Nun sonano 'e campane,

l'organo è muto ...

luceno 'e cere d' 'o Sebburco;

ma tutt' 'a chiesa è scura;

Cristo è muorto.

Già fora, mmiez' 'a via

nu suono cupo e tammorre

ca fa 'mpressione

e 'o coro 'ntona 'o Miserere.

So 'e sette ...

Esce 'a sulitaria mprucessione.

Gioverì Santo, comme ogn'anno

d' 'o milleccincuciento 'a stessa croce.

Sape 'a storia 'e tanta gente

addenucchiata a ogne puntone 'e via:

n'ha visto facce, n'ha 'ntiso voce pria cu fede

ha cunusciuto 'e patre d' 'e patre,

chi è partuto e nunn' è turnato;

s'arricorda 'e ciardine ca so' sparute,

sape tutto 'e stu paese

cresciuto comm'a na città.

Tutto cagna attuorno

ma no stu trunco antico

ch'ogn'anno 'e chistu juorno ha da passà.

Cull'ate pur io addenucchiato

prego a sta croce

p' 'a vita, p'ammore, p' 'a pace.

                                             Ciro Ferrigno

                (da "Tiempo 'e Passione" )