Li capille de Carolina

(Pietro Labriola (1820-1900) – D. Bolognese (1819-1881))

'Sti capille che m'aje dato

co' 'sta nocca Caroli'

m'hanno tanto 'ncatenato

che me sento scevoli'.

Si li guarde già lo lume

de lo sole appare a me

se li base li profume

m'arricordano de te.

M'arricordano n'ammore

ch'io non pozzo cchiù scurda'!

L'aggio posto int'a 'sto core

e ccà schitto hanno a resta'.

Quanno 'mpietto tengo chille

cchiù pericolo non c'è,

chesta nocca 'sti capille

'na reliquia so' pe' me.

SI 'no dito me se tocca;

si me guardano purzì

'sti capille e chesta nocca

ponno tutto fa' spari'.

'No rialo non putive

cchiù magnifico pensa',

'no tesoro si me dive

non aveva che ne fa'.

Caroli', non c'è momento

ch'io non penso a chillo e a te

me li guardo, e so' contento

cchiù contento de 'no re.

E chist'uocchie e chesta vocca

quanno morte 'nzerrarà,

'sti capille e chesta nocca

'ncoppa a me s'hann'a truva'.

__________________________________________________________

Sito realizzato da Gaetano VARIABILIS

Invia liberamente testi, traduzioni, foto, commenti o altro materiale a:

variabilis@libero.it