El me diseva me nono che no ghè schei che poda comprar la salute.

Mi schei no ghe n'ho, figurarse sa podo comprar,

El aveva anca reson quel por om, che anca se l'era en talian el ghen'vedeva abbastanza, sevede che i schei no i vanzeva gnanca en Italia.

D'altra parte se le vignù fin quà su per far el pistor, non l'è vignù perché el se gheva enamorà dele miserie dela valarsa, ma i schei i ghe premeva anca a lù.

En so qualcosa anca mi de come ghe preme i schei ai italiani, perché vaca miseria, e se digo vaca l'è per qualcos, quando l'è ora de comprar na bestia ala fera de S.Luca su en Parochia, no ghè pù piociosi de i venditori italiani.

Zà fo su en rebalton perché i vol eser pagadi en lire, de le sue, ben, ' na lire l'è 92 centesimi de corona, ogni volta che g'ho  provà a far i contegi me sa tanto che me son dato nà zapada sui pei.

Infatti me son acorto che ogni volta chi crompa el me diceva subito, e che svelto " sono giusti, grazie tante …fà il conto veloce, bravo" , mi per no farme veder che ero ancora lì che vardevo, se en scarsela l'era lire o corone,  fevo la facia del sapiente e del lezù, e no domandavo gnanca sa che me vigniva de volta.
Comunque ho sempre fato el conto giust, se vede, perché de volta no ho mai ciapà gnente.

E anca i sensali che ne taieva la man, dopo aver fato en affare, vedevo che  i me cercava pù  del  solito.
Quela zente lì i te meneva subito al ostaria per celebrare l'affare, ma fra na celebrazion e l'altra, l'estrema unzion dal'oste la ciapavo sempre mi, perché i sensali i gheva za finio la mesa e tute le so celebrazion prima de pagar.

Così a mi me restava la vaca che ghevo comprà e for per el paes restava tute le vache e le sirache che ghevo tirà,  prima de l'afare per farme veder grand, e dopo perché evo spendù de pù de vin e de bira che de vedela.

Anzi le besteme no l'e era gnanca finide lì, perché arivr a a casa co nà vaca meza sgherla, embriago stench che ariveva prima la spuza de vin che l'om su per le scale, senza soldi, magnai anzi bevui for tuti.


  La me sposa no l'è che la me nasieva el let o la me giuteva a cavarme le sgalmere, ma la me saludeva a pache col baston, maneghi de spazaora, mestoli stele e tuto quel che ghe pasava per le man.

En compenso l'erà en tocca sana per far pasar la bala, difati zerti i dis sempre che el dì drio de nà bela balota i ghà sempre en gran mal de testa, mi enveze me sveglio lustro come en spegio de testa, ma ghò la schena en tochi e i brazi roti dale slegnade de la sera prima, en compenso el mal de testa el me ritorna dopo ndel sentir tute quele che la me taca arente apena la me riciapa la sposa.

Quel dì lì, anca se fusa el tre de genaio, mi ghò da nar endel'campo, o a vardar le vigne a somenar no so cosa soto en metro de nev, ma l'è meio che staga via de casa anca per el disnar en de zerti casi,  anca per zena.

El fato l'è che nei momenti difizili e de solitudine, te salta sempre fora i veri amizi, e vigliacca miseria dei veri amizi no ghe né uno che no beve.

L'omo per trovar ben quel che el ghà dentro se steso, per rebaltarse come en calzoto e parlar con altri omeni de noi stesi, per tirar for tuto questo disevo bisogna  butar dentro qualcosa.

En de sti casi quel che pasa meio l'è el vin.

E alor sa ghè de meio per desmentegar nà bala?

Farne en altra.

E così difronte ai nosi biceri, mai vodi ma con sempre zo quel gozet, che par che el diga: sa feto beveto o me laseto chi per somenza.
Disevo difronte a sti biceri, le pù grandi discussion de afari, de rogne, de politica e de miseria, vardà caso tute robe colegade, zerte volte se parla anca de de done,  quele le è colegade ale rogne.

E dopo quatro ponti a mora, che mi no son bon de zugar da sano ma da embriago zigo come en mato, ala fin anca col por om de l'osteria el taca a meter le careghe su le taole, a smorzar candele e pasar co la spazaora en man, e mi ndel veder quela me se sveglia bruti ricordi e anca en strano presentimento, l'è ora de tornar a casa.

E così fora en mezo ala neve, col fredo de la note che el te sponze su le cane de la gola, a vardar ste stele e sta luna dopo aver parlà de tante verità, econe en altra de verità ... bestia a far la bala el ven davero el mal de testa.

E così pian pian, bel bel ormai che le note son chi en mezo a na strda piene de neve a zercar da che banda che l'è me casa, le pontere le è asai pericolose de note, co la neve o  co le case che le se move tuto entorna.

E così le pontere le pasa via veloci, basta farle col cul.

Ma finalmente a forza de dai, son stà bon de ritrovar l'uso de me casa.

Ades cominzia i problemi però, n'do ela po' la ciave, zerca e sfodega en tute le scarsele, salta fora cioi enruzenidi, caramele per i boci e po' per fortuna anca la ciave scondua zo 'n fond a la scarsela.

Cramegna, ades me toca zercar aiuto per tignir ferma anca la porta, che per zercar la topa en par de colpi ho anca smacà contro a  l'uso.

Finalmente a forza de dai son stà bon de verzer, e così per no far rumor me cavo subito i scarponi e i tegno fisi co na man e zerco de rampegarme su per le scale, che le me par sempre pù longhe, i ghese tacà dei scalini entant' che ero via?

Entro pian pian en stua e dopo en camera me cavo fora de gaban, braghe e camisa e sempre pù en silenzio come en bis entro soto le querte, ma 'nde tuto sto silenzio no me son pù ricorda dela scaldina broienta en fondo ai pei.

Cramenta che pelada!!!!

En zigo 'nde la not l'ha desdromenzà mez paes, e i zighi de la me sposa poco dopo i ha desdromenza el rest.

E così ecome qua a giurar e spergiurar de no bever pù for per le ostarie.

Almen fin ala prossima volta.