Ricette

TIPICHE RICETTE SICILIANE SCRITTE NELLA NOSTRA LINGUA

PASTA CA’ MUDDICA

'Ngredienti: Agghiu, chiappara, muddrica, sarsa di pummaroro, sardi salati Sali, ogghiu.

Spiddari l’agghiu e tagghiallu tunnu. Pigghiari na’ paredda ranni, pi’ fàrici tràsiri a pasta, mettiri l’ogghiu e l’agghiu, cun’ pizzicu ‘ri sali. Quannu è caura iccàrici 'na bedda manciata di muddica, rusuliari e iùnciri a sarsa di pummaroru, un cucchiarinu di chiappara, e du’ pizzudda ri sardi salati, rimuniari e astutari. Quannu a pasta è cotta e sculata, ittalla rintra a paredda e riminari ancora.

ALIVI SUFFRITTI
 
'Ngredienti pi 4 pirsuni: 200 gr. d'alivi nìuri, 2 spìcchia d'àgghiu, menzu biccheri d'acìtu, 'na sponza 'i rìjnu, ògghiu q.b.

Lavari e sculari l'alivi; poi mittìrili 'nta 'na padedda cu 'na picca d'ogghiu e i du' spìcchia d'àgghiu nnittati e scacciati;fàrili suffrìjri. Allungari 'u suffrittu c'acìtu e fàrilu svapurari 'na picca. Passari l'alivi 'ntòn piattu, saliàricci 'i supra 'u rìjnu, e sèrviri càudi.

 
CRUSTULI 'I CANNALUVARI
 
'Ngredienti: 450 gr. di farina, 150 gr. di zùccaru, 50 gr. di burru, 50 gr. di latti, 1 biccheri di marsala, 1 ovu, 1 bustina di vaniglia e 1 cucchiarinu di sali; saìmi q.b.

Sistimari 'a farina a funtana e mittìricci dintra 'u zùccaru, 'u burru,l'ovu, poi jùnciri 'u latti, 'u sali e 'a vaniglia e 'ccuminzari a 'mpastari; rimèttiri 'u 'mpastu a funtana e jttàricci dintra 'a marsala. Travagghiari 'a pasta pi 20 minuti; scanàrila e ritagghiàrila a crùstuli chi si pàssanu a frìjri cà saìmi.

 

PASTA CU BRUCCULUNI E BRUNA

 
'Ngredienti pi 4 pirsuni: 1 kg. 'i brucculuni iancu, 400 gr. i' pasta cannarozzu 'i mònacu, 250 gr. di bruna sicchi e senza nòzzulu, 100 gr. di pruvuletta a pizzudda, 40 gr. di passulina, 40 gr. di picurinu 'rattatu, 2 ova sbattuti, 20 gr. di cannella macinata, ògghiu d'aliva sali e spezzi q.b.

'Nta acqua 'nsapuruta 'i sali còciri 'u brucculuni e i bruna, e 'nta 'na pignata 'a pasta cannarozzu 'i mònacu. Priparari 'a conza sbattennu i du' ova e juncènnucci 'u picurinu 'rattatu e 'a cannella. Frìjri 'nta 'na padedda 'u brucculuni cottu e tagghiuzzatu e puru i bruna, 'a pasta cotta e sculata, i pizzudda di pruvuletta, 'a passulina; 'rriminari e 'nsapuriri di sali e di spezzi; cumigghiari cà conza e passari ò furnu. Quannu 'a conza è 'ncrustata, 'a pitanza è pronta.