Tri sunnu li ben vuluti:
Buffuni, ruffiani, e gran curnuti.
Ammatula a stu munnu studiati,
D'aviri boni tratti e mai tramuti,
Ammatula cu l'isca li circati
Nò li truvati, pri vui su finuti;
Megghiu chi stu pruverbiu v'insignati,
Tri suli sù a stu munnu ben vuluti,
E pri secunnu fini primiati:
Buffuni,ruffiani, e gran curnuti.
Cui ha picca dinari sempri cunta
E cui ha bedda mugghieri sempri canta.
Cui ha poca robba và circannu junta,
Cui ha bona mircanzia sempri si chianta,
Cui avi troppu curaggiu non appunta,
cui avi bona cuscenza mai si scanta,
cui avi pocu russuri mai s'affrunta,
Cui avi onuri a vrigogni non ci 'nguanta,
Cui avi picca dinari sempri cunta,
E cui ha bedda mugghieri sempri canta.
L'omu ca si marita nasci e mori
Amicu, mentri liberu poi stari
Ascuta, e scrivitilli sti palori;
Non t'hai a circari mai di maritari,
Si non voi angustiatu lu to cori:
Paci lu maritatu un pò truvari,
Suspira 'ntra cuntinui scattacori,
E notti, e jornu lu senti gridari:
L'omu ca si marita nasci, e mori.
Cui si marita sta cuntenti un jornu,
Cui ammazza un porcu sta cuntenti un annu
Cui si marita sta sempri in frastornu,
Cui ammazza un porcu la passa scialannu,
Cui si marita si scanta d'un cornu,
Cui ammazza un porcu non timi di dannu,
Cui si marita rivali avi attornu,
Cui ammazza un Porcu non avi st'affannu,
Cui si marita sta cuntenti un jornu,
Cui ammazza un porcu sta cuntenti un annu.
La muggheri d'autru sempri pari chiù bedda
Un dissolutu peju d'una badda
Furria, e siddu trova nna gunnedda
Fitusa, a quattru botti si cci aggadda,
Puru avissi pri mogghi un'angiledda:
St'omu non è cavaddu d'una stadda,
Fissu non mancia mai 'ntra nna scutedda,
Anchi ch'avissi a Veniri a la spadda
Pr'iddu la mogghi d'autri è sempri bedda.
Quannu d'avanti v'abbrazza la donna,
Tannu d'arrei vi tradisci, e 'nganna.
E' pazzu dd'omu ca cridi a la donna,
Cchiù pazzu, quannu poi pr'idda s'affanna,
E si la cridi amanti, si lu 'nsonna;
La donna è chiù vacanti di la canna:
Quannu vi pari nna ferma culonna,
Tannu la testa l'avi a nautra banna;
Quannu v'abbrazza e pari nna madonna,
Tannu d'arrei vi tradisci, e 'nganna.
Tannu la donna sta ferma ccu unu,
Quannu lu turcu si fa cristianu.
Tannu lu saziu cridi a lu dijunu,
Quannu la sciara diventa un pantanu;
Tannu lu latru no robba cchiù ancunu,
Quannu diventa papa un maumettanu;
Tannu l'avari di bon cori sunu,
Quannu addiventa lu tirannu umanu;
Tannu la donna sta ferma cu unu;
Quannu lu turcu si fa cristianu.
Donna senza onestà non fu mai bedda.
Tu di li beddi ti senti la gadda
Sebbeni un pocu si scustumatedda.
E nuddu ci avvicina a la to spadda,
Pirchì nenti ti ciaura la unnedda;
Ma senti unni ti rozzula sta badda,
Comu la facci stu muttu ti fedda
Donna senza onestà tinta è di gadda
E mai a lu munnu è tinuta pri bedda.
L'amuri è comu lu citrolu,
Cumincia duci, e poi finisci amaru.
Pari 'nprincipiu l'amuri un cunsolu,
Ma quannu è a longu diventa un succaru;
L'amuri pari un nenti, a primu volu;
Ma quannu avanza non cc'è cchiù riparu:
'Ntra un forti amuri sempri è cchiù lu nolu
Di la so mircanzia, e mai va 'nparu,
L'amuri 'nsumma è comu lu citrolu,
Cumincia duci, e poi finisci amaru.
Tutti omini non su chiddi ca pisciunu a lu muru.
Curaggiusi un poi diri amicu caru
A chiddi ca caminanu a lu scuru.
Nè a chiddi diri poi ch'hannu dinaru
Benchì cci vidi cchiù di un pezzu duru:
Tanti cosi a lu munnu si sgarraru,
Ed un muttu magnificu e sicuru,
Tutt'omini non sunnu: oh! muttu raru
Dissi, chiddi ca pisciunu a lu muru.
Lu pisci feti di la testa
Ti lagni ca to figghiu è un cabalista,
Ca notti e jornu ti teni 'ntimpesta,
Chi 'ntra li jucaturi è misu a lista,
E cu tutti li vizii fa festa:
Però cui ti conusci a prima vista,
E sa la to condutta disunesta,
Ti dici, è curpa to cusazza trista,
Mentri lu pisci feti di la testa.
La fami fa nesciri li serpi di la tana.
La fami stizza a qualunqui pirsuna,
O distinta, o plebbea, sacra, o profana;
La fami fa la genti cchiù latruna,
La fami fa la fimmina puttana:
La fami sulu un jornu tregua duna,
La fami non si soffri nna simana,
La fami è tantu mulesta, e 'mpurtuna
Ca serpi fa nesciri di la tana.
_____________
Proverbi Siciliani
ridotti in canzoni
dall'abate
Santo Rapisarda
di Catania
- Dottore in filosofia e Medicina -