Comm’è cagniate Napule, Marì!

Quann’ero guaglione se sentevene

dint’’o silenzio d’’o sole ll’aucielle

‘o profumo d’’o mare, ‘o sapore ‘ell’aria…

 

Po’ c’è stato tanto rummore: bomme

strille ‘e paura, passi cadenzati

che nun accumpagnavene canzoni

e nuie?…

Chiane chiane simme muorte all’erta.

 

Comm’è cagniate Napule, Mari!

Nun se sentene voci cantà, Reginella

‘ O sole mio, Funiculì, funiculà;

ma ‘na musica che te rompe ‘e rrecchie:

‘o buchi buchi…

 

Femmene ca se credeno vedove

pa’ guerra, se cunzoleno cu ‘e surdate

pe’ ‘nu piezzo ‘e pane, che ll’è mancato

fino a ieri. Pe’ ghienghiere o stomaco

se jetteno ‘ncopp’’a ‘nu lietto, ‘mbraccia

a ‘o primmo che tocca. Comm’è cagnate

Napule, Mari!

 

‘Sta guerra ‘a accise a tutte quante

Pure ll’aucielle se so scurdate comme se canta

e ‘o mare nun rumoreggia ‘cchiù comm’ ’aiere.

Se sente sulo ‘o toc toc ‘e chisto core straziato

che vulesse sentì ‘na parola d’ammore,

ma pur’isso, Mari, è muorte insieme a nuie.

 

Napoli 2 aprile 1945