'O VECARIELLO

 

Tutte 'e juorne... e 'a stess'ora

t'aspettavo p0 0o vecariello.

Ogne minuto...era n'ora...

Mm'apparive sempre cchiù bella!...

 

Mme dive 'a mano e mme guardave...

'int' 'o core, 'a felicità!...

T'astringevo; tu mme vasave...

 

tiempo bello! Che vvuò scurdà!...

 

E pe vvutate e vvutatelle

scurnuse nuje passavemo.

"Mme vuò bbene?... E giurammello!"

'O primm'ammore sentevemo!...

 

Po' ferneva 'sta viarella...

Ll'urdemo suspiro 'a luntano...

Primma 'e ll'urdema vutatella

tu mme salutave cu 'a mano!...

 

Anne e anne, mo, so' passate!...

'O vecariello sta sempe llà!...

Tal'e quale, nun é ccagnato, 

passo 'a ccà pe te ricurdà!...

 

Nu suonno luntano 'st'ammore!...

E' ll'ora!... Giesù! Vuo' vedè?!...

E' overo?!... Se ferma 'o core!!...

E' essa?... 'A vi' llà... Vene pe me?...

 

Ma no!! E' n'ata... e nun guardà!

Passanno po' mme fa: "Sentite...

Cisto vico sponta a' Trinità?!...

...Neh!! Signò?!... ma vuje chiagnite?!"

-No!... Scusate! Nun saccio di' !...

Nu muscillo a ll'uocchie; ma che d'é ?!

Mme pogne e mme fa sufrì!...

Soffre 'o core... ca chiagne  pe tte!!...