Varde putei, che a deventar veci se ghà el bon tempo, l'importante l'è restar lucidi de zervelo, perché deventar veci per no capir gnente l' è en brutto affare, quel ghe riuscivo anca da zoven.
Infatti 'na volta i me diceva: " Tasi ti che te si en bocia, no te capisi gnente, sa voto saver de come l'è la vita! "
Ades che ghò la me età i me dis: " Tasi ti vecio, che no l'è pù come sti anni, l'è cambia el mondo!"
Ensoma mi son de una generazion che no ghà mai capio gnente. Che la se ghà visto pasar el mondo sora le recie, ma che no la è mai stada bona de combinar qualcos de utile.
Man a man che emparevo a doprar  le robe nove e moderne en vigniva fora delle  altre pù moderne, quasi i fese apposta per farte sentir na merda difronte alle nove generazion.
Inoltre quando mi ero bocia comandava i veci, guai a chi, che a taola i oseva contradir quel che diceva el nonno, l'era vangelo,  comandava lù.
Anzi comandava lù, ma l'era la nonna a tor le decision pù emportanti, comandava le done al me paese.
Ades che son vecio comanda i zoveni, che oltre che a fartelo capir che te si vecio, i te lo sgnaca sul muso proprio.
" Tei vecio, antico,  matusa, bacucco l'è le prime che me ven en mente."
Le uniche sodisfazion che te ciapi a eser matusa, l'è dai puteloti picoli che i stà li sentasi vizin de ti, al capitelo a scoltar le storie de 'na volta che te ghe conti.
E così dopo aver tira fora dalle scarsele 'na sbrancà de quele caramele dolzi come el zucher,  che se scioglie en bocca, e che qualche volta per la rabbia delle done, le se scioglie anca en le scarsele, te tachi a contar storie.
Me par de eser en pescador,quando conto storie, ogni volta la sgrando, la diventa sempre pù tragica, o misteriosa.
Le storie de guera che l'è quele che riscuote gran successo, al primo racconto è sciopà na granata vizin de mi, che la m'ha dato fastidio a 'na recia.
Al secondo me ghè arivà la tera adosso, per lo scoppio, al terzo le schegge, al quarto tochi de omeni, e così via.'Nà volta da embriago ghe gho contà, che m'è sciopà vizin en canon, che no savevo da en dove l'erà cascà!
Comunque mi le conto e le sgrando, ma el fò a fin de ben, per no con targhe sempre la stessa, i se entusiasma sempre de pù i boci a sentirle pù grose, quasi i te le suggerise lori come nar avanti, quando te si en difficoltà de memoria o che te ciapi l'arfio per tirar na bocada 'n de en zigaret.
I è talmente convinti che par quasi che ghe fuse anca lori en mezo a ste storie.
Con dei boceti picoli me son enventà en personaggio, che per el nome l'esiste davero, ma tutte le storie o le è enventade o le è de tutta altra zente.
Quando taco via  disendo:" Mi ricordo el Lalo " me giro verso ste do testoline bionde e ghe domando: " Voi c'eravate?" e lori pronti veloci, svelti come 'na sginza" Certo io c'ero" " Anch'io ".
E così via ad enventar storie sempre nove e pù affascinanti.
Che varde seo cari, l'è molto meio far come mi, che me envento le storie de sti ani pitosto che sentir zerte fiabe moderne che conta le mamme adeso.
Ste zovenote solo perché le è moderne, le gha tutti i lussi no le ghe conta pù le storie che le nonne le ha sentù dalle so mamme, e cosi via no se sa gnanca da quando le è sta enventade ste novele.
Ades le compra el libret delle favole, con le illustrazioni, storie educative che fanno crescere i bambini pù intelligenti…. Monade!!!!
L'è na monada scriver storie insulse come quele li, son bon anca mi, anzi farea de sicur de meio, pecà che no son bon de scriver però.
Per quele fiabe basta tor do o tre embezili, meterli 'ne en castello o e 'nden bosco e la favola la e bella che fatta.
Ve fago el primo esempio che me ven en mente, ho sentù ieri la storia de capuccetto rosso.
No avevo mai sentù na roba pù scema de quela lì, 'na storia per deficenti, popolada de embezili, ma embezili proprio, roba da no creder.
Ghè 'na pora veciota, che la gaverà per lo meno novanta cinque anni, e la vive da sola en mezo a 'na foresta.
Cramenta, ai me tempi i vecioti se i tigniva en casa, rencuradi e riveriti, no sbandonadi en case lontane e da soli.
Me nonna en casa l'era la prima a levar per empizar el fogo e meter su l'acqua e la colazion, altro che da sola en mezzo alla foresta.
E anca quela vecia, se propri no te voi star en casa dei altri và all'ospizio, che almen i parenti no i ghà da nar en vanti en drio per la foresta, en minimo de intelligenza la ghe volarea.
La mamma de Capuccetto Rosso, l'è 'na delinquente, la manda en giro 'na fiola tutto l'anno col stesso zamaro, che ormai tutto el paese el tol en giro sta pora putelota no ricordandose pù gnanca el so nome ma solo el color della palandrana che la ghà indosso da sempre, istà ed inverno che oltre che dal color i la sentiva arivar anca dalla spuza.
Ensoma stà mamma delinquente, la manda la fiola sola,  en mezzo alla foresta, per portarghe da magnar e medicine a sta vecia malada.
Se la saveva che la era malada la podeva anca tirarsela en casa, o quantomeno vaghe ti a veder se la gha de bisogno.
No, la manda la fiola, e la ghe dis anca saludandola:" Attraversa la foresta, ciao, in bocca al lupo." La porteva anca sfiga sta mamma.
El lupo, l'è el lupo pù scemo del mondo, el vede la bambina el se avvicina, ma nol la magna subito, come qualsiasi bestia intelligente la averea fatto.
No el ghe la conta su per capir che la neva dalla nonna, ma 'na volta savù che esiste anca na nonna e 'ndove che la abita, magnete la nevoda deficiente.
Enveze no el lupo malandrino, l'è na ad embastir su 'na commedia che a teatro no se gha mai visto.
El và a casa della nonna, el bussa alla porta,  perché le en lupo deficiente ma educato, la nonna che se vede no la ghe sentiva na bella eva la daverze la porta e finalmente el lupo el se la magna.
E chi arriva el bello, el lupo enveze che sconderse drio alla porta per saltarghe ados alla Capuccetto Rosso senza nome, e magnarsela subito el riese no se sa come a meterse la camisa da note della vecia, la scuffia, ghe vanza for solo le recie, e l' se mete 'nde letto a spetar.
Con la panza piena, meterse en del letto, l'è fatale, te vien adoso na pipiona che te te endormenzi de pacca, el lupo enveze el resta sveglio.
Ades mi no sò quanto l'era brutta e pelosa la nonna, ma sto Capuccetto Rosso el ghà messo en quarto d'ora a capir che quel pelo, quei oci, denti e voce empastada no podeva eser so nonna.
Madonna santa per fortuna che el se le ghà magnada finalmente, e dopo, gran  finale ariva el cazador che el copa el lupo el lo daverze e miracolo,  i era tutti entieri, magnadi 'ne en sol bocon, sel gheva così fame ocoreva far stà commedia.

Varde putei, no sentude ma pù grosse de questa ghè solo i nosi politici che riese a contarle.