Sto anno le’ el primo anno de scola , che per mi’ che non ero na’ all’asilo , perche’ el ghera solo ai Raossi deventevo mat dalla contentezza , finalmente ero deventa’ grande podevo entrar col Damiano ( Cumer) (el gha do ani pu de mi) en classe e farghe veder che non ero en boceta da tor per giro.
la maestra Anna, la la ne speteva nell’aula sotto la Canonica della Riva ( le scole nove non le ghera ancora).

‘Na sera , l’era i primi de Novembre del 1955 gho’ senti el Massimino (che ciamevo papa’ e faceva lo stradino ) dir “ stanot gho’ idea che el fioca e me tochera’ nar col meson “.
Non gho fato molto caso anca perche’ le fiocade degli anni precedenti le ghavevo za viste ai Cumerlotti, pero’ na piccola smania l’a ma ciapa’ , perche’ la neve la me piaseva tanto e gho’ fat fadiga a n’dormenzarme, ogni tanto me alzevo e daverzevo en po’i scuri per veder se’l fiocava, dopo me son e’ndormenza’.

alle sei la Mabile( la ciamevo mama) la me dermiscia e la me dis: dai Giacomin fa en prescia a vestirte e vei zo’ subito a magnar perche’stamattina ghe’ la neve e bisogn partir presto per la Riva per nar a scola , el meson l’e’ apena passa’.
Son salta fora come en scoiattolo,g’ho averto i scuri e sul querto (tetto) del Tullio ghera minimo trenta quaranta zentimetri de neve.
Su le mutande de moleton e le braghe ( le era sempre corte ) su i calzoti i era de tanti colori fati con i avanzi della lana dei maioni, su la maia de moleton e anca el maion , po con en po de fadiga me son messo le sgalmere ( ve le ricorde’???)
Zo’ per le scale ( le era de fora col pontesel ), el fea fredo ma nol sentivo, na lavada svelta de oci e de corsa a magnar la colazion col late della sera prima, quello de la Rossa (la nossa vacca), con sora la pana “che bon che l’era” e dentro polenta mola per far la mosa e’n pienir la panza , sempre famada..Dopo me son messo la zacoza de carton ( la Cartella )su le spalle g’hera dentro en libro e do quaderni con na pena coi pennini ‘na matita per far le aste , i conti noi ghaveven ancora scominziai.

Quando sen stai pronti ghaven aspeta’ el Damiano (Cumer ) L’era el pu grande de noi , el Bruno Martin (Cumer ), la Valentina (Cumer ,sorella del Damiano ) el Fabio (Gios) , i altri pu grandi i era za nai via per zugar co la neve.
La maestra Luisa ( me la ricordo granda e grossa ) la ne gha accompagnai (beh…. ensomma eren sempre i pu piccoi )

La neve la vegneva zo ancora grossa e la poca luce che ghera la ne fea veder i sluseghini sulla strada entorno en silenzio de paze , che contentezza , aven scominzia’ a tirarne la bale de neve ma la maestra la ne gha zigha’:
“basta puteloti che fen tardi e no riven alla messa “, behh…. se saveva che prima de la scola ghera la messa.
Sen pasai da la vale e gho’ avu en po de paura ( penso anca i altri ) me sembrea de veder en gran mostro ma l’era solo en grosso fo’ ( faggio), cargo de neve coi rami piegai che i tocheva per terra.

Co le sghalmere se slizegheva en poco , doveven star atenti a no cascar , anca se la Mabile la disea che “el culo porta botta” ma el fea mal lo stesso . Gho visto delle orme e gh’o’ dito “Varda le orme de la volpe i gh‘a dit che l’altra sera la g’ha porta’ via ‘na galina al Primeto”( Primo Cumer quel de le primizie)
“ma vala’ no vedet che l’e’ quele del Levro “ el’ g’ha’ dito el Damiano, lu el saeva propri tut.

Sen rivai sul dosso della val de la Riva e li’ ne pareva de esser nel paese delle meraviglie , i foi (faggi) piccoli i era piegai sora la strada e i se g’aveva postai adosso ai foi grossi de soto fasendo cossi en arco de rami e neve ,l’era la porta del paradiso de sicuro, massa belo , da restar senza parole , ‘encantai , sen passai soto muti e silenziosi col timor che nessa via l’incantesimo.
No sentivo neanca pu i diavolini a le man ( i pizzicori del freddo sulle mani quando giochi a palle di neve ) i pei i era bagnai ma i me pareva suti.

“Su svelti” la dis la Mestra Luisa “de corsa a messa “. . Dopo la messa sen nai a scola e ghaven dovesto cavar le sgalmere e meterle vizin a la fornela e scaldarne anca i pei quasi congelai.

La porta del paradiso la gho’ vista tante volte d’inverno e no la desmenterghero’ mai , ma la prima volta me la tegno qua dentro nel me cor ensieme ai me amizi e a tuti gli incantesimi che solo la Vallarsa la la pol darne


Giacomo Sartori