Ogni tanto , quando me rilasso pensando alla Vallarsa de na volta me ven en mente qualche persona che no ghe' pu ,en po originale . Ai Cumerlotti verso la fine dei anni zinquanta ghera el Gidio (Egidio) el pupa' della Pierina sposa' col Daniele Rigo della Corte , tanto per capirne l'era el nonno del Rino del Elio de la Pina e de la Luisa che le ga' sposa' el Gioanni e el Vittorio Croato i becheri della Corte. L'abiteva li da solo , perche so fiola Pierina l'era migra' en Francia 'ndove el Daniele el gaveva trova' da laorar per poder mantegner la so fameia e i so sette fioi.
Sto vecioto de ottanta anni alla mattina el svodeva dalla finestra el bocal del piss e guai a esser li sotto , tel ciapevi tutto en testa.
Quando nevo a trovarlo ensieme a me zio Pierino el me diseva " dai puteloto se te voi deventar grando ciapa en tochet de strachin e magna che el te fa ben " .
Tute le volte che el parleva co me zio el ghe diseva sempre " senti Pierino , quando moro ti te devi metterme en la cassa de legno co la testa gira' verso Mezzana , perche' anca dopo morto mi voi poter vardar i boschi e i prai , dighelo anca a la me Pierina."
"sta' tranquillo Gidio che ghel digo ,ma pensa a magnar e bever che te sei ancora en orso pien de salute" el ghe rispodea me zio.
En di' el Gidio el se ga' mala' e la Pierina la e' torna en Italia con tutta la fameia ( ricordo i putei grandi e grossi i gaveva fatto dei camion de legno co le rode de ferro , mai visto niente de uguale prima , solo en Francia se le trovea , noi puteloti eren incantai da sti zugatoi e allora i ne le ga' regalai , l'e' sta na gran festa)
La Pierina e el Daniele i ga' deciso de portarse en Francia el nonno Gidio perche' ormai nol stea pu su le gambe .Lu nol volea narghe ,i gha suda' sette camise a convizerlo che ormai da solo ai Cumerlotti nol podea pu starghe e prima de partir i ghe ga'promesso che el sarea torna' ai Cumerlotti e che quando el sarea morto i le gaverea messo sotto terra co la testa gira'verso Mezzana .Poco tempo dopo el Gidio l'e morto en Fancia e no ghera la possibilita' per portarlo ai Cumerlotti.
Le resta' li 'ndove vive ancora en so nevodo ei so pronevodi.
Son convinto che 'n do che le' adesso el vede ancora Mezzana , e el vede anca i so nevodi l'Elio el Rino che i ga' giusta' la so casa e i ghe abita , i e' tornai a curar el so orto co lo stesso amor che lu el gaveva per la so terra e quando i varda Mezzana i pensa ancora a so nonno Gidio .


Sartori Giacomo