’a marina,

tiravo ‘a rezza ‘nziem ’e marenare

criscenne ‘nterr’a rena ‘e margellina.

Cu ‘e tramme io tenevo abbunamente

Cu’ abilità io lle saglievo ‘ncuollo

Si’ o fatturino me teneva mente

Io pè dispietto lle scappavo ‘o trollo.

Pè tutte chesti cose che facevo

‘a gente spisso ‘iastemmava ‘e muorte

io m’arraggiavo e spisso nce chiagnevo

pensanno a mamma mia che m’era morta.

‘E viche songo state ‘a scola mia,

c’’o popolo me so laureato

pirciò si mò ve scrivo na puisia

dint’a sti viche me ll’aggiu ‘mparato.

'A RECITA D' 'A VITA

'O munno è nu gruosso palcuscenico
'a vita è comme fosse nu triato
c'ognuno 'e nuie 'a parte soia nce recita
'a parte c''o destino l'affidato

Chi fà 'a cumparsa e chi fà 'o primm'attore
d''a nascita 'o cupione è pronto già
e stu destino fà 'o suggeritore
isso te dice chello che tu he fà

Cu' mè 'o destino avrà 'mbrugliato 'e carte
e me fà dì parole inconcludente
io senza senso rècito stà parte
e 'o pubblico rimmane indifferente

Faccio 'a cumparsa dint'a cumpagnia
e recito <A speranza d''o dimane>
trà 'o pubblico sultanto mamma mia
cu' ll'uocchie 'e chianto stà sbattenne 'e mane.

NATALE

'A vigilia, a mezanotte

aggiu mis'o bammeniello
'ncopp'a paglia sott'a rotte
'nmiez'o bue e l'asinello.

Me pareva c''a Madonna
'o guardava e lle diceva:
Bell'e mamma , nonna nonna...
Mentre chiàgnere 'o senteva.

L'aggiu ditto: Pecchè chiagne?
Cu 'nu trièmmele 'int'a voce.
Ma pecchè Tu mò te lagne?
Pecchè saie che muore 'ncroce?

Sempe 'o sòlito ogn'anno,
Tu a Natale te presiente,
L'ommo a Pasca te cundanna,
muore 'ncroce puntualmente.

Pè trè ghiuorne e pò risuorge,
lasse 'a terra 'nmiez'e 'uaie,
ma dich'i' nun te n'accuorge
quanno 'ncielo te ne vaie!

Nun 'e vide sti criature,
nun so' tale e quale a Te,
chisti vascie triste e scure,
nun sò stalle! 'E vuò vedè?

A Te 'o bue e l'asinello
te facevano scarfà
ma pè cheste criaturelle
manco chesto, ovvì nce stà?

Tu nce manno terremote,
Tu nce manne 'o gelo a vierno,
si peccammo quacche vote
'nce minacce cu l'inferno

Tu he sufferto pè trè ore
c''a certezza e te salvà,
l'ommo nasce, campe e more
c''a paura e se dannà.

' O PENSIONATO

Ll'ata matina 'ncopp'a na panchina
me s'è truvato proprio affianco a me
nu vicchiariello 'ncopp'a sittantina,
cu' 'e ghette 'ncopp''e scarpe e c''o gilè.

Comme m'avesse dato appuntamento ,
appena me vedette llà assettà
me dette na guardata 'a copp''e lente

dìcenneme: Faciteme apiccià!

Pò 'o viecchio me guardaie e me dicette:
Io sono don Liborio 'o cavaliere!
Tanto pè dì na cosa 'o rispunnette,
dànnece 'a mano: Onore e piacere!

Cu ll'uocchie triste 'o viecchio me guardaie
e atteggianno na faccia a resatella,
dicette: - Chesti machine che guaie,
addò so' ghiute chelli carruzzelle?

Io 'o rispunnette: Cavaliere bello,
nuie appartinimmo a chella società
'e Napule d''e canzone e 'o pazzariello,
e cammenave 'a notte p''a città.

Napule 'e chelli belle piererotte,
cu' 'a voce bella 'e chilli maruzzare,
do' calle 'e trippa, 'e zuppe 'e carnacotte,
de' puoste 'e figurinie e mullunare.

Nun ce scurdammo po' dint'a 'iurnata,
all'ora d''a cuntrora chelli voce:
Ll'acqua zuffregna 'a mmùmmera gelata!
Na bella perziana 'o sole coce!

E pò quanno 'a dummeneca a mmatina,
'o fisco d''e nucelle americane,
'e noce fresche! 'E fiche dò ' ciardino!
E per''e feste era vùllente 'o pane.

Ia, cavaliere bello, che dicite,
mò nce mangiammo pulle c'araoste,
vulesseme turnà nuie a chella vita
c''o filo d'uoglio 'ncopp'o pane tuoste.

'A gente stà guardanno che facite?
E nnò accussì nun ve voglio vedè!
'A sott' 'e lente veco che chiagnite,
sùsiteve, ve voglio offrì 'o cafè!...

VIA SULAGNA

Stà via sulagna che malincunia

stu sole friddo nun me dà calore

càdene 'e fronne morte 'n miez'a via

s'è port'o viento 'nziem'a a chist'ammore.

Son'a campana, tristamente sona

tu comm'a sempe te faie 'o segno 'e croce

che stò suffrenno tu nun te n'adduone

senza parlà me staie mettenno 'ncroce

Si tu me vuò... pur'i' pur'io te voglio

nce simmo nuie lassate e nce cercammo

nuie simme schiave 'e tutto chist'orgoglio

nuie nce vulimmo bene e nce lassammo

Cadene 'e fronne e ggià trasuto autunno

tu staie chiagnenne e chiagno mò pur'io

ma che nce faccio chiù 'ncopp'a stu munno

te veco alluntanà..... m'he ditto, addio !

'A FIGLIA 'E NAPULE


Ma comm'è bella Napule stasera,
'ncielo sti stelle lucene a migliare
'a luna pitta argiento sta scugliera
cònnole sò sti varche 'e marenare!
Stuzzica e sense, st'aria 'e primmavera,
comm'a ddoie braccia 'o golfo abbraccia 'o mare
cu 'llonne 'o mare vasa, sta riviera.
Napule ca se sposa e pe' cummara,
è a luna, ch'è chiù bella e llati sere!

Gente 'e tutt'o munno, ccà currite!
Napule ca se sposa e pe' cummara,
Sti dduie bellizze rare se 'so aunite
'o cielo 'o lietto 'e sposa ha priparato,
Napule 'ncopp'o fatto ha parturito,
sta faccia tosta priesto s'è spicciato

Comme l'hamma chiamma, sta criaturella,
ch'è figlia 'e sta città che canta e abballa?
'E stelle comm'a tanta cummarelle,
attuorno a' luna, mo' fanno ruciello,
mentre d'o cielo 'nu core d'angiulille
'nce danno 'o nomme a chesta piccerella...

Ischia, si 'ttu, si 'ttu, sta criaturella
Napule è mamma, pe' pate tiene 'o mare,
si 'o paraviso 'e tutt'e furastiere
do' munno sano si 'nu piezzo 'e core
e tiene 'o vverde 'e tutt'e primmavere,
tu si' 'na casciaforte 'e giuilliere!
Napule 'nfronte a tte, te stenne 'e mane,
Ischia si' figlia tu, napulitana !

' A PENNA

'A penna, nè ched'è?!... ? Nu 'bastuncino,

i'è fatta, cu' 'na ponta e 'o poco 'e 'ngnostra,

ma quanno 'ncopp'a carte, essa cammina,

te fa vedè 'a putenza ca te mostra!

e ll'anema è 'a 'gnostra' e chesta penna,

po' essere, celeste, rossa o nera,

ma quanno 'ncoppa 'a' carta essa se stenna

gioia, essa pò' ddà o dispiacere!

Sta penna te pò' ddà, raggione o tuorto

essa te rappresenta ogne mumento,

da fede 'e nascita, fino all'atto ' emorte,

te pò' fà ricco cu' 'nu testamiento!

e quanno a' scola 'a primma vota ausa

sta penna tremma 'int'a sti manelle,

pecchè te vede timido e scurnuso,

essa t'aiuta a ffà, sti mazzarelle

e nun te dico mmano 'o nnammurato,

sta penna quanno scrive c'addiventa,

pò scrivere parole appassiunate

e te pò' ddà n'addio, ca te turmenta

e ddà, sta penna mmano a n'emigrante

ca scrive 'a mamma ca lle stà luntane

sta penna, te fà fà, lagrema 'e chianto

e te f'arricurdà, ch'è amaro 'o pane!

è assaie importante 'a penna 'ncopp'a terra,

pecchè si 'a miette mmano a' 'nu putente,

essa pò sottoscrivere 'na 'uerra

e te manno a murì, miliune 'e gente.

però si 'a tene strette 'nmiez'e ddeta

chi scrive 'nu sunetto o 'na canzone

pò addivintà, stà penna 'nu pueta

si e vierze songhe scritte cu' passione.

Io sulamente nun'a tratto bona,

pirciò, ogne quavvota ca ll'ausa

pe' scrivere 'o vierzo 'e 'na canzone,

doppo lle cerco mille vote scusa!

ANALISE D''O SANGHE

Nun me mesuro maie na pressione
e nun me piglio maie na medicina,
io cu 'nu litro 'o 'juorno stongo buone
nun me ne fotto si è Gragnano o Asprina

L'analise d' 'o sanghe si m'ha faccio
nun truvarranno tracce 'e medicina
'a dint'e vene 'a copp'a chistu vraccio
me tirarranno nu surzillo 'e vino.

'O 'juorno ca so' muorto venarranno
pe' chesta crapa centenare 'e gente
e quase certamente diciarranno:
Ma comm'è muorto? Nun suffreva 'e niente!

'O vino certamente l'avrà acciso!
Se fumava quaranta sigarette!....
Pe 'nun parlà d' 'e femmene stu 'mpiso,
'e tutt'a casa prefereva 'o lietto.

Comme so' muorto a vuie che ve ne fotte
si è stato 'o fummo 'e mille sigarette
o ca me so' affucato dint'e votte
sculanneme ogne ghiuorno dduje perette!

Sento san Pietro 'a cielo ca me chiamma,
ma si turnasso a nascere dimane,
'nun me zucasso chiù na zizza 'e mamma,
ma 'o biberò m'ho faciarrio 'e Gragnano!

'O VIAGGIO

'O tiempo passa ampresso, comme fuje....
te l'arricuorde, o no mia cara Rita,
pigliaieme 'o stesso treno tutt'e duje,
chella stazione se chiammava < Vita >.

Quann'o destino dette stà partenza,
sulo io e te dint'o scumpartimente,
cu' e core nuoste càrreche 'e cuscienza,
cù duje bagaglie chin'e sentimente.

E comm'a terra aspetta l'acqua a maggio
io m'aspettavo 'a te na primma figlia,
addivintaie chiù bello stu viaggio
quanno venette st'angelo 'n famiglia.

Sempe campagna, maie na rotta scura,
curreva 'o treno verso nu dimane,
ma rigalaste n'ati trè criature,
n'ati trè figlie buone comm'o pane.

Passava 'o tiempo 'iuorne doppo 'iuorno,
trè figlie nuoste ggià se ne so ghiute,
nuie stammo 'ncopp'a strada d"o ritorno,
loro cu n'atu treno so partute.

Resta vacante stu scumpartimente
Madonna chistu treno comme fuje,
ll'urdimo figlio è sciso e tristamente,
restammo n'ata vota tutt'e duje.

E mò guardammo 'a dint'o fenestiello,
ll'urdima stazione himmo avvistate,
ammore mio, doppo stu tunnello,
tienete pronta, che nuie,........ simmo arrivate!

L'EREDITA'

(A mio figlio Paolo)

Nascenne io te dette 'o benvenuto
e t'accettaie comme na grazia 'e Dio,
tu forse non m'he manco cunusciuto
ma io te cunosco buono figlio mio.

E se po' di' che 'a quanno tu si' nato
nuie nun ce simmo ditto na parola ,
nu figlio buono nasce già 'mparato
pure si pò 'a famiglia è 'a primma scola.

Tutt"e ricchezze meie tu he ereditate,
io t'aggio fatto ricco grazia a Dio,
mò so felice che te songo pate
pecchè si' degno 'e purtà 'o nomme mio.

Criatura nun me diste maie tristezze
campaste bona e onesta 'a giuventù,
si he ereditate 'a me chesti ricchezze
fanno tesoro 'e tutte sti virtù.

A stà cumpagna nun le dà dulore
senza sparagno dalle bene e gioia
pe tutt"a vita dalle tantu ammore
quant'io nce n'aggiu dato a mamma toia.

Cammine sempe comme he cammenate
sparte cu ll'ate chello che tu he 'vuto
che ammè me resta st'atu poco 'e strate
pò avoto 'o vico appriesso e te saluto.

FINO ALL'URDIMO

Nuie simmo nato 'o largo 'o Rusariello,

tu 'o primmo piano e io a retrosciassè,
tu signurino e io nu scugnezziello
e so rimasto sempe sotto a te.

'A stessa classe, proprio 'a stessa scola,
tu 'o primmo banco e io 'o banco areto a te
e io cu 'e scarpetelle a meza sola
e tu vestive comm'a figlio e rrè.

Dà grusso addivintaste n'ingegniere,
io n'operaio e dipendevo 'a te
e pè trent'anne dà matina 'a sera
tu he cammenato sempe annanze a me.

Mo tu si muorto cu 'nu brutto male
e aggià venì pè forza a te vedè
e pè rispetto vengo 'o funerale
pè stà ll'urdima vota areto a te.

'O LIETTO

Cu 'a panza chiena e 'ncapa 'o poco asprino,
oj lietto, tu me tiene 'int'a cuntrora,
si accussì bello cu' 'e lenzole 'e lino
che m'aggia fà pe' forza na mez'ora.

Tu sì 'a delizia 'e tutt' 'e sfaticate,
pecchè si 'o regno d' 'a cummerità,
si 'o paraviso 'e tutt'e 'nnammurate,
faie nascere e murì st'umanità.

Oj lietto, tu m'he affatturato,
tra mè e tè nun ce stanno segrete,
si sempe 'o stesso 'a quanno io sò nato,
sulo he cagnato 'e tavule cu''e rrete.

Oj lietto, si nu grande ruffiano,
tiene 'a cànnela mentre se f'ammore,
primma tenive 'e matarazze 'e lana,
mò te l'he fatto c''o molleggiatore.

Io so' sicuro ca nun faie parole ....
Si tu parlasse sa' che ddiece 'e 'uaie,
quante ne visto sott'a sti lenzole,
e si 'o sapesse 'a gente? Nun sia maie!

Oj lietto io te so' riconoscente,
p' 'a nascita p' 'a primma notte' e sposo,
pe' quanno venarrà chillu mumento
che io m'appoio pe' ll'urdimo riposo.

TIRANNO 'A REZZA

Me purtato cu te oj marenaro
a tirà 'a rezza a largo de Furia
forse chist'è 'o spettaculo chiù raro
che io aggiu visto dint'a vita mia.

'O viento era calmo e cumpiacente,
nce accarezzava 'o vuzzo 'n miez'o   mare
quase russagno 'o sole lentamente
se ne scenneva dint' all' acqua chiare.

A ppoppa c' 'o timone 'o capitano
'ndrezzava a prora accarezzanno ll'onne,
do' cielo 'o strillo 'e quacche gabbiano
me risvegliava 'ncore ammore e suonne.

Stà faccia scura t'ha pittata 'o sole,
senza parlà tu parle cu stu mare
ausanno cierte magiche parole
che sape sulo dì nu marenare.

Famme vedè 'o miraculo 'e stà rezza
dint'a sti mane toie forte e 'ncallute,
mietteme dint'o core stà priezza,
famme vedè stu munno scanusciute!

Stà rezza ca mò saglie lentamente,
porta 'int'a varca tanta grazie 'e Dio,
e io me sento pervaso 'e sentimente.
Sbatte chiù forte chistu core mio.

Ma che silenzio attuorno, ma che pace!
Sagliene 'nziem 'a rezza vive ancora,
scuòrfene, pintarrè, purpe verace,
mazzune, triglie 'e mòrze culor d'oro.

Mò n'atu purpo a rrete s'è 'mbrigliato,
nu muorzo 'ncapa pò stupetià,
se mova e s'arravoglia attuorno 'o cato
comme vulesse dì: Famme campà!

Ll'urdimo tratto 'e rezza e già arrivato,
'nterra a stà varca è tutto argiento e oro.
d''o cielo mamma bella 'e Munzurrato
ha stiso 'o manto suoie d''a poppa a prora.

'A DUMMENICA A MMATINA
Embè, quann'è 'a dummeneca a   mmatina,
sarrà abbitudine o fissazione
io me ne vaco abbascio margellina
c' 'o friddo e c' 'o sole d' 'a staggione.

Nun vaco a visità museie e chiese,
nun vaco a visità mostre 'e pitture ....
Senza me lusingà, senza pretese,
ma l'arte overa 'a fanno 'e piscature.

Quanno me fermo annanze a sti spaselle
c' 'o pesce vivo appena asciuto 'a mare,
che nne facite nu quadro 'e Raffaelle,
quale museio ve dà sti cose rare!

Nu scuòrfene se move, f'ammùina,
nu purpo s'arravoglia attuorno 'o cato,
dint'a nu sicchio vongole e lupine
se schìzzene chell'acqua uno cu n'ato.

Aunite a fascie chisti cannullicchie
pàrene girotonde 'e criaturelle
pazzèano cuntente dint'e sicchie
'nzieme cu taràtufele e patelle.

Che bella cosa 'e cùzzechelle 'e scoglie
cu 'e riente 'e cane ancora chin'e mare,
sulo c'addore me venesse 'a voglia
d'addunucchiarme annanz'e marenare

'ndenocchie io facesse stà preghiera:
Madonna mia prutiegge 'e piscature,
puorte sti varche 'nsalve quann' è a sera,
falle tirà d''o funno sti pitture!

Pirciò ogne dummeneca a mmatina,
sarrà abbitudine o fissazione
io me ne vaco abbascio margellina
c' 'o friddo e c' 'o sole d' 'a staggione.

A   MMIRIA

'A mmìria è comme fosse nu curtiello
che trase 'n pietto e te sprefonne 'ncore
è tale e quale comm'a nu martiello
che 'nchiove 'ncroce sentimente e ammore.

Madonna mia che brutte sentimente!
Chi tene mmìria soffre e fà peccate,
ma quase sempe 'a tene ll'ommo 'e niente
che se turmenta pe' valore 'e ll'ate.

Sti ccose 'e dico a me se cala 'a voce
p' 'a mmìria quante male che se fanno,
p' 'a mmìria Gesù mio muriste 'ncroce.
Chist' uommene che pene che me fanno!

Damme nu poco 'e chesta vita toia,
me serve pe' campà sta vita mia,
pitte, sculpisce, scrive me daie gioia
pecchè io campo senza gelusia.

Io te ringrazio Dio che sti parole
m' 'e suggerisce e m' 'e sculpisce 'ncore,
pirciò m' 'a godo na 'jurnata 'e sole
e senza tenè niente so' signore!

'A FESTA D' 'A MAMMA

Oggie ch' è 'a festa toia ched'è na rosa,
te mmièrete pe' mme mille ciardine
tu rieste sempe 'a rosa chiù addurosa
pecchè si' 'a rosa che nun tene spine.

Nun ponno maie bastà chesti parole,
pecchè tu stessa oj ma', si 'na puisia
e nun m' 'a putarrà maie scarfà 'o sole
comme m' 'a scarfe tu st'anema mia.

Pe' mme si' ll'acqua che me lev 'a sete,
pe' mme si' 'o pane che me lev 'a famme,
nun bastano pirciò mille puete
pe' scrivere nu vierzo pe' sti mamme.

Si' ll'aria che respiro, si' ll'ammore,
te tengo 'nchiuso dint'o core mio ...
Ah! Beneditto sia chillu Signore!
'O bene 'e mamma è comm'o bene 'e Dio.

Festa d' 'a mamma, festa d'alleria
pe' chi na rosa sape a chi 'a purtà
c' 'o chianto stò arracquanno 'a rosa mia
e 'a porto 'ncopp'a tomba addu mammà.

'O COMPLEANNO

(a mia moglie Rita)

Quant'anne, ma quant'anne so passate,
chisà quant'ate nce ne stanno ancora
io t'ero sposo e mò si' pure frate
m'ire cumpagna e mò si' pure sòra.

'Iurnate 'e giuventù', 'iurnate belle
oggie festiggie n'atu compleanne
pe' st'uoccie tu si' nonna vicchiarella
ma pe' stu core mio tiene vint'anne.

Oggie quant'anne faie? Quant'anne tiene?
Pe' nnuie 'e ghiurnate ormaie so troppe longhe
passano ll'anne e chiù te voglio bene
pirciò nun me ne 'mborta quante songhe.

Dint'è ghiurnate nere e de tempesta
tu m'he sparciate 'e nnuvole cu' 'e mmane
e me sapiste dà stu sole 'nfesta
che me scarfava a tàvula stù pane.

Sposa mia cara, mamma 'e chisti figlie
che songhe 'e frutte 'e chist'ammore mio
tu me dunaste 'o bene 'e na famiglia
e me 'mparaste a scrivere 'a puisia.

Mò nu pensiero fisso me turmenta
c'arrassusia si primma 'e mè tu muore
già penso sarrà ll'unico mumento
che nu' me daie cunforto a stu dulore.

Siccomme 'o penso sempe cara Rita
nun me rassegno senza stu cunforto
nun putarrio campà n'attimo 'e vita
pirciò 'a stess'ora 'o stess'istante ' a morte!

GENNAIO

Mese 'e gennaio, si' friddo e si' arrucante
pecchè tu arape 'e porte d"a vernata
mentre dormene 'e ciure 'int 'e piante
tu 'e spiezze 'e rame cu 'na ventecata

Tu si' 'o chiù brutto mese 'e tutto ll'anno
nun daie arricietto manco all'auciello
appena ca tu spunte se ne vanno
vanno a fà 'o nido addò nun ce vò 'mbrello

E 'ncielo mò nu lampe, mò nu tuono
e c"a tempesta 'e foglie te strascine
ll'unica cosa ca tu tiene buono
che spanne attuorno addore 'e mandarine

FEBBRAIO

Febbraio si 'nu mese sfurtunato
maie nu pueta s'arricorda 'e te
dint'e canzone maie si' annummenato
e nun è giusto vuò sapè o' pecchè?

Appena ch'è passato nu Natale
tu te presiente cu' nu friddo allero
te puorte sott'o vraccio a carnevale
e for'a porta tien 'a primmavera

Mese 'e febbraio me si' tanto caro
tu m'arricuorde tante e tante cose
e chi te dice ca si' curto e anaro
respunnele c'addore d"e mimose!

MARZO

Vint'uno marzo, oggi è primmavera!
Spalncate barcune e feneste
cu"e primme rose spòntene 'int"e teste
cacciatannella stà vernata nera!
Vint'uno marzo, oggi è primmavera!

A' rundinella o' nido stà turnanno
e stu cardillo dint'a stà caiuola
canta sbattenne 'e scelle sott'o sole
allere spase asciuttene sti panne
A' rundinella o' nido stà turnanno

Viole belle, ciclamine e rose
v'aspetto n'anno sano, vuie 'o sapite
me date tanta gioia dinta stà vita
pecchè cu'vuie ll'aria è chiù addurosa
Viole belle, ciclamine e rose!

Spalancate barcune e feneste
lasciate trasì 'o sole dint'e case
faciteve cu'e raggie dà nu vaso
facitele a stu sole mille feste
Spalancate barcune e feneste!

Oj primmavera mia chin'e passione
ca stùzzica sti sense e"nammurate
pecchè chiù bella tu si' riturnata
te voglio dedicà mille canzone
Oj primmavera mia, chine passione

ABBRILE

Cu'e braccia aperte t'aspettavo, Abbrile!
Cu'ttè è sincero e nobile stu sole
sì' 'e tutte ll'anno 'o mese chiù gentile
pecchè tu viene carreche 'e viole

Cu'ttè dint'a campagna tutt'addore
cantano faticanno 'e campagnole
ll'albere 'e frutte stanno tutte 'nciore
farfalle ca se'mmescano cu"e viole

Abbrile scite 'e sense 'e chi vò bene
cu'ttè se fà chiù viva 'a primmavera
cu' Pasca miette 'a pace dint'e vvene
e spanne attuorno addore d"a pastiera

MAGGIO

Maggio d"a primmavera si' 'o salotto
e 'mmiez'e mise rieste 'o chiù signore
non songhe quadre ca pittate Giotto
ma è Dio ca s'è spassato a fà 'o pittore

Trentuno 'iuorne so trentuno feste
so' rose thè, garuofene schiavune
ca schioppene a migliare dint'e teste
addiventano ville sti balcune

Maggio tu m'he purtato na rusella
io te ringrazio ca me daie stà gioia
p'o primm'ammore mio, coglio 'a chiù bella
e 'a porto a mamma mia chè 'a festa soia

GIUGNO

Giugno ce viene a ddì ca ggià è staggione
tu puorte sti primizie dint'e sporte
se sentene 'e cantà mille canzone
cantane pè stu sole ca tu puorte

Se sentene chiù allere 'e venneture
e danno 'a voce bella d"e cerase
sentenne 'a voce correne 'e criature
escene alleramente 'a dint'e case

Giugno tu tir'a fune a stu telone
nuie t'aspettammo tanto ca tu viene
tu riecete nu prologo 'e staggione
e 'o sole è 'o primm'attore 'ncoppe 'e scene

LUGLIO

Luglio si' facciatuosto, cu"a calura
le lieve 'e panne 'a cuollo a sti figliole
'a femmena è chiù bella si st'annura
ma chi s"a vasa è sulamente 'o sole

Cu'ttè se cerca 'o frisco 'e pergulato
addò ammatura ll'uva sott'o sole
addò te può accusà sott'o palato
na 'nzalatella d'accio e pummarole

Cu na butteglia fresca 'e vino asprino
e lavannete 'a faccia c"o mellone
aize nu bicchiere chin'e vino
e faie nu bello brinnese 'a staggione

AUSTO

Austo tu nce puorte 'o sol lione
st'aria abbafata overo fà paura
'o meglio posto è sotto nu' mbrellone
te piglie 'o frisco 'nziem' abbronzatura

Nisciuno chiù cammina 'n miez' a strata
sul 'e d'e viche vene quacche voce:
E' ffiche fresche! 'A cèveza annevata!
Na bella perziana 'o sole coce!

Austo cu' stu sole appicce 'e case
ma a' fine manne 'a cielo acqua a zeffunno
manne tempesta ch'è trùbbea 'e cerase
pe nce ricurdà ca vene autunno

SETTEMBRE

Settembre bellu mio tu faie vennegna
è comme a ll'oro ll'uva dint'a vigna
è belle 'a campagnola 'int'a campagna
se mangia ll'uva fravula e se tegne
'a vocca rossa comm'a nu papagno
Settembre bellu mio, tu faie vennegna!

Ma comm'addore st'aria settembrina
chest'uva doce te và 'ncapa e stona
ma 'a vocca 'e nenna mia fà chiù do' vino
quanno m"a vaso doppo nun raggione
e sò felice e me 'mbriacà 'e stu bene
Ma comme addore st'aria settembrina!

UTTOMBRE

Tu tigne giallo 'o verde 'e tutte 'o munno
ll'albere spuoglie dint'a sti campagne
cadene 'e foglie morte e vene autunno
spanne pè ll'aria addore de' castagne

Uttombre p"o magnà tu me si' caro
pecchè tu puorte 'o puorco 'int'o maciello
e caccie 'o vino nuovo do' cellaro
e vanto 'o meglio ciore: 'O friariello!

Tu che spalanche 'e porte 'e tutte 'e scole
'o quatto tu festigge san Francisco
stu santo puveriello ce cunsole
c"o pane càvere e c"o vino frisco

NUVEMBRE

Nuvembre nun appena ca tu spunte
appena 'o crisanteme mann'addore
currimmo a fà rispetto a sti defunte
purtanno nu lumino e quacche ciore

'O ùnnece festiggie san Martino
stu 'juorno so' ddoie feste cunusciute
'a primma dice c'ogne mosto è vino
e ll'ata festa è festa pe' curnute

Mese 'e nuvembre tu si' miezo scemo
pe feste tiene corne e campusanto
pe' ciore sulamente 'o crisantemo
pe' frutto 'o granato e 'o legnasanto

DICEMBRE

Bruciano 'a pigna sotto 'o fuculare
dicembre cu' st'addore dà 'o signale
ca scarrecate 'e nnoce 'o putecaro
e for'a porta tene ggià Natale

Dicembre tu si' 'a festa d"e criature
cu mille luce adduobbe chesti strate
migliare ' e bancarelle cu' 'e pasture
cu' ll'albere e palline culurate

ma chi c"o tiempe ggià a passato ll'anne
senza te n'addunà tu lle faie male
'o viecchio nun 'e conte 'e compleanne
conta ll'età Natale pe Natale.

RINGRAZIANNO A DIO

( A mio nipote Vincenzo)

Angelo 'e Dio, ciore 'e paraviso,
ma quantu tiempo mamma t'aspettato
stu viaggio t'è durato nove mise
ma finalmente ccà tu si' arrivato

Stà terra che t'ha dato 'o benvenuto
t'aperto 'e braccia 'nziem'a mamma toja,
stu munno ca t'è ancora scanusciuto
c"a nascita t'ha dato 'a primma gioia;

na mamma ca te vò nu munno 'e bene
na sora ca te tene cumpagnia,
nu pate che te porta dint'e vvene,
nu nonno che te scrive na puisia,

na casa addò tu crisce nu dimane
c'attuorno regna ammore e dignità
addò tu sentarraie l'addore 'e pane
'mpastato c"a fatica e ll'onestà

e dimme che vuò chiù nennillo mio
bello d'o nonno, core 'e chistu core,
quanno llà 'ncoppo stò a cuspietto 'e Dio
lle diciarraggio: Grazie mio Signore!

Quanno cercaie stà grazia so sicuro
ca Tu d'o cielo me sentive, Dio
pirciò che ce mannaste stu criaturo
ca finalmente porta 'o nomme mio

Tu che saie farne realtà 'e nu suonno
t'aggiu purtato ccà ll'anema mia
ma chistu core, chistu core 'e nonno
l'aggiu lasciato 'nterra c" a puisia

ce l'aggiu dato a chella criaturella,
ll'urdimo nato, pò fà pazzià
'o saccio 'o core nun è pazziella
quanno dà dinto 'o bene mio ce stà

Pecchè dimane quanno sarrà n'ommo
si 'o stesso core 'npietto tenerrà
sarrà orgoglioso 'e purtà pure 'o nomme
c"o dette 'o pate pe m'arricurdà

' O nonno

'O NONNO

Avisse arapì ll'uocchie, oj mamma mia!
Vita passata mia .... pare nu suonno!
Aiere cu''e guagliune 'nmiez'a via,
oggie nu viecchio e otto vote nonno

Io quanno parlo 'e Te mamma mia cara
ritorno n'ata vota piccerillo
e dint'o suonno quanno Tu m'appare
veco ca Tu faie 'a nonna all'angiulille

Io quanno stongo 'nmiez' a sti nepute
oj mamma t"e vulesso fà vedè
so accussì belle e nu' ll'he cunusciute,
comme vurrio ca stisse 'nziem'a mmè

P"a casa songhe otto palummielle!
Pe n'attimo nun trovene arricietto
ll'urdimo nato me fà o' cianciusiello
quann'o pàzzeo ruciulea p"o lietto

Pe mmè so comm'a tante pazzielle
e spisso tutte 'nzieme pazziamme
m'ha ditto aiere 'o chiù strappuliatielle:
O no', ma pure tu tenive 'a mamma?

Io nun l'aggiu risposto, m'ha guardato
e tale e quale comm' ' a dduje cumpagne
cu' 'e ddoje braccelle forte m'abbracciato
e pò m'ha ditto: O no', ma pecchè chiagne !?

ME SENTO SULO

So triste ' e strade e pure è primmavera
c"o viento manco 'a fronna mò se move
che luna mamma mia splenne stasera
ma dint'o core mio ce chiove

Nun sento manc'addore de' ciardine
nun sento chiù 'o profumo 'e chillu ciore
migliare 'e gente passano vicino
e io tengo 'a sulitudine 'int'o core

Io comm'a 'nombra mò vaco cercanno
l'ammore ca s'è sperza 'ncopp 'o munno
'a gente c"o destino và pazzianno
ma pe stà vita mia chiove a zeffunno

Strade affullate, core 'e mille voce
che strillano 'a speranza d'o dimane
e io sempe sulo me trascino 'a croce
cerco n'amico ca m'astregne 'e mane

Sultanto stà puisia me dà 'a quieta
è ll'unica sincera amica mia
che quanno vede sulo stu pueta
'o vene a ffà nu poco 'e cumpagnia

MALINCUNIA 'E NATALE

Io te ringrazio Dio c'aggiu campato
pe sentì n'ata vota addore 'e pigne
Natale! Par'aiere ... ggià è turnato
saglio a piglià 'e pasture 'int'o suppigne

Se so 'ngiallute 'e carte 'e sti giurnale
ca io sgravoglio 'a dinto sti pasture
quante ricorde tornano a Natale
quanno sti figlie nu' so' chiù criature

Quanno 'e tenevo tutte piccerille
attuorno a stu presebbio c'ammuina;
Papà se more 'e friddo ' o bambiniello
miettele 'o ciucciariello chiù vicino!

Da quanno lloro se sò alluntanato
'o friddo 'ncuollo 'o tene mò papà
songh'io ca tremmo 'e friddo senza 'o ciato,
'o ciato lloro pe mme fà scarfà

E mmò 'a vigilia 'npunto mezanotte
io stongo sulo cu"a cumpagnia mia
guardanno 'o bambiniello sott'a rotta
chiagnenno ce tenimmo cumpagnia

Guardammo 'a dint''e lastre d"a fenesta
che ciocca 'a neve argiente de' bengale
E sempe triste chiagnere a na festa
ma è assaie chiù triste chiagnere a Natale

'O CHIU' SINCERO AMICO

Nun te meraviglià quanno te dico
ca io songo ricco senza tenè niente
pecchè tu ll'he sapè, tengo n'amico
ca me dà 'o bene suoio sinceramente

Me dà sultanto e nun me cerca niente
e dint'a casa mia pe 'nmiez'e figlie
spanne cunforto, pace e sentimente,
me sape sulo dà buone cunsiglie

E senza mmiria, senza giulusia
chiagne 'nnanze 'o tramonto 'e na staggione
e se cummove quanno na Maria
'a sente annummenà dint'e canzone

V"o giuro cu st'amico so tutt'uno
e notte e ghiuorno me fà cumpagnia
nun 'o vaco dicenno maie a nisciuno
ma è isso che m'ha scritto stà puisia

e comme dice chillu ditto antico
" Truove n'amico e truove nu tesoro"
Embè si 'o vvuò sapè chi è st'amico
è chillo ca me sbatte 'npietto .... è 'o core!

SENTIMENTE 'E PUETA

Pueta nun s'addiventa, ma se nasce
Chi è pueta, chi accussì se chiamma,
era pueta ggià dà dint''a 'e fasce
e primmo ancora, ggià dà cuorpo a' mamma

Pueta, no, nun è chi sporca carte
è chillo che cunosce ch'è 'o dulore,
è chillo c'ogne vierzo ne fà arte
e 'nfonn''a penna 'npietto dint''o core

è chillo che nu' tene giulusia
che gode sempe p"o valore 'e n'ato
che chiagne quanno leggie na puisia
e soffre quanno vede 'e suffrì all'ate

Pueta è chi cunosce 'o marciappiede
e ssape 'e sufferenze e ll'emigrante
chi scrive e chesti cose nun 'e vvede
credite a mmè è sulo mesteriante

Pueta, nmo, nun è chi parlà 'e mare
che scrive 'o vierzo sulo pecchè è blù
ma nu poeta parla 'e marenare
che ghiesce a' notte e nun ritorna chiù

Pircuò pueta mio nu' parlà 'e sole
pecchè è ggià ricco 'o ssaie ch'è tutto d'oro
spienne pe stu paese ddoje parole
pe stà città cu' ' a poco a poco more

Si tu sì overamente nu poeta
parla 'e stà gente ca nu' pò campà
tiene nu core 'npietto è nun è preta
comm'a stà luna ca tu vuò cantà

Pirciò pueta mio famm''o favore
trase cu''e vierze tuie dint''a sti vasce
e lassele 'o salotto do' signore
che cu"a miseria nosta campa e pasce

'E PANNE SPASE

For'e balcune 'e Napule
sti panne appis 'e fune
te fanno capì 'o popolo
si magna o stà diune

e sott'o sole lùcene
sti pezzecaglie spase
addò se leggie 'a storia
dà gente 'e dint'e case

e nun ce vò nu strologo
pe leggiere stu male
sti panne che s'asciuttene
so comm'a nu giurnale

'o terzo piano sbattene
panne senza culore
addò stà 'e casa 'a vedova
'e nu fravecatore

cadenno 'a copp'a ll'anneco
'a rummanette sola
trè figlie d' aità tennera
che vanno ancora a' scola

sti panne che s'asciuttene,
trè maglie, tre cazune
senza vulè te scrivene
'a storia 'e trè guagliune

e dint'o stesso viculo
appis'a nu balcone
s'asciutta 'e nu zì prevete
'a vesta e nu cazone

stà 'e case llà 'a perpetua
'e chillu parrucchiano
ca pe pavà 'o servizio
lle dà na cosa mmano

ogne semmane 'o prevete
ce saglia puntualmente
scenne cu' 'a vesta candida
ma 'a dinto chiù fetente

so tutte euale 'e storie
so sempe tale e quale
sti panne spase a Napule
so comm'a nu giurnale

Chillu balcone all'angulo
addò ce stanno 'e piante
stà 'e casa donna Placida
mugliera 'e navigante

dè figlie llà è na fabbrica
ll'urdomo tene n'anno
cu' 'a panza annanze, gravida
' e pannuline spanne

quann'o marito 'o sbarcano
pe quacche ghiuorno appena
'o ssape ggià stu vicolo
chess'a è rimasta prèna

e dint'a chistu viculo
appesa a chesta fune
se legge chella Napule
ca fotte e stà diune

Vedite! Stà pe chiovere!
Signò, trasite 'e panne!
Chiammate a donna Amalia
stà ggià schezzechianne!

e si se 'nfonno'o sabbato
'o panno ch'è asciuttate
dimane ch'e dummeneca
nun ce pò stà ' a cagnate

Pe trasì 'e panne 'e femmene
affollano 'e barcune
e 'o segno d' 'a miseria
sparisce 'a copp'e fune

S'è 'nchiude 'o libbro 'e storia
'e tutto nu quartiere
pecchè mò vene a chiovere
e trasene 'e bandiere.

L'ABORTO

('O diario d"a criatura)

(Premio Papa Paolo VI)

15 giugno :
Sott'a stà luna 'nterra a chesta rena
addò 'o silenzio sceta 'npiett'o core
mamma e papà se sò vulute bene
gudenno fin'a ll'urdimo l'ammore

mille prumesse trà nu vaso e n'ato
pe stu mistero che se chiamma vita
cu ll'attimo chiù doce dò criato
so stato cu st'ammore cuncepito

30 luglio :
Mammà oggie ha cumpiuto sidece anne
è bella e fresca comm'a na viola,
è 'o primm'ammore e nun cunosce affanne,
è na criatura che vvà ancora a' scola

Pure papà è proprio nu guaglione
nu raggiuniere appena diplomato
cu 'e guagliuncielle và a ghiucà 'o pallone
e cerca 'a mille lire ancora o' pate

15 agosto:
Sarraggio masculillo, ggià io 'o saccio
e comma ncopp'a pianta cresce 'o ciore
io stò spuntanno cuscetelle e braccie
dà gruosso forse faccio 'o calciatore

30 agosto:
Mammina oggie è ghiuto addò duttore,
io aggiu pensato; nun avè appaura
io nasco ampresso nun te dò dulore,
mammà o' saie che so ggià na criatura?!

Chisà pecchè mammà nun è cuntenta
'a notte 'a sento chiagnere, pecchè
pe mmè sarrà na gioia chillu mumento
e essa se dispera, ma ched'è?

8 settembre :
Oggie papà e mammà se so 'ncuntrate
mammà l'ha ditto, aspetto na criatura
e po' chiagnenno forte s'abbracciato
e io aggiù avuto n'attimo 'e paura

e pò papà l'ha ditto: Ammore siente,
nu' so manche trè mise può aburtì
Io che sentevo nun capevo niente,
m'addimmannavo, ma che vonno dì ?

10 settembre :
Oggie me sento stanco stò suffrenno,
tengo nu friddo 'ncuollo, ma pecchè?
Mammà m'he acciso ovvì che stò murenno
m'he dato 'a luce e nun m"a faie vedè!

FIGLIO MIO!

Ched'e a papà te veco tranulate
da tiempo a mmo', nun te capisco chiù,
si nu' parle cu mmè che te so' pate,
tu m"o vuò dì, cu chi parlà tu? !

Tu nun parle, me guarde sulamente,
m'annascunne quaccosa, m"o vuò dì?
Tiene vint'anne he essere cuntento
io nun te vularrie vedè accussì!

Si vuò quaccosa, annanze a ttè mò stongo,
parle bello 'e papà, sfuogo cu' mmè
si vuò stà vita, 'a vita mia t"a dongo
però accussì nun te voglio vedè

Ma comme, che mme dice, t'he pugnuto,
ma djmme figlio mio, ma comm'e stato?!
C"o ciato 'e mamma toia tu sì crisciuto
e mmò tu staie accussì, sì nu drogato!

No, nun ce avive dà stù dispiacere
pecchè tu 'o ssaie che nù ce 'o mmeretammo
io che fatico d"a matina a 'sera
e a' casa toia t'aspetta llà na mamma

'O ssaie ched'è na mamma o t'he scurdato,
na mamma avesse stà 'ncopp'a nu trono
e tu ll'he dato chesta curtellata .....
Chi santo figlio mio te dà 'o perdono ?

Tuorno p"a bona strada figlio mio
io nun te 'nganno 'o saie te so' pate
perdoname t"o dico 'nnanze a Dio
senza me n'addunà io aggiu sbagliato.

CANE SENZA PADRONE

(Furmaggino)

Tu sì senza padrone e senza nomme,
io t'aggiu battezzato <Furmaggino>
e comm'a mala sciòrta stà pè ll'omme
pure pe 'cane esiste nu destino.

Oj cacciuttiello quase tutt'e sere,
sempe a' stess'ora, sempe puntualmente,
spùnte d"o marciappiere sempe allere,
comme m'avisse dato appuntamente.

Sì nu bastardo, t'accuntiente 'e tutto;
n'uosso spurpato, na tuzzulella 'e pane,
nun saccio si sì bello o pure brutto
ma sì' fedele comm'a tutte 'e cane

Nu surzo d'acqua fresca d"a funtana,
me mùove 'a coda p"a riconoscienza
e me faie festa pò m'allicche 'a mano
e pò t'accuccie 'nterra cu' pacienza

Te guardo e mme faie ll'uocchie d"a priezza,
nun parlo e ggià saie chello che te dico
e triemme'e carne sott'a na carezza
riconoscente che te songo amico.

Comm'a n'amico viene appuntamente,
sempe 'a stess'ora, quase tutt'e sere
ma daie amicizia toia pe' senza niente!
Quanno nun viene me faie stà 'npensiere

e te vengo a cercà vico pè vico,
p'ogne puntone, pe ll'angule d"e strate
nun aggiù canusciuto maie n'amico
sincero, buono e disinteressate

Povero cacciuttiello amico mio
pe' tte nu paraviso nun ce stà,
overo o nun è overo che stu Dio
nun ce l'ha dato 'o posto a' fedeltà ?!

ACROSTICO

Gioia e cumpagna 'e chesta vita mia
Io senza 'e te comme putrio campà
Appena nun me faie chiù cumpagnia
Nemmeno 'o sole chiù me fa' scarfà
Dimane si sta penna m'abbandona
Osi me lassa chesta fantasia
Muresso io pure 'nziem ' 'a sta canzona
E mme sperdesso pe 'na scura via
Niente me pò sanà sta malatia
Io so mpazzuto 'e te cu sentimento
Comme me faie felice tu puisia
Ogn'attimo ca viene so' cuntento

Ritorna all'indice di: