Poeti Napoletani
Ferdinando Russo
'A Napulitanella - 'A Madonna de' mandarine - Carmenella
Avite
visto maie duj’ uocchie nire
cchiù gruosse e avvellutate ‘e chisti ccà?…
E sta faccella pe ttirà suspire,
l’avite vista male, ‘a verità?…
A chi aspetta? A chi penza, sta nennella,
e dint’’o core che nce tenarrà?…
Comme se chiamma? ‘A Napulitanella!
E ‘a gente nce se perde, a sbarià!
Quanno
ncielo n'angiulillo
nun fa chello c' ha da fa',
'o Signore int' a na cella
scura scura 'o fa nzerrà.
Po'
se vota a n' ato e dice:
--Fa venì San Pietro ccà!
E San Pietro cumparisce:
--Neh, Signò, che nuvita?
--Dint''a
cella scura scura
n' angiulillo sta nzerrato:
miettammillo a pane e acqua
pecché ha fatto nu peccato!
E
San Pietro acala 'a capa
E risponne:--Sissignore!
Dice Dio:--Ma statt' attiento
ch' ha da sta' vintiquatt' ore!
L'
angiulillo, da llà dinto,
fa sentì tanta lamiente…
Meh, Signò, dice San Petro,
pe' sta vota…nun fa niente…
Nonzignore!
Accussì voglio!
Statte zitto! Dice Dio;
si no ognuno se ne piglia!
'Nparaviso cumann' io!
E
San pietro avota 'e spalle:
Da la cella scura scura
L' angiulillo chiagne e sbatte,
dice 'e metterse paura!
Ma
'a Madonna, quanno ognuno
sta durmenno a suonne chine,
annascuso 'e tuttequante
va e lle porta 'e mandarine.
Chill’
uocchie nire ‘e Carmenella mia
te nchiuvavano ‘a gente a ciente passe!
E chella vocca: era na frenesia!
C’ addore e che sapore d’ ananasse!
Io mo vulesse ca s’ allicurdasse
quann’’a ncuntraie arreto a Vecaria!
Vurria vedé si se ne ridarria
Comm’ a tanno, e si ancora arrepassasse!
E si tanno ‘a sparaie, ma n’’a cugliette,
e m’ arrestaieno mpont’’o vecariello
pe’ causa ch’ ero ancora nu guaglione,
mo pe’ sfreggio, pe’ sfizzio e pe’ dispiette
m’’a guardasse cu ll’ uocchie a zennariello
e lle facesse ll’ atto c’’o bastone.
Poeti napoletani é una poduzione PARTENOWEB