Poesie: Vincenzo Giandomenico

Poesie tratte dalla raccolta poetica:

" Pazzianno c''a Penna "

Me manca 'o tiempo 'O pueta L'avvertimento Ll'urdimo mumento

Palpito 'A miseria 'E sanzare (Ischia) Tutto passa

'O scippo E vvote.. 'A casarella mia 'O terremoto

Poesie tratte dalla raccolta poetica:

" 'O Rilogio da'' Vita "

'A violenza 'E bancarelle Si succedesse 'A società d''a sventura

Lassateme'n pace! Si turnasse nu messia Ll'urdime e ll'anno 'O palcuscenico

Prugresso 'A libertà Ll'urdimo pruciesso

Poesie tratte dalla raccolta poetica:

" ' O scugnizzo 'e Napule "

'A festa 'e Napule 'O pazzariello Si io fosse 'a befana 'A pazienza 'e Pullecenella

Ll'urdimo festino Lettera 'a na mamma Natale senza pate Vulesso nu ciardino

E ricorde 'A grazia Augurie, figlia mia! E riturnata Primmavera

Nun si stata piccerella Caro Toto'

Me manca 'o tiempo

Io sapesso fà mille poesie,

io sapesso fà mille canzone,

io, si 'o tiempo tenesso, sarrio,

forse Dante o Alessandro Manzone.

Songo invece 'na sfelenza 'e pueta,

pecché torno a' casa, già stracquo,

quatte figlie me corrono arreto,

chi vò 'o pane, chi 'o bicchiere cu ''lacqua!

'O chiù gruosso cuntento, me dice:
aggià avuto 'nu diece papà!
e m'accorgo ch'è tanto felice,
pecchè corre e mm'he vene a vasà!

Ma pe' scrivere 'o tiempo, addò 'o piglio?
Ma 'nu pizzo queto, addò stà?
Quanno 'a sera ritorno in famiglia,
trovo pronto e m'assetto a mangià!

'Nu mesale frisco 'e bucato,
sei bicchiere; a butteglia d"o vino
e dd'o furno n'addore 'e stufato,
c'a profuma tutt'a cucina!

mentre aspetto, aizo 'o bicchiere
e mme faccio 'nu surzo 'e Gragnano
e muglierema porta 'a zuppiera,
c'o stufato d'a carne e patane.

Comm'e bella appicciata 'e calore,
sparte 'e parte pe' dint'e piatte,
io nun mangio e mme sazio cu'lloro
loro mangiano e i'me faccio chiù chiatto!

e mme guardo sti figlie e pò penzo;
stongo stanco, ma songo cuntento....
e mme sento tranquilla 'a cuscienza,
d'a fatica d'o 'iuorno currente.

E pensanno, pensanno, pensanno
e bevenno, bevenno, bevenno
scenno 'o velo d'o suonno e m'appanne
tutt'a vista e mme soso durmenno

e durmenno, sento ancora alleria
c'a famiglia p''a casa me stenna
piglio suonno e nun scrivo 'a poesìa
e s'addorme cu' mme chesta penna!

'O Pueta

....ne straccie foglie e nne cunsumo penne
e passo 'e vote 'e notte chiare chiare,
pazzianno cu'e canzone a vienetenne ...
annumenanno, luna, sole e mare!

Povera luna, tu pe 'stu pueta
cagne culore quase ogne mumento
si' tale e quale comm'a 'na cumeta,
tu cagne tale e quale comm'o viento!

Diviente rossa, verde, paunazza,
addirittura po 'te vieste a lutto,
nun saccio comme nun si 'asciuto pazza,
forse, tu divierte, chest'è tutto!

Si 'tale e quale comm'a 'nu mellone,
si 'sana, si 'nu quarto, si ammità!
è comm'a 'nu curtiello sta canzone,
te sparte comme vò pe' te cantà!

Me pass'a notte 'int'a 'nu mumento,
io quanno stongo annanze 'a scrivania,
'a notte corre, comme corre 'o viento!
Però si m'abbandona 'a fantasia,

'o vierzo esce fore, tutto stuorto,
brutto stravierzo e pure scartellato,
appena nasce e comme fosse muorto,
pecchè io accido cu 'na cancellata!

'e vvote, doppo quase 'na nuttata,
nemmeno 'nu sfelenzo 'e vierzo è asciuto,
e allora faccio 'o cunto d'a mesata,
ca doppo diece 'iuorne se nè ghiuta!

L' Avvertimento

Io cerco scusa a don Rocco Galdiere,
io non mi credo affatto l'Alighiere,
don Liberato, voi mi scuserete,
io songo 'o chiù sfelenze d'e puete!

Quanno è 'a matina scrivo 'na canzone
e quanno è 'a sera scrivo 'nu sunetto,
nun me lusingo, è sulo pè passione,
Pecchè io 'e scrivo, 'i 'e metto 'int'o cassetto!

e quanno quacche vvote sto nervuso'
' e piglie 'a lla' 'i 'e leggo tutte quante
nun primma avè cercato mille scusa,
'o rrè 'e tutt'e puete, messer Dante!

Io ve ripeto, scrivo pè passione,
e nno, cu 'na speranze d'o guadagno,
pure si quccheduno cu'e canzone
s'ha fatto 'a villa a mmare, nun me lagno!

Si 'o vierzo me riesce, me cunsola,
pecchè me fà pruvà ched'è l'ammore,
stu core mio ca nun è ghiuto a' scola,
se sente chiù struito 'e 'nu duttore!

Si 'a rima quacche vota me difetta,
'i 'a metrica, lasse a desederà,
io ve cunsiglio 'e nun me dà chiù retta,
'nghiudite 'o libro e ghiateve a cuccà!

'Ll' urdimo mumento

Che ffaie 'mpalata ccà, sott'a stà porta!
Viene vicino a mme, dimme quaccosa ...
io stongo allero, ovvì, c'a nu 'me 'mborta;
tanto, campà e murì è 'a stessa cosa.

Pè quanto tiempo inutile, aggiù perzo,
me sò ridotto a st'urdimo mumento;
Ma niente l'aggia scrivere stu vierzo,
'o voglio rimmanè pè testamiento!

I 'da stà penna, no, nun vullarrio,
fà, scrivere tristezze e cose amare;
doce, vulesse, rimmanè l'addio
a tutt'e cose ca me songhe care!

Ma tu si fredda, muta, indifferente,
tu nun me puoi capì, pecchè nun saie,
comme felice sò, chisti mumente,
ma che rimmango ccà, diebbete e guaie?!

'Nu segno 'e lutto, vedarrà sta gente
e 'na si loca, abbascio a s'tu portone ...
è muorto ? E diceranno certamente:
Se sfitta 'a casa, ma quant'è o pesone!

Ma quanno passaraggio 'pe 'stu vico,
tirato 'a duie cavalle ammartenate,
'o canteniere chiagnarrà st'amico,
pe' quante votte 'e vino, l'ha 'ngignate!

Nun me ne vaco, no, ma io m'avvio,
pirciò pariente mieie, pecchè chiagnite
v'aspetto tra cient'anne, 'nnante a Dio,
diciteme, pirciò, quante ne site?

V' aspetto cu' pacienza e vve prumetto
ca me farraggio amico a san Gennaro
pecchè lle scrivo 'o vierzo 'e 'nu sunetto,
ca me darrà 'na casa a rriva 'e mare

I 've saluto, addio, diebbeto e guaie,
ve lasso, pecchè vò accusì sta sorte!
Te si 'ncantata, embè, ma mò che ffaie?
e ghiammuncenne alleramente, morte!

Palpito

Pecchè nun te faie viecchie, core mio!
ma 'o tiempo, sulo 'a me, se fà sentì ;
si tu 'a pensasse comme mo' a pens'io,
nun me facisse, tu suffrì accussì !

Nun me mettisse 'ncapa sti pensiere,
ca maledico 'o sole si accumpare,
io cerco pace 'a st'ati primmavere,
e tu me dai veleno e morze amare!

Stanche chist'uocchie miei nun so' chiù chille
me l'ha cagnato'o tiempo, oi core, ovvì !
ca mò me luce argiento 'int'e capille
n'ombra sultanto n'ombra, mò songhì !

Chell'è guaglione e si nce passa annante,
nun ce pensa nemmeno, è indifferente,
nun'o pò immagginà, comme te schiante
vedennela accussì, bella e 'nucente!

Io soffro e chiagno e m'annasconno 'o chianto
stu chianto 'e chesta tarda giuventù,
quase scornuso 'e stu deritto santo!
Pecchè vint'anne nun è tengo chiù ?....

'A miseria

Quante si 'ddoce e 'bella miseria 'mia,
me viene appiesso 'a quanno i 'so 'nato,
m'he fatto sempe bona cumpagnia,
nemmeno 'nu minuto m'he lassato!

'A gente se n'accorge 'mmiez'a strata
ca i' stongo 'nziem'a tte e 'nun sto sulo,
pecchè porto 'na giacca arrepezzata
e 'nu cazone cu' 'ddoie pezze 'nculo!

Nun mme chiammano chiù c'o nomme overo,
me so' ridotto sulo ossa e pella,
pirciò tutt'e ll'amice d'o quartiere,
me chiammano accussì: Miseria bella!

Io quanno mangio ca tu me l'accunsiente,
io metto 'nu piatto pure a tte,
mia moglie poveretta, dice siente:
nuie simmo duie, pecchè ne miette tre?

E 'mbè! Me so' talmente abbituato,
si me mancasse, nun me truvarrio
io c'a miseria me so' affezzionato,
tiro a campà e ddico: Assà fà Dio!

L'anno passato me muretto 'a zia
e me lassaie 'nu gruzzolo d'argiento
e pè tre mise, tu miseria mia,
l'abbandunaste, tu, chistu pezzente

e io sentevo 'e te' na nustalgia,
pecchè mangiavo tutt'e mieziuorne
addivintaie'na zoza 'a vita mia
e mme mettevo quase, quase scuorne.

Nun me lassà, pirciò, miseria bella,
astrignete cu 'mme, stamme vicino,
'nu piezzo 'e pane frisco, ddoie murzelle
'na vranca auliva e 'nu litrotto 'e vino!

Me fanno sfeziosa 'na serata,
m'assetto sodisfatto 'e st'appetito,
pecchè stu poco m'haggiu conquistato,
facenno a pònia 'i a càvece cc'a vita!

miseria mia songh 'io ca nun te lasso,
tu nun m'abbandunà, miseria bella,
pecchè tu ll'he sapè, cu 'tte me spasso,
io 'nzieme a tte, m'ha porto annanze 'a pella!

'o iuorno ca sarrio n'ommo 'e denare
pecchè perdenno a tte, perdesso tutto,
t'ho ggiuro quant'e certo san Gennaro
si tu me lassa, io me vesto a llutto!

'E Sanzare (Ischia)

D'o mese 'e marzo, abbascio e vapurette,
mille sanzare stanno a vv'aspettà,
abbascio o' puorto stanno ll'à, d'e sette
e cercano 'e fà tutto p'affittà.

Appena d'o vapore vuie sbarcate,
se fanno attuorno a vvuie pe' cumbinà:
Signò , t'enimmo case a buon mercato,
ll'acqua non manca, vicino o' mare stà!

Signò, eccellenza, nun ve ne pentite,
Dottore bello, stateme a' sentì!
Vuie in famiglia, tridece ne site,
'o quarto è gruosso, nce ponno capì!

E ve fanno sentì assai importante
chi ve chiamma duttore, chi eccellenza
sette ve ne stanno arreto, quatte annante,
mentre 'nu pare fanno 'a riverenza.

Statene certo, vi lasciano soltanto
quanno cu' lloro fate il compromesso;
un milioncino subito in contanti;
ddoie stanzulelle i 'o pucurillo 'e cesso!

Tutto cuntento a Napule turnate,
stu buco 'e casa ca ve costa caro,
voi dite ai vostri amici: Ho affittato,
un bell villino con la vista al mare!

Ma appena 'o primmo 'e luglio ritornate,
c'a pasta, 'a frutta e ca lattina è ll'uoglie
chelli sanzare, ancora ll'à 'e truvate,
chelli ca v'hanno miso 'mmiez'e 'mbruglie!

Quaccuno 'e loro già ve tene mente,
m'appena ca ve vedono 'e passà,
'e sentite alluccà : Sti Ddie 'e 'fetiente,
vurrie sapè che ssò venute a ffà!

Tutto passa

...E passa ll'ora, 'o juorno,' o mese, ll'anno
e tutto tutto passa 'ncopp'o munno!
che simmo, ma che simmo, m'addimanno,
si 'a 'na bell'ora, tutto scenne 'funno!

Iere è passato e oggi sta passanno,
e tale e quale passarrà dimane,
biate, chi a chest'ora stà campanno,
senza cuntà, minute, iuorne e semmane.

Invece, io conto c'o rilogio mmano,
ogn'attimo, ogne minuto, ogne ora,
sti sferre se ne vanno chianu, chiano
e assommano a stà vita n'anno ancora!

E penso 'a bionda, ' a rossa, 'a brunettella,
quanno c'o ciato, arriciatavo 'o ciato
'e n'ata vocca profumata e bella!
Penso e vint'anne mieie ca so' passate!

E c'o pensiero corre 'a stu passato,
e ddo' raggione 'o tiempo ch'è 'o chiù forte,
e cu pacienza aspetto rassignato,
chest'urdima avventura mia, 'a Morte!

'O scippo

Si Mariscià, vuie m'it'arrestato,
però ve prego, luvateme 'e manette,
io nun mm'ho nego, no,si aggiu arrubbato!
Songh'io ca scippo 'abbascio 'o pallunetto!

Papà, per infortunio sul lavoro,
lle manca 'o vraccio destro, fino 'a spalla
e tengo 'a mamma mia malata 'e core,
Campammo 'int'a 'na stanza ch'è na stalla!

Diecie anne, io tenevo, ero 'uaglione
e mm'arricordo 'cu malincunia,
ca faticavo 'o bar o' chiatamone,
Pe purtà quacche llira a' casa mia!

e mentre all'età mia e piccerille
ievano a' scola pe' s'e putè 'mparà,
io sotto all'acqua, comm'a 'nu canillo,
io purtavo 'o cafè, pe' guadagnà!

Dde' sei a' matina, fino e' ddiecie 'a sera
c'o sole 'austo e c'o friddo 'e vierno
e cu 'nu pare 'e scarpe rotte e' piere ...
v'ho giuro, mariscià, era n'inferno!

Io me scurdaie 'a faccia 'e mamma mia;
Sentevo 'a voce soia quann'a matina,
ca me scetava! No! Nun, è 'na buscia,
desederavo d'esserle vicino!

Sùsete, Gennarì 'è tardo, bello 'e mamma!
Nun 'a vedevo , sentevo sulo 'a voce,
mò m'arricordo sulo 'ca me chiamma!
ma tutt'e dduie purtammo 'a stessa croce!

E nun m'ha scordo chiù, no, chella sera,
ca io truvaie a mamma mia scetata,
cu 'lluocchie stanche, me guardaie e piere,
e mme vedette 'e scarpe arrepezzate

e mme dicette: Gennarì dimano,
tu tiene 'e scarpetelle rotte e' piere,
è sabbato, tu pigliarraie 'a semmana,
mamma toia arrangia, nun te dà pensiere,

accattete 'nu pare ' e scarpe nove,
tu tiene e piere 'nterra, figlio mio!
commo può cammenà, tu quanno chiove
e si t'ammale tu ... non sia maie Dio!

Nè Mariscià, v'ho giuro, m'addurmetto
e tutt'a notte 'e scarpe me sunnaie;
a mocassino, cu'e laccie, a stivalette
Da chistu suonno, mamma me scetaie

e ghietto a faticà tutto cuntento
e ascietto a cunsignà vinte cafè,
quant'acqua ca faceva, ma che viento,
tenevo 'e mmane fredde comm'acchè!

Cu 'ddoie guantiere, pe' passa' ' e rimpetto,
'na machina passanno me vuttaie,
e tutto cosa 'terra m'he cadette ....
murì, avrio vuluto, quanno 'o guardaie!

Chiagnenno ietto 'o bar, cu' paura,
'o masto me guardaie e mme dicetto:
Stasera nun te pava, p'a ruttura!
E pe 'nu pare 'e scarpe, io chiagnetto!

Turnaie a' casa stanco e mamma mia,
chiù stanca 'e me, e piere me guardaie,
nun saccio, mariscià quale buscia,
io triste e penseruso ha raccuntaie!

Però quanno 'a matina, mm'he scetaie,
sempo c'a stessa voce 'e mamma mia,
'o core 'npietto a mme, me cunsigliaie,
si tuorne 'o bar, è proprio 'na pazzìa!

e cu 'e pensiere 'ncapa, frasturnato,
d'a casa ascietto, si, chella matina
e cammenanno comm'a 'nu stunato
io me truvaie abbascio margellina

e avvistaio ddoie straniere che rimpetto
ca se facevano 'e fotografie,
vicino a lloro steve 'na bursetta
e senza pensà manco a mamma mia ...

Comm'a 'nu lampo, fuie n'attimo e sceppaie,
senza guardarme attuorno e pò fuietto,
e nun sentetto 'a gente c'alluccaie,
e niente, niente chiù io pò vedetto!

e mariscià, io ietto addò chianghiere
nun saccio quanta carne m'accattaie,
dicetto a mamma mia: oj mà, stasera,
'o masto tutto cosa mè pavaie!

i'e sentetto 'e durmì tutt'e felice,
io sulo mariscià', io nun durmetto,
si cundannarme 'o codice v'he dice,
mo c'aspettate! Mettiteme 'e manette!

E vvote ..

Chi e' vvote dice : fà 'na vita 'e cane!
Diciteme 'nu poco che vvò dì!
Io tengo 'nu canillo 'o voglio bene,
doppo mangiato, beve e fà 'a pipì,
pò, se ne saglie 'ncopp'a 'nu divane
se sguarra, nchiude ll'uocchie pè durmì!
Mannaggio 'a morte, schiarano semmane,
ca io me cagnasso proprio cu' Fifì !

'A casarella mia

Che posso ormai descrivère
sulla mia casa, haimè!
si 'e bombe m'aittaiene
'nterra, 'o quarantatrè,
mò allerto so' rimaste
sultanto ddoie putrelle,
una era 'a stanza 'e lietto,
e n'ata 'a cucenella!

'O terremoto

Trèmmanno 'a terra, cade 'nu cavallo
e dùndùleanno e lume 'nmiez'a strata,
se stutano e s'appicciano a' intervallo,
sbàttene 'e porte, 'nfaccia e' ferriate

'int'a 'na crepa, cade 'int'o vvuoto,
mentre curreva, 'nu povero canillo,
allucca n'ommo: Fuite 'o terremote!
Donna Rusina svene e dà 'nu strillo!

'Nu viecchio appuiannase 'o bastone
tremma cu 'e llabbra, dicennese 'e preghiere,
e a 'nu palazzo se stacca 'o curnicione,
atterrannele vivo, capa e piere!

Sulo 'na mano, esce 'a fore e' prete
ancora viva, pecchè tremma ancora,
cu 'na curona strette 'nmiez'e ddete,
ch'è ll'urdima speranza pe' chi more!

'Na femmena currenno, forte chiamma,
'o figlio ca pazzèa 'nziem 'a n'amico,
e songhe ciento, mille 'e vvoce 'e mamma
ca se chiammano e figlie 'int'a stu vico!

'Nu tubbo 'e ll'acqua all'angule se schiatta,
'na puzza ' gas dint'allaria saglie,
'ncopp'a 'nu titto miaula 'na 'atta
'nu ciucciariello abbandunato raglia!

'Nu fuia fuia 'e gruosse e piccerille,
'a morte fà paura a tutt'e quante,
se senteno dd'e case mille strille,
chi corre 'nmiez'a strata e chiamma e sante!

'Na vecchia dice: Chiste, so' e peccate,
c'o terremoto 'nce vo' castigà!
'o patreterno 'ncielo s'è stancato,
Nun tene fede chiù, l'umanità!

Madonna bella! Mamma Addulurata
io tengo a ninno sulo, salvammillo!
currenno fà 'na mamma disperata,
dateme 'a forza pè ghì addù nennillo!

Intanto cade 'o lato 'e nu palazzo
trascenannese 'nterra, gente e mmura,
'na voce vene 'a copp'a 'nu terrazzo:
mammà viene me piglià! è 'na criatura

'Sta mamma corre 'int'a 'nu purtone
e vvà contro currente all'ata gente,
e chi se stregne 'nbraccio 'nu guaglione,
e chi se porta robba 'nsalvamiento

Sagli 'nciampanne e arriva o' primmo piano,
me pare ca stà 'ncielo chesta porta,
nun lle paruta maie tanta luntana,
sta tesa 'e scala, addò stà pronto 'a morte!

Arriva, arape e allucca: Figlio mio!
l'abbraccia 'o vaso e fà brutte pensiere
e nun lle resta 'o tiempo 'e chiammà a Dio,
ca se sprufonte 'a terra 'a sott'e piere!

e niente vede chiù, è tutte scuro....
però sente ddoie braccia, strette, strette,
c'astregneno chiù forte p'a paura,
e 'nu respiro ca ll'affanno 'mpietto!

Figlio mio bello, gioia 'e mamma toia
'nce venene a salvà, bello 'e mammà!
ma sente d'allentà, sti braccie soie
e nun 'o sento cchiù 'e respirà!

'Na pala scava, e a tre metre 'nfuto
trova dduie cuorpe stritte, uno cu' n'ato
vocca, cu' vocca! Vedennele perduto,
forse 'o vuleva dà, ll'urdimo sciato!

'A violenza

(a Claudio Miccoli ucciso per violenza)

Mò , me dicite, faie 'o puliticante,
nò, ve rispongo, è sulo pe' cuscienza,
che parlo 'e nu guaglione 'n miez'a tante
che'a perzo 'a vita acciso pe' violenza

N'atu guaglione è muorto aieressera,
ma che' mburtanza tene nu partito,
pe' chi nun vede chiù na primmavera,
pe' chi a vint'anne nce appezzato 'a vita.

Primma 'e murì felice he fatto a n'ato
pecchè stu testamente he fatto tu;
" Io voglio dà chist'uocchie a nu cecato,
pecchè stà luce nun me serve chiù " !

Lùcene st' uocchie, mò, ggià 'nfronte a n'ato,
st' uocchie che mamma toia te dette a te,
tu a n'atu figlio 'e mamma nce l'he dato,
che 'o sole, 'e stelle e 'o mare pò vedè.

Sperammo che chist'uocchie vedarranno,
pace, giustizia, libertà e cuscienza
e 'a giuventù campà cu 'meno affanno,
vulerse bene senza chiù violenza.

Avè chiù fede dint'a sti preghiere,
sentì chiù gioia pe'na 'iurnata 'e sole,
vedè d'ascì dà mille cemmeniere
'o fummo d"e fucine e nò e pistole.

Pirciò do' cielo mò, schiarece 'a via,
tu che cunusce 'e pene d"a violenza,
'mparece almeno a dì n'Ave Maria
fancella fà cu' Dio stà cunuscenza.

Mentre murive, mamma toia vicino,
dicette : so' felice 'nnante a Dio,
che io nun songo 'a mamma 'e l'assassino,
ma songo mamma a te, Claudio mio!

Mentre stà santa 'nfronte te vasava,
tu ha regalaste ll'urdimo surriso.
Na chiorma d'angiulille te purtava
st'anema toia 'e vint'anne 'n paraviso

'E BANCARELLE

'Nce scetammo ccà 'a matina,
ma 'a fatica nun se vede,
ccà se trova l'officina
sulo 'ncopp' 'e marciappiede.

'Ncopp' ' e libbre a ghietta' sanghe,
pe' vint'anne cu' ' a cartella
e mò invece 'e sta' 'int' 'e banche,
stammo aret' 'a bancarella.

Nce arrangiammo 'n miez' 'a strata
e nce chiàmmano abusive,
ma chi campe p' 'a jurnata,
nun abusa, sopravvive!

E vennimmo braccialette,
'e pellicce americane,
accendine, sigarette ,
'e magliune fatt' 'a mane.

'N miez'a tante cap' 'e 'mbrelle,
'nmiez'a tanta roba esposta,
'ncopp'a chesti bancarelle
vuie truvate 'a famme nosta.

Nce mannate carcerate
addò 'o stato nce fà scola,
doppo n'anno nce cacciate
e facimmo 'e mariuole.

Ma dich'i' che se cumbina,
ccà 'a fatica nun se vede?
Ccà truvammo l'officina
sulo 'ncopp' 'e marciappiede!

Si l'Italia è nu stivale,
accunciate pure sotto ,
nun vedite che stà sòla
ve fà acqua, è tutta rotta;

Aspettammo nu scarparo
già d' ' o tiempo 'e Masanielle,
p'accuncià sott' ' o stivale,
nun tenite 'e semmenzelle?

'Si succedesse

Se vede 'o pilo e nun se scorge 'o trave,
scandele gruosse se mettene a tacè,
'o gruosso sbaglia e 'o piccerillo pava!
Chist'è 'o paese d'o rullè, rullè.

Nu deputato ca stà o' parlamento,
c'arrobba ca 'ntrallazza e fà dènare;
'ngalera nun và maie stu Ddio e fetente,
gode l'immunità parlamentare

Nu sinneco c'arrobba a nu cumune,
'ntrallazza nu prefette 'e pùlezzia,
spariscene d"e banche meliune,
e 'a chiesa arrobba 'ncopp'Ave Maria!

'O fesso, chillu llà ca pava 'e tasse ,
'o vuò truvà! Stà dint' all'officina!
Isso fatica, l'autorità se spassa,
cu 'e sorde 'e chisto onesto cittadino.

Cu 'e sorde sovvenzionane e partite,
furmate 'e truffatore e delinguente,
ca tale e quale comm'a parassite,
zùchene 'o sanghe d"e pòvera gente!

Comme vurrio vederlo, ammanettato,
sentì na voce ca dicesse a' gente:
vedite chist'è n'ommo c'arrubbato,
mò và 'ngalera e steva o' parlamento!

Si tutto chesto overo s'avverasse
Montecitorio scumparesso a' llà,
e nun ce stesso chiù chi guvernasse,
chistu paese 'e merda ca sta ccà!

Invece cammenanno cù stu passo
facimmo a gara a chi pò chiù arrubbà
Chist'è 'o paese, 'e Michelasso,
se campa buono senza faticà !

'A società d"a sventura

Abbascio a' posta, uno accanto a' n'ato,
cercano 'a carità sti duie pezziente,
uno lle manca ll'uocchie è nu cecato
chill'ato è sordo mute e nun ce sente

Se songhe aunite 'nzieme p"a sventure
hanno fatto na specia 'e società
chillo ca nun ce vede e stà 'int'o scure
'o sordo muto 'o ppoco 'e luce 'o dà.

Stu sordo muto quanno pass'a ggente
'ntopp'o cecate che capisce ggià;
Fate la carità! .... So non vedente! ...
e presta 'a voce a chi nun pò parlà

Si chiove e tira viente, ogne matina
vuie puntualmente sempe llà 'e truvate,
e quanno pass'a llà na signurina
'o sordo muto và a 'ntuppà 'o cecato

Capisce, stà passanno na guaglione,
fà 'a tosse pe' putè schiarirse 'a voce
pò allucca : Piccerè quante si 'bbona!
Chella s'avota e se fà 'o segno 'e croce.

'O sordo muto guarda a stu cecato
comm'o vulesso dì: viate a ttè!
Mentre 'o cecato pensa: e furtunato,
viate a isso c'almeno 'a pò vedè !

Lassateme' n pace !

Io scrivo vierze ma pe' mè sultante,
nun voglio passà a' storia nu dimane,
comme ve l'aggià dì, io nun so 'Dante,
e cu' sti vierze nun guaragne pane!

Nun me ne 'mborta si nce stà quaccuno
cu"e sillabe t'he conte 'nponte 'e dete,
io ve ripeto ca nun so 'nisciuno!
Pirciò m'hanna scusà chisti puete.

'O tiempo si nce stà darrà raggione
a chi raggione sempe cu 'na capa,
io quanno sento 'e vierze d"e canzone
m'accorgo ca nun so 'll'urdima crapa!

Si 'a rima quacche vota me difetta
e' 'a metrica lassa a desiderà,
io ve cunsiglio e nun me dà chiù retta,
'nchiurite 'o libbro e ghiateve a cuccà.

E chesta è stata 'a recenzione
ca presentato 'o primmo libbro mio,
pirciò si stà nu Pascoli o Manzone,
io voglio campà sulo 'ngrazia 'e Dio!

Io ca ve scrive vierze 'e poco cunto,
però ve parlo cu nu core mmane,
io 'ncopp'a nu pueta mett'o punto,
ve voglio ricurdà ch' è Viviane!

'Si turnasse nu Messia

Si oggie ccà turnasse nu Messia
comm'a tant'anne fà venette Cristo
trentatrè anne nù ce restarrie
ncopp'a stu munno 'e merda e d'egoiste

Ce bastarria nu' iuorno, massimo dduje
pè dì a stu munno 'nfaccia 'a chesta gente
vale la pena cca' murì pè vvuie
che site tanta chiaveche e fetiente

si mò aspettate che more pur'io,
'uommene 'e niente state chine 'e sbaglie,
io songo nu muderno figlio 'e Dio
e nun aspetto Pasca, me ne saglio!

Ve faccio sparagnà curone 'e spine,
'o lignamme p'a croce, nu pruciesso ....
stu munno n'hite fatte nu casino,
hite pigliate a papà pè nu Ddio 'e fesso ?

e che me metto a fà e Nozze 'e Cana
tenite vizie, niente chiù v'abbasta
si mò multiplicasse 'o pesce e 'o pane
avesso accumincià cu' l'antipasto

e quanno fosse 'o tiempo d'a cundanna
allora fuie Barabba liberato
oggie che so' passate duimil' anne
io sempe 'ncroce i'e chiaveche graziate

e che me metto a fà mo' 'o serra serra
'ncopp'a stu munno hite truvato 'o ddoce
vuie ccà scialate e site vierme 'e terra
e io figlio 'e Dio m'aggia purtà stà croce

Scannateve accediteve fetiente
che site addivintate tanta crape
siccome ca nu ghiate proprio niente,
m'affaccio 'a cielo e' lla' ve sputo 'ncape.

'Ll'urdimo e ll'anno

Stu calannario appiso ggià è fernuto
aggiu stracciato ll'urdimo fuglietto
cuntento so' ca st'anno se n'è ghiuto
pensanno tutt'o male ca facette

For'e balcune ggià sparane 'e botte
'a luce de 'bengale 'n miez 'a via
me dice ch'è sunata mezanotte
brindammo tutte quante c'alleria

Ma ll'anno viecchio ch'è appena fernuto
trasenne alleramente ce dicette:
io porto pace, fatica e salute
ma purtaie odio cu' llutto e vendette

Sperammo anno nuovo mò ca tu trase
si faie prumesse mantiene 'e parole,
manne 'a fatica pe' dint'a sti case
scarfe sti core cu"e raggie do' sole

Salve 'e criature ca stanno murenno
mietto 'int'o core nu poco 'e passione
stienne na mano a chi mò stà suffrenno
sparte stu pane nu poco per'one

Fà ca na mamma che chiagne p"o figlio
stracquo 'e fatica s'abbraccia stasera
e stu pàpavero fanne nu giglio
'ianco 'e purezza e adduruso 'e preghiera

Fà c"a famiglia che mò s'è spartuta
torna riunita cuntenta e felice
e ca nu pate c"a mano 'ncalluta
guardannese 'e figlie s"e benedice

Trase anno nuovo che si' benvenuto
t'hamme aspettato cu' tanta custanza
dint'a sti core che ggià si' trasuto
miettece pace e nu fil 'e speranza

Cu stà speranza stanotte nuie ate
stammo ballanno facenne ammuina
si asciutte lagreme chesta nuttata
nun ce fa chiagnere dimane mmatina

' O Palcuscenico

'A luna chiena, fà da riflettore,
cu 'e raggie argiente, pitta tutt'a scena
stanotte 'o mare ch'è nu primmo attore
recita 'nziem'a tte, bella sirena!

Da terra 'a rena parte na canzone,
'nziem'a migliare 'e vuzze 'e marenare,
'a scena è pronta! Aizate stu telone!
Jammo appicciate a prora sti lampare!

'Na vranca 'e stelle stà cadenno a cielo,
Ischia mia bella, te fanno na curona,
cu 'e ponte te ricamano stu velo
ca ll'ha tessuto 'o vierzo 'e sta canzona

Stenne na luce argiento 'a luna chiena,
'ncopp'a stu palcuscenico 'e l'ammore,
'o mare verde, abbraccia sta sirena
tenennele accussì, anema e core

'o pubblico presente s'è 'ncantato
e canta sottavoce 'na canzone,
chiagne nu furastiero 'nnammurato...
Oj nuvola .. cala stu telone!

Prugresso

Vulesse tanto scrivere p'ammore,
fà na puisia chin'e sentimente,
ma è addivintato 'e màrmele stu core,
me s'è addurmuto 'npietto a tradimente

'Npietto s'è ncrudeluto a poco a poco,
e comm'a nu fàsulo 'nt'a pignata
ca mentre volla stute sott'o fuoco,
senza calore chiù, resta 'ntustato.

Pe' te vasà, na vota, na guaglione,
tu te cercave 'o scuro e quacche strata
pure na luce miccia 'e nu lampione
te privave 'e nu vaso 'mmaculato.

E tiempe d'oggie, tutto s'è cagnato,
oggie se fanno 'e figlie 'nmiez'a via,
l'aborto è stato ormai autorizzato ....
N'atu prugresso d"a democrazia!

' A Libertà

P"a strada sento spisso mocc"a gente,
chesta bella parola : Libertà !
Io so' gnurante, nun capisco niente,
vurrie sapè vhe vò significà.

Embè, l'aggiu spiato 'o scupatore:
Dimme nu poco ma 'o sapisse tu?
"E n'arma mmane a nu lavoratore,
si mò vulesse nun scupasse chiù,

Chest'arma nce l'avimmo cunquistato,
cu"o sciopero, cu "a lotta e cu' sudore,
si voglio vaco 'ncopp"o sindacato
e faccio licenziare all'assessore!

Ma chest'è a discapite d"a gente,
senza scupà se piglie n'infezione,
te piglie 'a libertà, ma certamente
'nzieme cu' te s'ha piglia l'embrione

Mentre aspettavo 'o mezzo na cuppietta,
strignute, forse pe se fà vedè,
isso cu"e mane dint'a camicetta,
essa ho vasava e pò guardava a mè.

Siccome nu so' guardone, so ' nurmale,
nun me fir"e vedè sti purcarie,
'a libertà va bene niente 'e male,
ma tu te piglie 'a toia e me lieve 'a mia!

Avimmo fatto na cunfusione,
'a libertà è ammore, sentimento...
Nun è 'a licenza pe' nu spurcaccione,
nun è 'a patente pe 'nu delinguente.

'Ncopp'o vocabolario 'nce stà scritto
che vvò significà stà libertà:
"Campà è un sacrosanto tuo diritto,
però he ì ' annanze cù" e capacità...

Ll' urdimo pruciesso

Nascimmo pe murì, chesto se sape
campammo comme fosseme liune
senza ce n'ddunà che simme crape
e che murimmo comm"a scarrafune

Ommo che sì venuto 'ncopp"a terra
tu nun ringrazio maie chistu destino
campe stì iuorne tuie facenne guerra
e accide comme fusse nu Caino

Pe na magnata 'e carte 'e mille lire
accide a tradimento 'o meglio amico
sti cose sì cecato nun 'e vire
sì surdo e nun 'o siente che te dico

P"o poco 'e gloria ca nu' vale niente
tuorno comme sì nnato, sulo spèrme
se spoglia 'o core tuoie dè sentimente
e strisce 'nterra comme fà nu verme

Si peggio 'e Giuda che tradette a Cristo
tu nun 'o può capì, tu nun 'o ssaie
'ncopp"a stu munno tu sì peggio 'e chisto,
Giuda p"o pentimento se 'mpiccaie

Invece, invece tu fin"a che muore
campe 'e malvagità si sempe 'o stesso
nun t"o scurdà llà 'ncoppa quann'e è ll'ora
sarrà nu Dio che te farrà 'o pruciesso

E stu pruciesso sarrà senza 'mbruglie
annanze a Dio se dice 'a verità
ccà 'nterra rieste gloria e portafoglio
ll'à l'avvocato nun t"o può accattà.

'A fenesta 'e Napule

Chest'è 'a fenesta 'e Napule,
stasera st'arapenne,
'e faccia stà 'o vesuvio
che ancora sta durmenno

E scitete vesuvio,
fancella st'allummata,
caccia dà dint'all'anema,
stu fuoco tuie stutato!

'O fuoco tuoie è 'o popolo ,
stasera io 'o rappresento,
comme me sento umile,
annanze a chesta gente!

Chi sò? Pullecenella!
Io stesso nun 'o ssaccio!
Chi sò popolo bello!
Venite 'int'a sti braccia!

Ve tengo dint'allanema,
ve tengo dint'o core!
Chest'è 'a fenesta 'e Napule,
carissimo lettore

'O pazzariello

So' cundannato a fà 'o pazzariello;
Povere vierze mieie ve iett'o viento,
io ve sapesso scrivere chiù belle,
ma 'o munno d'oggi, no, nun m'ho cunsente!

Pirciò vuie site figlie 'e puveriello,
comm'a nun pate m'avite rispettà,
si vuie nasvìcite brutte e c"o scartiello,
'o stesso, vuie m'avite perdunà!

Pecchè tengo n'età ca 'a vita è amara;
pe vvuie ca vularrio turnà guaglione,
Pusilleco, Surriento, Marechiare,
ve vularrio chiammà dint'e canzone!

Addio passione mia, vierze mieie belle,
ve lasso pecchè tengo 'a malasciorta!
Mò scrivene canzone cu 'e curtielle ...
Io auso 'a penna! Pirciò me sento muorto !

Si io fosse 'a befana

Si io fosse 'a befana, v'assicuro,
ca maie 'e nisciune, io me scurdarrìo,
purtasse 'e pazzielle e' criature,
ma all'ommo chesti cose nce darrìo:

'O desso a' primma cosa 'e cervelle
p'o fà 'e n'ata manera arraggiunà,
chesta fosse 'a chiù bella pazziella,
pè ll'ommo ca nun sape ch'è 'o campà!

Nce desso na cuscienza chiù sincera,
pè nun'o fà tradì 'o stenno 'a mano,
facennelo chiù ommo 'a capo   'o pero.
Chesto 'o darrìo si io fosse 'a befana!

Me facesso passà nu sacco 'e sfizio
a ppier'o lietto 'e quacche amio mio
ll'he faciarrìo truvà tanta amicizia,
c'avesse dì: Che schifo ca facc'ìo!

Tutte sti cose vuie m'addimannate,
si nce mettesso dint'a na cazetta....
Gnornò, rispongo, si vuie m'ho spiate;
ma dint'o core ca lle sbatte 'npietto!

Ma chesto è sulamente fantasia,
nun so 'a befana, songhe n'ommo io pure,
e faccio parte 'e chesta fetenzìa!
Pirciò 'a befana è sulo pè criature!

'A PAZIENZA 'E PULECENELLA

N'assalto a' banca ! Oj gente, ggè fuite!
'Na vecchia allucca : Madonna mia , ch'è stato?
Hanu culpito a mmorte nu bandito,
'a complice, 'a guagliona hann'arrestata!

'Ncopp'a nu marciappiede 'nnanze 'a banca,
stà n'ommo acciso sotto a nu telone,
teneva 'ncuollo nu vestito 'ianco
'nfaccia 'na maschera e 'ncapa 'o cuppulone!

Doce paese mio Napule bella,
llà 'nterra mò che pena che mme fà!
'O cunuscite, o no Pullecenella?
Era nu figlio onesto 'e stà città!

'Na maschera ll'à 'nterra sporca 'e sanghe,
'nmiez'a doie guardie, chiagne Culumbina,
è stato acciso pe n'assalto 'e banche,
pure Pullecenella! Che destino...

pè na città ca sempe faticata!
Mò lle vene negata stà fatica;
Che colpa a' 'o delimguente vuie 'nce date?
Pè 'fforza v'haddà essere nemico!

Addio pè sempe, addio Pullecenella,
tu nce rimasto tanta pene amare
abbandunaste tammorre e castagnelle
e t'abbracciaste 'o mitra pè denare!

'A colpa nun è 'a toia t'hanno purtato
dint'a stà strada chiammata delinguenza!
Napule è chillo ca sempe suppurtata,
m'addà tenè nu metro stà pacienza!

LL'URDIMO FESTINO

Int'a stu poco 'e tiempo ca me resta,
chiammateme puete e musiciste ,
facitemmella fà st'urdima festa,
st'urdimo sfizio m'aggià fà passà!

Apprufittate ca maggio è trasuto!
Cugliteme doie rose! Pe' piacere!
Mettitemmelle 'npietto 'int'o tavuto,
pe' ll'urdimo ricordo 'e primmavera!

Mannateme ghirlande 'e rose e vviole,
nu carro e sei cavalle ammartenate,
Io pure doppo muorto voglio 'o sole,
mettiteme a' 'o scupierto sutturrato!

Ma quanno sotto terra me vedite
stà scritta 'ncopp'o fuosso avita fà :
Ccà dorme n'ommo che pe' tutt'a vita,
nun cunuscette maie sincerità!

E quanno sarrà 'o 'iuorno d'o festino,
venite tutte quante a mme vedè
e ghiatevenne doppo 'int'a cantina,
nu brinnese l'avite fà pe 'mme!

Chiagnere e muorte, so lagreme perdute,
tu ca si n'ommo, nun chiagnere pecchè;
tengo migliare 'e vierme 'int'o tavuto,
saranno vierme, ma so 'meglio e te!

LETTERA A NA MAMMA

Nisida, venti dicembre, settantasette
Mia   cara madre, Natale è ormai vicino,
e io, porto tanta pena 'nchiuso 'npietto,
pe ‘nu fatale errore d'o destino!

'0 ssaccìo ca te faccio tantu male,
scrivennete sti cose, io so' guaglione
si 'nzietn'a tte, nun passo stu Natale,
so' certo ca nu fìglio se perdona!

Nun chiagnere mammà, famm'o favore,
voglio sfugà cu ' tte, sti pene amare,
Tu ca si' mamma me puorte dint'o core.
Si nut parlo cu' tte ca me si' cara,

a chi 'o pozzo cuntà chistu dolore,
ca me fà triste e amaro stu Natale,
luntano 'a te, luntano 'a frate e ssore,
senza vedè 'a luce 'e nu   bengale!

Mammà , io so 'nnucente! Io t'ho giuro!
Crideme almeno tu, mammà mia bella!
Io chella sera, fuievo p'a paura,
pecché sentetto 'e sparà 'na rivoltella!

Crideme almeno tu! Nun saccio niente,
t'ho giuro 'ncopp'all' anema 'e papà !
Io nun aggiu arrubbato, so nucente,
pulite so' stì mane meie, mammà!

'A madonna aspetta 'o bambiniello,
e appena nasce se l'astregna 'nbraccio!
Essa m'addà arapì chesti cancelle,
pecchè   te voglio dà nu vaso 'nfaccia!

NATALE SENZA PATE!

Ha fatto ggià 'o presebbio Vicenzino,
comm'è bello mamma! L'issa vedè !
Nce stanno 'a coppa mille lampadine,
'a madunella, arrasumiglia a te!

Nce stà pure Giuseppe sott'a rotta ,
attuorno comme aspettano e pasture,
ca nasce 'o bambeniello 'a mezanotte.
Mamma Natale è a festa d"e criature!

Ma nun è 'a festa mia! Mammà io 'o saccio!..
pecchè papà 'o presebbio nun m'ho fà ?
astrigneme mammà dint'a sti braccia,
famme addurmì! M'ho vularrio sunnà!

Nun chiagnere! Che t'aggiu fatto 'e male,
papà sta carcerato 'o ssaccio, oj mà'
ma nun fà niente....., pe 'mme sarrà Natale,
quanno papà ritorna 'a libertà!

VULESSO NU CIARDINO!

D"a matina ggià appicciata
nce stà 'a luce 'int'a stu vascio,
otto liette scumigliate
e nu banco 'e masterascio.

Una stanza, chest'è 'a casa,
ccà se dorme e se fatica,
manche 'o sole ccà nce trase,
tanto è stritto chistu vico.

Stà gente bona e semplice,
ca s'annasconne 'o chianto,
pè mantenerse 'e lagreme,
mentre fatica, canta....

Vascie ca so' tugurie,
case ùmmede e scure,
te fanne scappà 'a chiagnere,
stì pòvere criature.

Ovvì! Comme pazzèano
pe' copp'a a stà munnezza,
ncopp'e sacchette a perdere,
passano 'a fanciullezza.

Senza a' nu poco 'e spazio,
pè st'aneme 'nucente,
pè dint'o vico correne
e pure sò cuntente......

Vulesso nu ciardino
gruosso comme 'a stu munno,
cu' rrose e giusemmine,
verde, verde a zeffunno,

pe di 'a sti criaturelle:
Venite! Pazziate!
Io stu ciardino bello,
ve l'aggiu regalato!

E RICORDE

(a mia Moglie Rita)

Buongiorno Rita! 'O ssaie ched'é sta data?
Te sento sposa e sora stammatina,
io nun m'ha scordo chiù chesta 'iurnata
songhe trent'anne ca te stò vicino!

E io me sento ancora 'nnammurato,
te guardo tale e quale 'o primmo 'iuorno,
tenimmo quatte figlie già spusato,
cinche nepute ca nce stanno attuorno!

Io songo nonno e tu oj Rita mia,
sì ancora accussì bella comm'a tanno
ca nce devamo nu vaso 'nmiez'a via.
Te l'arricuorde, tenevamo vint'anne!

Ma nun fà niente, 'o tiempo passa e vola,
'o necessario è sulo chist'ammore!
E tu oj Rita mia , pe 'mme si 'o sole
pirciò si 'a vita mia...... fin'a che moro !

'A GRAZIA

'Na chiesa senza manco nu fedele,
'a sotto a n'architiello 'e na navata,
annanze senza manco 'na cannela,
steva nu Cristo 'ncroce abbandunato.

M'avvicenaie e 'o guardaie 'in' all'uocchie,
na goccia 'e sanghe 'nfaccia lle culava,
ddoie piaghe aperte 'ncopp'e ddoie denocchie,
e 'na ferita 'npietto sanguinava.

Io lle cercaie na grazia sotto voce,
subbeto doppo fatto stà preghiera,
accustanneme chù vicino 'a croce,
cu' ciente lire l'appicciaie doie cere!

Stevo pe 'mme ne i' quann'antrasatto,
me sentetto 'e parlà: E mmò addò vaie?
Forse sarrà che stevo assaie distratto,
ma che paura, mamma me pigliaie!

Facennemo curaggio m'avutaie
nu vicchiariello mustrannemo a Gesù,
dicetto: 'O vì 'ca soffre? Forse nun'o ssaie!
'Ncroce stu Cristo nce lle miso tu!

Pur'io so' stato! Io sò peccatore!
'E voglio sti peccate miei pavà ....
ma 'ncroce, Isso ha sufferto pè tre ore,
io so' ddiece anne ca stò suffrenno ggià!

E nun è legge 'e compensazione,
pur'io stò 'ncroce e nce voglio restà,
però m'adda salvà chillu guaglione ,
stu Cristo s'adda mòvere a pietà!

'Na mamma Isso teneva, era 'a Madonna,
ma 'a vera Addulurata , a' casa stà,
pur'essa è mamma e chiagne a dint'o suonno,
pecchè a nu figlio 'o vò fà cammenà!

'O saccio chistu Cristo ca sufferto,
però trentratrè anne ha cammenato,
curreva cu 'e guagliune all'aria aperta!
Ma figlieme è sciunche 'a quanno è nato!

Pirciò s'Isso cunosce sti turmiente
dint'a stà chiesa m'adda fà turnà,
a mano a mano a st'anema 'nucente!
Doie cosce argiente nce voglio purtà!

'O vicchiariello me guardaie e dicetto:
'A grazia te l'ha fatto stu Gesù!
Dint'a na luce argiento scumparetto....
chisà chi era ? Nun'o vedetto chiù!

'Ncopp'a stà croce mò nce stà nu vuto;
doie cere annanze llà sempe appicciate,
doie cosce argiento, pè grazia ricevuta
e spisso nu guaglione addunucchiato!

AUGURIE FIGLIA MIA!

(a mia figlia Adriana)

E figlie danno e' vvote dispiacere,
te danno è vvote tuòsseche e veleno,
ma quanno se ne vanno e cala 'a sera,
tu te n'adduone che vulive bene.

A tavula tu miette e stessi piatte,
'e stessi cose, nu cucchiare a testa,
pò te n'adduone ca nun songhe quatte.
Quanta posto vacante ca nce resta!

E pienze malinconico Natale,
quanno 'e tenive tutte piccerelle
io me sentevo, si, nu generale
e loro comm'a tante surdatielle!

Ma c'o pensammo a ffà, si, chest'è a vita,
'o tiempo passa e nce facimmo viecchie,
e quanta vote 'nziem'a mamma Rita ,
nce n'addunammo, guardannece 'int'o specchio.

Però simmo felice d'altro canto,
vedenno sistimate tutt'e figlie,
'na resatella 'nmiscata 'nziem'o chianto,
nuie nce facimmo si 'a nustalgia nce piglia!

E mò cara Adriana si 'spusata....
voglio parlà mò 'e te ca si 'na sposa,
tu si 'na piccerella 'mmaretata,
ma rieste 'a criaturella capricciosa.

E 'nziem'a mamma toia, te benedico;
miettete buono 'ncapa, figlia mia,
ricuordete 'e chello ca te dico:
Lasse e capricce tuoie! E così sia!

Si 'e vvote piglie mmano tu na rosa,
nun te scurdà c'o stelo tene 'e spine,
t'ho dico a stu mumento ca si sposa,
si tu te pugne pienze ch'è 'o destino!

Tiene 'o cumpagno ca te si 'spusato
c'ogne mumento te sape cunfurtà,
da oggi, isso e pè tte mamma e pate
na lagrema t'adda isso asciuttà!

Hanno sbuccià durante stu cammino,
nu prato verde carreche 'e viole,
sti sciure, figlia mia, so' senza spine
e nascene sultanto si stà 'o sole!

E RITURNATA PRIMMAVERA!

Vint'uno marzo, oggie è primmavera!
Spalancate barcune e feneste,
cu è primme rose spontene 'int'e teste,
cacciatannella stà vernata nera!
Vint'uno marzo, oggi è primmavera!

'A Rundinella 'o nido stà turnanno
e stu cardillo dint'a stà caiuola,
canta sbattenne 'e scelle sott'o sole,
allere spase aciuttene sti panne!
'A rundinella 'o nido stà turnanno!

Ben tornate, viole belle, ciclamine e rose!
V'aspetto n'anno sano, vuie 'ho sapite,
me date tanta gioia dint'a stà vita,
pecchè cu' vvuie ll'aria è chiù addurosa!
Ben tornate, viole belle, ciclamine e rose!

Spalancate barcune e feneste!
Lasciate trasì 'o sole dint'e case,
fasciteve cu 'e raggie dà nu vaso,
facitele a stu sole mille feste!
Spalancate barcune e feneste!

Oj primmavera mia chin'e passione,
ca sruzzica sti sense e' nnammurate,
pecchè chiù bella tu si' riturnata,
te voglio dedicà mille canzone!
Oj primmavera mia chin'e passione.

NUN SI STATA PICCERELLA

(a mia figlia Amalia)

He dato sempe, niente m'he cercato,
tu nun si' stata maie 'na piccerella
nun he pazziato, maie cu 'na pupata,
nun m'he cercato maie na caramella.

Appena tu d"a scola riturnave,
io te liggevo 'nfaccia, l'alleria,
te stive zitta, ma io me n'addunavo
c'aviva avuto diece a' geografia.

Cu 'e libbre sempe stritte sott'o vraccio,
mangianno te facive 'e lezione,
'o friddo 'e vierno te pittava 'nfaccia
ddoje scocche 'e russo, comm'a na cafone!

Io dà luntano spisso te guardavo
quanno Manzoni o Pascoli, liggive
e quanta vote io me n'addunavo
ca 'ncopp'a chesti paggine chiagnive.

Nun he pazziate maie cu 'e pupatelle
mò quanno quacche figlio tuoie te chiamma ,
me pare 'e te vedè cu 'e pazzielle.......
Cu' lloro mò pazzìe , facenne 'a mamma!

CARO TOTO'

Caro Totò dà cielo staie vedenno,

l'ammore ca te porta stà città,
stà vota, no Totò, nun stà redenno,
stu popolo! Nun se vò rassignà!

Tu lle purtave tanto buonumore,
pirciò stà gente nun te pò scurdà,
dive nu poco 'e pàusa a stu dulore
ca tanto affligge chesta umanità!

So certo ca mò gire 'o paraviso,
cu 'o cazunciello e cu 'o cappiello tuosto
'e mise 'nfaccia all'angelo 'o surriso
c'hannu perdute sti guagliune nuosto.

Perdoname Totò si stò chiagnenno,
tu me capisce, si 'napulitano
si 'e stu paese mio ca stà murenno,
ca mò nun ride chiù! Vede 'o dimane!...

Nu prìncepe tu ire 'e l'allerìa,
primma 'e murì diciste sti parole:
Voglio turnà addu te, Napule mia!
Me voglio arrepusà sott'a stu sole!

E giusto t'hanna fà nu monumento,
tu si 'nu figlio degno 'e stà città,
pecchè tu fin'all'urdimo mumento
non t'ho scurdaste ch'ire nato ccà!

Sante parole chelle ca dicive;
<Ch'è na livella 'o munno a' verità>
Ma nun è na livella pè chi vive,
'ncopp'a stu munno fatto 'e nfamità!

Totò, cerca na feria a stu Signore,
tuorno ccà 'nterra, vienece a truvà,
ripòrtece nu poco 'e buonumore,
ca sulamente tu sapive dà!

Ritorna all'indice di: