'O PUETA!

 

S'é spasa 'a voce ca scrivo puisie.

Siente 'e di': "Mo s'é mmiso a fa' 'o pueta.

Comme lle so' venute 'sti ffantasie?...

Spacca sentenze e ffa pure 'o prufeta!..."

 

E po': " Ah! chesta puisia overo è bella!...

Chest'ata 'un dice 'o riesto 'e niente; è brutta!"

'E puete mo luceno comm' 'e stelle...

Esce 'a luna lucente e so' distrutte...

 

A mmettere aunite quatto, cinche parole...

é difficile comm'a ffa' 'o pittore...

'O penziero vene e vva... po' torna e vvola!...

'O penniello tocca e cagna 'o culore!...

 

P' 'o pueta l'essenziale ca ce vo'...

nu core speciale... d'eccezione...

si no è mmeglio ch'abbandona primma 'e mo!

Nun scrive nè nu vierzo e nemmanco na canzone!

 

Si vo' sape' overo si é pueta

s'adda' fa' nu buono esame 'e cuscienza...

Che ffa si è nu gnurante... analfabeta...

'Stu mistero nasce 'a ll'intelligenza!...

 

Sultanto pe ccose soje adda' campà...

Pe pprimma p' 'e sciure e tutt' 'e rrose!...

'A musica e 'o canto, sempe, adda' ama'...

E ppo', dint' 'o core, sempe n'amorosa!...

 

'A luna e pure 'o sole l'hanna 'ncantà!...

C' 'o mare, culore 'e chill'uocchie 'e Maria...

'O silenzio, c' 'o circonda, adda' sunà...

tutt' 'a nuttata, comm'a na melodia!...

 

S'adda' sentì 'o cchiù ricco 'e tutt' 'e ricche!...

Po'... adda' piacè pure comme veste...

'E capille ll'hanno cummiglià 'e rrecchie;

nu sguardo sicuro e n'aria 'e festa!...

 

P' 'a ggente malamente pena adda' sentì!

Desederuso sulo 'e bbene e cujete...

Maje male, vennètta adda' cumpiatì!...

Si tutto va accussì è nu pueta!!...