Dizembre ai Cumarlotti

Dizembre fine anni cinquanta ai Cumarlotti….che bel mese l'era, neven a scola co la zacoza de carton su le spalle ,la neve la ne bagneva i calzotti rotti e i pei, l'era el mese pu belo de tuto l'anno,neve , feste e regai e se copeva anca el mascio (maiale).
Dopo la scola, alle quattro del dopodisnar , dovevo svodar la grassa dalla stalla e portarla nella posta drio el portego del Dolfo, far do compiti en prescia e nar a zinzolar col brasoloto, che me gaveva fatto me zio Pierino, drio le case. Zigheven tutti come matti , sette otto puteloti sul treno del Damiano.( en brasoloto posta'sora na barosola , con en volante de camion che so fradelo Virginio el gaveva messo en sieme ), i altri co le barosole su e zo per la contra'
"Ricordi struggenti"se dis adesso, a rigolarse nella neve, mizzi come i poiati(pulcini) , ariveven fin a la fontana vecia , se partiva da 'nzima alla contra' e dopo aver passa' el portego del Dolf rigoleven zo' per la valle e ne buteven tutti per terra per no finir dritti a n'muciarne nel bosco sora Arlanch . Suadai, coi diaolini (principio di congelamento) che ne ciapeva i dei (le dita) dei pei ,( me ghe' resta'na cicatrice sul deo piccolo) , ricordo che tornevo a casa a notte fatta e scappevo de qua' e de la'per no ciapar do visciade (scudisciate con una piccola cintura) dalla Mabile.
Tutti per uno e uno per tutti . I meio pero' l'era quei del 49 , el Fabio el Bruno la Valentina e mi ,el Giacomin. Al 13 Dizembre vegniva la sera de Santa Luzia, i diseva che de notte la passeva col mussatello (l'asinello ) e per ciapar qualcosa doveven portar for per le case en piatto con dentro farina per la Santa Luzia e sale per el musso . Mi nevo sempre da me zia Alma , dalla Rosina del Dolfo, dall'Addolorata del Tullio e a volte dalla zia Rosa, la mamma della maestra Luisa.
L'era tempi duri e poreti , la mattina, tutti emozionadi prima de nar a scola passeven a tor i piatti , sempre pieni de mandarini con qualche fruttin (caramelle) en po de galette (noccioline) , per finir no mancheva mai la carobola, quando te la magnevi la se 'nfileva fra i denti . Che festa zente , tutti i puteloti a contarse cossa ne gaveva porta' S.Luzia , el Sandro , nevodo della maestra Luisa l'era en sior , el ciapeva sempre zugattoi novi e noi eren en po 'nvidiosi ma anca tanto curiosi de saer cossa la ghe gaveva porta'. Al dopodisnar dopo scola neven sul so ponteselo sperando che el ne gavarea fatto zugar con lu , e resteven encantai a veder la macchinetta a molla che la correva da sola sul ponteselo o le picole statue de soldai e la pistola che la feva le sginze.
Che fiocae quei inverni, spesso en metro de neve, ne deven da far tutti a far en gran paiazzo de neve con en vecio capello e na carota per naso e do oci grandi grandi come i nossi sogni.
Braghe straze e rattopade, calzoti de lana recuperada dai maioni 'nfetridi, vecie mutande de moleton , sgalmere co le broche , co sto abbigliamento (cossi i ciama adesso el vestir), quando passeva el meson (spartineve) tutti ghe correven drio zercando de saltar su le ale , ma i stradini i se 'nrabieva e i ne mandeva via malamente e noi duri a correrghe drio zigando e urlando per la contentezza . Al 24 ariveva la vizilia del Santo Nadale , na festività de sentimento, niente regai ma pero' se podeva star en pe' fin a mezzanotte e nar a messa alla Riva tutti 'n sieme.
Ricordo che sotto l'altar de la Madonna se averzeva la grotta e per magia el Bepi Moncio sacrestan, el feva comprir el presepio , bello … co le statue grandi, el Bambinel fra el Musso el Bo ,la Madonna e S.Giuseppe , restevo li sempre 'canta domandandome endove el le scodeva durante l'anno.L'Ottone e me zio Pierino i 'ntoneva"Adestes Fidelis" e me ven ancora i brividi a pensarghe. Altri tempi, semprizi ma de amor e sentimento come solo en Vallarsa se pol trovar.
Ma el di' pu belo el pu spetta' l'era Santo Stefano , se copeva el mascio (Maiale) e l'era na gran festa.I omeni del paese i se trovava sotto casa, i preparava la mesa roversa'( una grande tinozza rettangolare di legno lunga un paio di metri) el mascio dispera' fra urli e zighi el vignva tira sora la mesa , i omeni i ghe tegniva per le zate , el Massimino el ghe deva na botta de quelle secche co l'ocio del manaroto sulla testa per 'nsemenirlo e me zio Pierino svelto come na volpe el ghe pianteva el cortelo dritto dritto nel cor, la Pierina col secio la ciapeva el sangue e la le miscieva perche nol se 'ntochessa per poder far i brigaldi. Quando nol respirava pu el meteven dentro la mesa e tutti ensieme coi cortei a pelarlo buttando sora acqua broenta per far el pelo pu morbio, na volta che l'era bel pela' sel porteva sotto el ponteselo e passa' na livera sotto i tendini de achille delle gambe el vignia tira' su' per le zate a pidolon co la testa en zo'. Li el vigniva squarta',se tireva fora le buele, el figa' , i polmoni ,el cor , la milza e i rognoni ;che se feva en tanti modi , ( figa' alla venexiana, e na bela fritura mista , le buele lavae tante volte per far le trippe ) el resteva tutto el di' taca' su a scolarse e alla sera el porteven su al caselo dal Primeto ) .
El di dopo se spolpava la carne, ,el lardo la se taiava a tochi e se la maseneva, do tochi de magro en toco de lardo con 15 per zento de musso magro (asino) come droghe en po se salnitro, sale e pever masena', dopo a pestar e misciar tutto per preparar la pasta (ogni tanto se feva na polpetta e se la coseva sui feri de la fornela con en bon bicer de vin ,se canteva tutti contenti, noi puteloti niente vin ma acqua.
El Primeto el laveva i buei nell'acqua broenta (nol so' come el feva perche' la scotteva tanto) mi girevo la manovela del masenin ( tritacarne) e me zio Pierino con grande abilita' el feva le mortadelle e i salami 'nsaccando la carne nei buei e stando attento che no ghe nessa dentro aria sino' le neva a male , le doveva durar fin la fine de Marzo.
L'era di de festa , se magneva carne tutti i di' e la sera per quindese di' se porteva nella camera vecia ',ndove ghera tacae su le mortadelle, en parolo de brase per sugarle e darghe en po de fumento.Perche' no le se tochessa fra de lore se meteva na foia de panocia , ghera su en profumo, che nevo su de spesso a snasar per contentar el naso.
Del mascio se magneva tuto e no se buteva via niente , nella la vesiga suta se meteva dentro el strutto da doprar con le patate, fritte en padella co la zigola .
Dicembre l'era finio
"Bon di' bon ano le vostre bone man a mi"
"Bon di' bon ano le vostre benegate a mi" .


Giacomo Sartori