Pecchè m' 'o faje?

(Pietro Labriola – 1820-1900)

Neh tu pecché m' 'o faje?

Chesto che bene a di'...

Addo' s'è visto mai,

quanno la vuo' ferni'?

T'avesse forse ditto

che te voleva ama'?

Te cride che a te schitto

n'ommo se po' spusa'.

Tu avasce l'uocchie 'nterra,

quann'io me voto a te.

pecché me fai sta' 'nguerra?

Pecché nce l'hai co' me,

pecché te frusce tanto?

'Sti smorfie mò che so'!

Lo bide ch'io te 'nchianto

che 'ncintre? Tu che buo'?

Chiù stongo e n'annivino

'sta cosa comme va,

si vengo a te vicino,

si vaco pe' parla'...

O sempe me dai tuorto

o nono me siente cchiù,

me fai lo cuollo stuorto,

me tratte a tu per tu.

Lo dico e lo sostengo

ch'io mai nun voglio a te,

ca n'autra nenna io tengo,

e tu non fai pe' me.

Quanno me 'ncuntrarrai,

saluteme e bonnì

neh tu pecché m' 'o fai?

Chesto che bene a di'?

__________________________________________________________

Sito realizzato da Gaetano VARIABILIS

Invia liberamente testi, traduzioni, foto, commenti o altro materiale a: