La casa della Gigia

Son vegnu’ en Vallarsa da Albaredo e arriva’ ai Matilori (no Matassone ma Matilori el se ciama), passa’ la stretta della Ciesa se vede tutta la parte sora della valle e come per magia su en dosso ghe ‘rampegae quattro case che le par vignue fora da na fiaba, le’ i Cumerlotti.
Passo le Aste e arrivo alla stradela che porta all’Ausele e li a sinistra meza ‘ndormeza’ ghe’ la ca’ de la Gigia, …. me fermo a vardarla , l’e rimessa a posto , i le gha’ compra’ i Gios, quei che vive de Lizzanela .
Resto ‘ncanta’… e ‘n te la me testa suzede en finimondo , me par de tornar endrio de quaranta e pu anni , quando ne gavevo dese.. undese e ‘insieme al Brunetto martin sen nai co la barosola (lo slittino piccolo) a zinzolar su la stradela de l’Ausele ,en dopo disnar , den zobia grasso .
Sen rivai sul stradon e la vecia Gigia ,i disea che la aveva pu de novanta anni , l’er li de fora piega’ per tirar su do zoche .Ne sen fermai e gaven dato na man a portarle dentro en cusina ‘ndove ghera el fogolar ‘npizza’, na vecia taola sporca , col tabielo con su en po de polenta ‘n tel piatto en toco de strachin coi cozzi (i vermetti) ‘n te l’angolo el paion per dormir.
Tutta contenta che la gaven giutada la ne ga’ dito : “Puteloti feme en po de compagnia che ve do’ qualcossa .” Sen nai de fora ,ne sen sentai zo’con ela , sulla bora (pianta di faggio) scaiada e postada sora do zocchi .
Ghera en bel sol , l’era la fine de Frebbrer (Febbraio) la neve la scioglieva e piccoi canai de acqua i te fea capir che presto sarea riva’ la Primavera.
Le gozze de acqua le cascheva zo’ dal querto , se desfeva i giazoi su la grondana.
La Gigia la ga’ tira fora na scatoletta de legno ‘ndove la tegniva el tabacco da snasar, l’era el vecio Santa Giustina ,e la ne gha’ dito :”tole’ putelotti ve regalo na bela snasada “.
Mi el Bruno nel sen messo su la man e ghaven snasa’ forte , stranudeven come i matti e i oci i se ga’ sgionfai de lagrime , le Gigia la rideva con la so faccia che parea pergamena .
“Vede puteloti mi son sola e la notte quando vago a dormir vedo i spiriti su ‘n Mezzana tutto lumini che slusega ,vedo anca quello de Mussolini (noi no saveven gnaca chi che l’era Mussolini) e nei siti de sora arriva le strie tutte vestie de bianco.Qualche volta le ven zo’ en cusina a magnar quel che go’ vanza’, mi fago finta de dormir sto ferma e no me movo cossi no le me vede e dopo en po le va de sora a tira le cadene.
Mi el Bruno gaven ciapa’ na paura e sen scappai e ….. la continuea a rider .
Alla sera,’n gual notte, gho ciapa’ el gonzal del latte, mel son messo su le spalle, son na’ alle Aste a portarlo al Caselo , no gho’ mai capio perche’ i altri i le porteva a la Riva e mi ‘nveze alle Aste da solo dalla Graziela ,‘ndove el di’ dopo passeva el Leoncino (il camion FIAT)) a portarlo alla SAV de Rovredo.
Nel tornar ‘ndrio l’era propri notte e gavevo na paura boia , el vento freddo soffieva forte fra i pini,vizin al pra’ dei siori (el pra’ ‘ndove i siori de Milan , i gaveva na casa alle Aste i se senteva d’Ista(Estate) a ciapar el fresco , dentro ghera do bele banchette colorate ma querte dalla neve ,(me zio Pierino el me diseva che l’era do Liberali , cioe’ i era dei siori)
Gho ‘ncontra’ come tutte le sere el Faustino che ‘el canteva.. el fifoleva.. sempre contento con na bora de fo’ (una pianta di faggio) su le spalle, (me zio el diseva che tutti i di’ ‘l taieva en fo’ dei altri el le neteva dai rami e le porteva a casa .)
El me ga’ saluda’ e domanda’ :”gheto visto la me Bolpe (la sua volpe, cossi ’l ciameva so sorella Letizia )” mi gho’ dito de no’ e go’ ciapa’ en po de coraggio.
Son riva’ alla ca’ della Gigia ,el vento tirava sempre de pu forte , me tremea le gambe … go’ sentio en colpo secco de vedri rotti e na finestra de sora che sbattea , mamma mia ….
Ombre e rumori , rumori che me parea cadene tirae, en cusina se vedea en po de luce del fogolar ma anca li’ ombre che girava , el cor nol sentivo pu’…. ero li fermo, le gambe paralizzae , me son fatto forza e me son messo a correr e per no vardar dentro la casa, go’ varda’ su en Mezzana , lumini che se ‘npizzeva e smorzava l’era i spiriti de Mussolini.
Che paura…. son riva’ a la fabricheta, na stradela far le prime case e li me son enzampa’, go’ fatto en rigolon zo’ per i scalini e go’ ‘nbugna’ anca el gonzal del latte .
Finalmente son na’ dentro casa e me zia Pierina che la me ga’ visto tutto tremante e pien de botte la ga’ ciapa paura e ‘sieme a me zio , la volea saer cossa ghera successo , ma mi gho dito solo che me son ‘nzampa’ alla fabrichetta , no voleo dighe la verita’, perche la Gigia la ga’ dito che no bisogna dirlo a nessuni , senno’ le strie le sarea vegnue anca en camera mia .

Zerto che a vardarla adesso de di’(giorno), la casa no la me fa’ paura, ma no ghe dormirea dentro de sicuro, perche’ no se sa’mai , le strie le pol tornar ancora e anca i spiriti de Mussolini.


Giacomo Sartori