EL BISSO BASTONER

N’a sera d’inverno, no nevo ancora a scola , me zio Pierino el me gha dito : ciapa el lumin ( lampada a petrolio ) e fame strada che nen zo’a far filo’ en la stalla . L’era ‘n inverno freddo e su le scale ghera el giazzo , bisogneva star attenti a no sbrisciar e no farse male .
Sen nai ‘n te la nossa stalla , ghe’ arriva el Massimino, la Mabile (el pupa’ e la mamma del Pierino) , la zia Alma , el Tullio e la Dolorata .
I se gha messi a ciacerar del pu e del men mentre el Pierino el me gha tolto sui zinoci el me ga canta’ sta’ canzon “ihh... ihh… toto’ cavallo… noi andremo a Malo… noi andremo a Schio… e e torneremo ‘endrio “ dondolandome con dolcezza che quasi me ‘ndormenzea .
Ghe’ riva’ anca el Celestino (el fiolo, de la Alma e cusin del Pierino e i gha’ scominzia’ a contar la storia del “bisso bastoner” de Mezzana.
Me zio Pierino l’era en ciaceron con en cor grande come el cielo, enveze el Celeste el stea sempre zito , el parlea poco , i gha’ dito che el s’era ‘nnamora’ de na bela putela ma nol g’havu’ el coraggio de dirghelo e dal dispiazer de averla vista sposar con en altro el se gha’ messo a parlar poco , pero’ se el gha zo’ en bicerot ‘l te conta tante storie bele, de paura, che le te par vere.
Tutti doi i ghaveva 26 anni , i se se gha’ messi a contarne la storiella : vizin all’albi”(l’abbeveratoio) ‘ndove beveva le bestie , il’ista’(l’Estate) passa’ , su en Mezzana, ghaven trova’ la pelle del bisso bastoner , tre metri l’era longa e grossa come ‘en brazo de omo .
La Rossa e el Merlo (le nosse do vacche le sbuffeva , forse la ghe pareva massa grossa anca a lore sta’ storia , ma le ne scaldeva col fia’ e cossi podeven sparmiar e’n po de legna perche’ l’inverno l’ he’ longo e duro.
El Celestino tra en bicerot e l’altro, l’era el vinelo del Primeto , fatto con de Fraga con en po de Casteler per darghe color, el gha dito : che en di’ mentre nevo su en Mezzana , vizin all’albi gho’ trova’ el Basilio della Riva ‘nzinocion…coi oci averti , pareva che el dormisse , ‘ntorno neanca ‘n useleto che canteva , i era tutti fermi sui rami ,… me son varda’’n giro e quasi me ghe ga’ ciapa’en colpo; sora al Basilio con la coa taca’ sul ramo del fo’, e co la testa a pindolon dritta e grossa davanti ai oci del Basilio ghera el Bisso bastoner , nero e grosso , el fischieva ..el zinzoleva avanti e ‘ndrio , el le ghaveva ipnotizza’ e l’era drio che ‘l magneva la polenta e la mortadella, el disnar del Basilio .
Me son messo a zigar dalla paura . I me gha’ sentio quei dei Marani che i feva el fen , i e’ coresti zo’ veder cossa suzzedeva , ma quando i e’ rivai el biss nol ghera pu.
El Basilio no ‘l se dermisieva pu e allora i gha fato en roll de rami, i le gha’ posta’ sora e tira’ fin a la Riva.
quando l’e’ arriva’ l’era senza cavei , el li ghaveva persi tuti dalla paura.
Tre di’ el gha’ dormi e quando el se gha dermiscia’ nol se ricordeva pu niente .

Che bela storia ma la me fea ‘n po de paura , lori i continuava a ciacerar e mi me son ‘ndormenza’.

Passanti e villeggianti , se ne en Mezzana ste attenti , ricordeve che vizin all’albi ghe’ el Bisso bastoner el ve ‘ndormenza per magnarse la polenta , ricoredevelo tuti , senno’ perde i cavei come el Basilio.




Giacomo Sartori