CORE TRADUTO!

 

'O vi loco 'stu core appecundruto,

ca nun se vo' pe niente rassignà...e tu, senza ragione, ll'hè traduto...

e senza te, mo, nun vo' cchiù campà !...

 

Tu saje ch'é sincero e nun te piente...

e si' 'ufame e crudele quanto maje...

e dillo mo ca nun è overo niente !...

Si nun te crede, se sulleva assaje !...

 

Qualche buscia nce vo'pe 'stu mumento

'e turmiente... e nun sape ch'adda fa' !...

Ma c' 'o tiempo, c' 'o tiempo sulamente

forse si 'a scampa isso te scurdarrà !...

 

Core traduto nun perdona maje !...

E l'odio durarrà pe tutt' 'a vita !...

Si 'o bbene é gruosso overamente assaje

rimane sempe 'o segno d' 'a ferita !...

 

'Stu segno te rimane e te fa male,

specie si cagna 'o tiempo cu 'a stagione...

Si passa pure 'o vierno a che te vale

na primmavera senz' 'a passione?!...