Alpinismo

	In Val’Anzasca i ghan…iutèm a dì, ul Re, l’Imperatôr di nost coloss, com di giascè tant grand da sbalordì: quel sì pai alpinista l’è un bel oss! Ma ul Monte Rosa ugh serv par fa dla blaga; is férmin quasi tucc a Macagnaga. In Val’ Antrona i ghan ul Pizz d’Andola, tremila quatarcent e ‘na frazion; che bel s’u fuss un dolz ad pasta frola! l’è invece tanto brusch par l’ascension, che quand us torna ai cà d’Antronapiana us scerca domà ’l lecc par fa la nana. In Val Bugnanch i ghan ul Pizz d’Azoli; us vegh benissim s’a vardei dal pian; la cresta la par lissa comè l’oli, ma par mangiàl l’è mia un biciolan; se dopo a San Lorenz av riposei a sentirì ch’a ghi pesant i pei. In Val Divedar, quela dul Sempion, i ghan dadrè da Varz ul Mont Cistela; am disarì ch’a parli par passion, ma quela l’è la scima pussè bela; negh’su, vardev intorn quand l’è seren e dopo am savrì dì s’a parli ben.
		Torototela, Rime ossolane