Turide paisut pierdût su la rive dal Tiliment e dismenteât (?) da storie uficial dal XVI sec. (an prime an dopo).
S'j vignejs ju pa la strade SS. 463 che di Glemone a mene al punt di Cjasarse e ch'a è parallele dal Tiliment e a la più cognossude Pontebbane, vuatris i passarejs par Turide, e j restarejs scaturîts dal cjanpanîl, florentin par fente che da la vuestre bande drete (o di chê campe se corejs pal contrari) al jeve grant, possent e mierlât a saludaus cui monts furlans tal orizont e se il cîl al sarâ biel clâr ancje lis dolomitis. Turride par just, eco che il cjanpanîl al devente il simbul dal pais, e a lu àn volût j nestris nonos dal 1920 al 1925, par fâ jodi al mond ce ch'al voul dî il non Turide.

MA IL NON PRIME DI DUT…
Il non Turide al vèn di sigûr dal latin, ma a no si pô no crodi che ga prime dai romans, popui Celts o Gjai a si sédin plantâs su chiste rive dal Tiliment. Fâ divignî il non di Turide dal popul ch'al êre a stâ in Sarmatie, su li rivis dal flum Túras e ch'a si clamâvin juste apont Turitai al samee propit masse.
Lis ipotesis pui probabilis a si gjávin four dai insentaments da lis vilis gjalis-celtis pre-românis e a si pô cussí inmanealis: Villa turrita, dome une taviele colonizade e protežude; Cohors o Curtis turrita, un pocjs di cjasis in cercli cun t'un curtîl; Praedia turrita, cjamps o braide fuartificade propite dongje dai vâts o par tignî a mens j Gjaj-Celts; Statio turrita, statsion o puest di uajte sul vât dal Tiliment; Mansio turrita, albergo o louc di polse sul vât dal Tiliment; Castra turrita invessit come devantpuest militâr. A son dutis ipotesis ch'a podaressin jessi vêris, fasint riferiment al timp da la cjapàde e colonizatsion romane sucedude dopo la fondatsion da colonie di Aquileje a scomencâ dal 181 p.C.

E ANCJE UN FREGUL DI STORIE…

Turide, alore, plantade in uajte di un vât preziôs, fat da la grâve nete e aghe basse ch'a si scjaváce avonde ben cence fadîe, a á vût tant ce uadagnâ (e patî) di chist, fintremai a la tarde miege-éte.
Ce ch'al reste dai romans al ven four in'cà e in'nà, ma nissune campagne di sgarfament a è stade fate fin cumò.
Di chistis vieris presincis a fâsin di test ce ch'al reste di une vile romane databile cun t'une vore di probabilitât dal miec dal I sec. p.C. al II sec. d.C., e ch'a è ancjemò di tirâ four da la cjere, e tancj âtris tocs sparnicâts paj cianps e cumò tignûts cont taj museus di Cividât , Udin e San Denêl.
Ancje s'a è da bande campe dal Tiliment, vignaress a staj in provincie di Udin, Turide a è simpri stade sot da diocesi di Concuardie Sagjtarie che cumò a è la diocesi da provincie di Pordenon. Chê difat a comandâve di animis e ancje di dirit ancje su lis cjeris di ca da l'aghe. 'Tal 1186 une buele dal  Pape Urban III a fevele pa prime volte la Plebs de Ripis, sote da diocesi di Concuardie, e i studiôs, ducju dacordo a an dite che chist non aj tocjâve a Turide. Il paisut dongje dal nestri, al varès acjemò chist non. E a è propit d'in chê volte ch'j si cuntindìn il non da Plêf e ancjemò uè la discussion a è dal dut viergude a di cui ch'al voul dî la sô. Difat Rivis, al sta pui a sud di Turide di 1,5 Km. ma al è simpri stât pa Gesie sotan da Plêf di Turide, e chê a si vêve distacade prime da pui viere matrice di San Gorg da Richinvelde a dut uè ancjemò di là da l'aghe. Ma a bisugne spetâ tal 1227 per vê ta un document il non palês di Turide, ta 'ne cause pa paronance da Plêf. Alore se tal 1174 il nestri paisut al êre sotan da Plêf di San Gorg e tal 1227 invessite al è giaromai di bessôl, eco che la dade dal 1186 a larèss propit a pinel cun chê di vere separatsion di Turide da sô matrice di San Gorg; e propit in chê volte a varèss vût par intant il titul di Plebs de Ripis in spete da dediche come fintremai cumò a San Martin di Tours. Però, .tignint amens i tocs cjatâs, datâts di prime d'in chê volte e dal timp langobard e ancje la dedicatsion a San Martin, facil ta ête da dominatsion dai Francs, a si pô gjavâ four che a esistêve gà in chê volte une gleseute palntade su la rive campe dal flum e che dopo a è deventade la plêf che uè a esist.. Al reste però ancjemò di savê indolâ ch'a a varès vût di stâ chiste fabriche , se dongje Rivis o dongje Turide. Lis cjasis però a êrin di sigûr pui lontand di cumò, e chês di Turide squasi di sigûr pui a sud- sud ovest la che al dì di uè a è la grave. Une montâne disatrose (una das tantis) sucedude intôr dal miec dal XVIII sec. a sdrumâ dut il paîs, restand par memorie dome un toc di mûr di chê cjase fàte su pui in alt di dutis chês âtris e che uè a ten su une cantine. Il pais ch'j jodejs cumò al è stât fat su gnouf daspò di chê ultime montâne e ta une das cjasis pui vecjs a saltâ four t'un clap scuadrât la date dal 1756.

E AL ÊRE ANCJE UN CJSCJEL
Tal scomencâ dal sec. XIII tal nestri paisut a stâve un presidi di soldâts di Albert, cont dal Tirol, che daspò a lu molâ al Patriarcje. Podopo, Turide, che in chê volte a vêve di sigûr un cjscjel, e cumò al è sparît dal dut, a lê a finîle sot i siôrs di Spilimberg-Cuccagne (sec. XIII), e ancjemò sote i nobii di Cjscjel (sec. XIV). Di sigûr dute la impuartance di Turide in chêi secui a vignî dal vât dal Tiliment, che tajand tal miec la Patrie dal Friûl al êre un ostacul pal fevelâsi e passâsi ordins tas paronancis dal Patriarcjât. S'j varejs la volte di jodi i museus vaticans j cjalarejs di sigûr ancje une piture a fresc dal cincent, ch'a mostre la mape dal Friûl, e ancje Turide a è segnade tant chê un louc impuartant da Patrie. Daspò lis lotis intestinis dai feudataris furlans, il pais, garomai di tantis voltis sedeât mo di une mo di chê âtre bande, al lê a finîle sot la paronance daj siôrs di Savorgnan fintremai al timp venezian (sec. XV-XVIII). Cence chês ueris disatrôsis, a êrin lis barufis fra lis vilis par passonâ, ch'a a tormentâvin chej pôs ains di pâs, ma tal miec ancje il timp al fasê patî la nestre int, fintremai che tal 1797 Turide a si cjatâ un'âtre volte in guere par cause da prime speditsion napoleoniche. Cun Napoleon ancje l'autonomie pulitche dal nestri paîs a finî, parceche, gjavade la Vicinie, al vignî metût adun insieme cun chej âtris par fâ chel che uè al è il Comun di Sedean, cun Municipi propite Sedean. Daspò, tal 1818, la Plêf a vignî gjavàde da diocesi di Concuardie e tacade fintremai al dì di uè a l'arcidiocesi di Udin.

E UE'?
Lis cjasis di uè a si son slargjadis tôr i prins dal '900 ma i telârs vecjus dal '700 a tègnin duro ancjemò benon. Soredut cualchi cjase a è restade ancjemò dal dut intêre ta sô architeture e ta sô rusticitât dal miec '700, ven a staj da l'ultime fàte su dopo chê montâne ga contade prime. Ancje la glesie di cumò a tornârin a fâle su dopo il 1756 parsôre di une gleseute di avôts e dedicade a Sant Valantin e che cumò a è deventade la sagrestie. Da la glesie viêre a si à salvât da la rabie dal Tiliment dome chei che al dì di uè a son deventâs i pilastris da puarte grande, scalpelinât tal 1516 di Toni Pilacorte e il batistêri dentri ta glesie, fa deventâ di une pile di aghe sante fàte simpri dal Pilacorte tal 1506. L'architrâf invessite, simpri da puarte grande, al è ce ch'a reste da gleseute di Sant Valantin e al à scalpelinât in tal miec il steme cu l'arme Savorgnan, segnâl che di sigûr la gleseute a êre di chê famee.

S'j volejs ancje fâ une biele cjaminade in relax e in sante pâs il Tiliment al è dongje e ancje la biciclete a pô côri cence fastidis in tal miec da la natûre ancjemò avonde salvadie e intêre, pur vìnt dongje ancje i cjamps. Il parco da lis arcacis indolà che il mês di jugn j vin ogni an l'an la "sagre dai cais" al è ancje un bon puest par fâ scjampagnadis, baste mètisi dacordo cu la Pro-loco.

A 500 m. pui a nord di Turide, al è Ridincic, ancjemò pui picul ma cun tante storie tanche Turide e paralele, al pô dâus une gleseute ch'a podarès jessi dal IX - X sec. ancje se ruvinade tal '700, ma cun dentri un bielissin ciclo di pitûris a fresc (sec. XIV - XV).
Un km. pui a sud invessite al è  Rivis che dentri tal cimitêri al ten cont un'âtre biele gleseute (del XV sec.?) che ancje chê a è piturade a fresc e lis pitûris a samejn a chês di Ridincic, ma jessint ancjemò sòte la malte a no si pô jòdi pui di tant, ma in curt a si spêre di tiraju four. In facie dal Tiliment invessit, in bande da puarte grande, al è piturât simpri a fresc un grand Sant Cristoful, un tic frujât e smavît ma ancjemò gjoldibil.

A est di Turide la sente amministratîve dal Comun, Sedean al pô fâus jòdi un cjastelêr preistoric dai pui ben tignûs cont ancje se cumò al è un cjamp di sports; e la gleseute dai Sants Pieri e Pauli cun lavôrs dal XVI sec. del Pilacorte.

A nord-est di Turide e a 1 km. di Sedean, il paîs di Codêr al à jodût a nassi  p. David Maria Turoldo e la sô cjase 'la ch'al è nassût il poete a è vierte al public pa visitis e a ospitee cetantis manifestatsions culturâlis e soredut la asociatsion ch'a è intitulade a lui.
A rèstin acnjemò doi paîs tal Comun, Sant Lurinc e Grediscje e chiste ultime a pô mostrâ ce ch'al reste di un âtri cjastelêr (j sin dongje di chel di Sedean). J podejs ancje domandâ di pui e cjòli la mape dal comun tal Municipi in place a Sedean.

Chiste pagjne a è stade fate dal grop di animatsion culturâl Pauli Pressacc di Turide, grasie par vêle jodude e vignejt a Turide.
Lis notizis di chistis pagjnis a si cjàtin tal libri Turide di p. Toni Pressacco (biblioteche o municipi di Sedean); Cjscjei dal Friûl di Tito Miotti; San Martin a Rives d'Arcjan relatsions goraine da sorintendece pai bens culturâi dal FVJ. E âtris libris lejûts e jodûts e chê cumò 'j no mi impensi il titul. Ancje mês ideis ancje s'a no vàlin fregul.

Torne a cjase