POESIE IN DIALETTO FOSSATESE
I brani che saranno pubblicati sono opera di un poeta dilettante figlio di Fossato, lo stesso che ha scritto il Dizionario Fossatese: Ninì Pellicanò
ASSOCIAZIONE CULTURALE "CALABRIA CANTA"
IV^ EDIZIONE DI POESIA IN DIALETTO CALABRESE
I^ CLASSIFICATA TROFEO "MIMMO MARTINO"
NA SIRATA I LUNA ( O ME' PAISI )
Nti na sirata i luna primalora
tutt'un silenziu; nissunu zirriava.
Pu tantu caddu, era ssittatu fora,
sulu na' lantirnedda filiava
I stiddi si cuntavinu a mmiliuni,
mpizzati ddà: parivini buttuni.
U venti vers'o celu si ndi jva
e mancu na pagghiuzza si muviva.
Nc'era cu'a Ddìu ringraziava
pu pani ricivutu sta jurnata,
mentri cu tutt'u cori nci spirava
paci stanotti e saluti in mattinata.
Di chiuppa, di canniti, di rangiari,
di cavuli chi sunnu cavulimi
di fogghi mpassuluti i patatari
nenti si movi. Parinu pitturi.
L'acqua i mbivirari u sulu scrusciu,
pari nu mindu nfatatu e ssenza vita,
pari na paci doppu u scatafasciu
pari na puma rrussa ..... ngiallinita.
Ma non è morti! Non si firmau a vita!
I pecuri intr'o vecchiu tavulatu,
i vacchi sutt'all'arburi o i pinnati,
pigghinu hjatu ndo rimasticatu,
guardinu all'addu, parinu ncantati.
Dorminu l'animali di stu mundu
ma cu non dormi cerca mi capisci:
pirchì' u celu è ssempri senza fundu?
pirchì u mari è ssempri chinu i pisci?
Na nigghiata nci passa lentamenti
davant'a luna. E ppari chi ss'ascura,
ma torna chiaru mmidiatamenti
mari, muntagni e tutta la natura.
A scala d'oru nsina o celu nchiana,
i stiddi chi ddiventinu brillanti.
A luna a ppocu a ppocu s'alluntana.
Guardu pi mmi vidu l'angiuleddi
cu stu silenziu, cu stu chiar'i luna
fazzu finta chi ccantu canzuneddi,
mentri mi cut' i stiddi a un'a una.
Nc'esti na mamma fora du bbarcuni,
guarda ndo celu a stidda cchiù lucenti,
pensa e figghi so' chi ssu luntani
cu tutt'u cori prega ndo stramenti.
A nnenti diri vers'a menzanotti,
nu riddu sutt'a 'mpedi i bbrundulidda,
di tuttu stu silenziu si ndi futti,
cantandu va' an cerca da so' ridda.
I tandu accà passaru cinquant'anni,
i stiddi sunnu sempri ddà mpizzati.
Non ndavi cchiù pinnati nè capanni,
i "saluttini" su tutt' a vitriati.
Non ndavi mancu fimmini cu tuppu
i signurini sunnu 'mpumatati
e l'anziani su quasi tutt' a luttu,
e mancu figghiolazzi strati strati.
Nc'esti cu dici chi cangiau u mundu.
Non è vveru! A luna è sempri tunda,
u mari è cchinu i pisci, u celu è fundu,
e ll'arburi fannu sempri a stessa frunda,
Ciuttostu chi cangiau l'umanità,
superbia, machini e nenti carità.
Comu cangiau i cinquant'anni accà?
I frati si pigghiavinu a cazzotti,
armenu si tuccavinu chi mani
ora, capaci, pigghiunu u ddubbotti
quantu mi si teninu luntani.
Tandu, è veru, si sudava u pani,
i monacheddi erinu sapuriti,
bbastava na friuta i mulingiani.
Ora, gni jiornu, maccarruni i zzita.
Passinu l'anni! Eu sugnu anncor'accà
mi mi rricordu.... nu mundu di bontà.
Cu barbarott’o pettu ( 18.07.97 ) Cu bbarbarott’o pettu nci su ttanti : cu si virgogna mi ti gguarda ‘nfacci ; cu spera mi s’ammuccia i so’ Katrichi . Na fimmina si gguarda u’ suttapanza; cu du cuvernu orma’ pirdiu a spiranza; cu vai mi nci cerca nu favuri ; cu torn’arretu chi pirdiu a so’ facci ; cu gguard’appena undi menti i pedi ; U rriccu, u bbenistanti, lu cafuni ogni ttantu si votinu p’arredi. Cu bbarbarott’o pettu u zzi Natali ca bbirritta calata supr’a ll’occhi a’ ncoddu porta ‘mmazzu di pidali muggheri e figghi so’ ndannu i pidocchi. Cu bbarbarott’o pettu Fulumena si nnaca tutta mentri chi camina a ccu non vidi nci mmustra la suttana facendu a’ ffinta ch’esti signurina. Cu bbarbarott’o pettu mastru Petru Camina tutti i jorn’a mmenz’a ggenti Vu ‘mmagginati ch’esti bbasciapedi, ch’esti ggintili, c’a Ddiu esti cridenti cull’occhiu sguerciu, ambeci, gguarda arredi. St’attentu non mmi vidi i carbineri. Cu bbarbarott’o pettu donna Tita pi nnon ndari nd’all’occhiu a mala ggenti pur’idda faci a ffinta ch’è cridenti ma cerca mi s’ammuccia sgannamenti. Gguarda ccu nc’è?! Ové ? pur’idda ! testa calata e bbarbarott’o pettu. Ndo’ so’ riuni dinnu ch’è na stidda ! L’urtimu da culonna sugnu eu cu bbarbarott’o pettu e pinsirusu forsi non su cridenti e gginirusu m’armenu nda jurnata : U pens’ a Ddiu Pirchì l’urtim’i tutti sugnu eu ? cu bbarbarott’o pettu e u passu moddu ? no fazzu pi ppariri trusuleu .è..cchi, mannaja, ndaiu u ..torcicoddu FRISCANSANA ( 04.08.1998 ) Na bboriedda i ventu a tterrazzana, a rribb’e mari, quandu nchiana a luna. Senza pinseri e ccu sta friscanzana m’asperdu s’aju serbi o si patruni. M’asperdu di hjumari e ddi jadduni di cazzi rrutti, di fossi nto stratuni , di tassi e ddi tutti i Napuliuni chi cumandinu a nnu, poviri minchiuni. Eh! Sperditi puru di ggelati e mmuluni, dassa da parti frittuli e ccurcuci. Varda stu mari, sperditi da fami. U zzuccuru ndo sangu est’a to’ cruci Rrispira forti cu ttutt’i ddu primuni. Stu venticciolu menti tutti a’n paci. Stramenti passa: stu sul’a lliuni, A rrifriscata cuntamu i mbrugghiuni, si tinimu cuntu di spiuni..... Ma dassa stari.... Rrifrischiti i cugghiuni ! Dassa....: gnunu mi faci u so’ misteri e ccuntu mi nci duna...all’eletturi. SCIROCCU ( 12.08.98 ) Eh!...cala nu sciroccu a quagghjiatina ccuppa muntagni e rriva a la marina l’acqua salata ndi curri arret’a schina, a testa ggira chi ppari na firrina. Vogghiu pruvari na ffett’e muluni, forsi chi mmi poti stauddari, sta siti d’acqua, sta vogghia i cosi bboni e cchista testa mia ...poti pusari. Mah! È sciroccu e cchi ssi poti fari? Mancu stu fogghiu si poti jnchiri, cu stu bbagghiatu mmanchinìi palori. Ma nc’è carcunu chi sapi nsitari, tagghia e ncolla pi vintiquattr’uri. Mah! L’umitu nci caccia lu sapuri. cu stu bbagghiatu mmanchinu’ Mi ti nd’accorgi doppu i sissant’anni c’ambatuala priasti i Santi e Ddiu , - ora chi ssi po' ddiri senz’a ‘ nganni - chi scuru chi ssi fici ndi sta via, mancu na stidda nda stu celu niru, mancu nu poch’i luna mbacilia. Stutati sunnu tutti i lampiuni, nci mmanca l’acqua a tutti i cituleni, nci mmanc’o micciu nde lumeri a ogghiu. non ndavi mancu cira pi candili ! o scuru non nsi poti cchiù ciangiri ! Si nd’ha furtuna mi vidi n’atru jornu . S’u Patri ti dassa ndi sta terra, forsi chi nnon campasti sul’a ndernu, circandu paci e furiandu a gguerra ! Sulu chisti ti rresta pi cunsolu ! quandu Ddà ti trovi sulu....sulu ! DRUSIANA e SBRANDURINA ( 05.08.98 ) Bbongiornu, me cummari Drusiana ? Sintistivu chi nnov’a ajerisira ? Bbongiornu a vvu, cummari Sbrandurina. Non sacciu nenti. Ajeri ija pi ppira ! A figghia i mastr’Antoni lu bbarberi, rrivvau mpena m’esti signurina, jva e vviniva, sempri, avant’arredi, nfina chi s’ambarcaru pa marina. Erinu quattru cincu...."cavaleri" Dinnu chi ssi cugghju ca pansa china ! Cummà, com’a ssò mamma, tila tila! Ancora non sapimu i so misteri..... Iva e vviniva a lluci di candila.... Dicitimi, cchiuttostu: a Pitrulina ? Torna sempri cu ‘mmazzi di curizzi, vaci pu campu quasi gni matina! Certu non ndi sapimu di so’ lizzi !) No! No!, cummari Ddrusiana... A sira, a sira, va pà Malacrina, arretu d’idda parti Peppi ngiana. Si cogghinu cu ddu jidita di luna, chi rrobbiceddi tutti sbrinduliati, u mbasciu chi nci pari na mappina e ll’occhi rrussi e ttutti spiritati. Iddu s’annaca comu ‘nfil’i pagghia chi ppari ridduciutu a la mitati. Mah varda !, faci pur’a zzassa ! quandu si jsa i sutt’e jinistrari, Su fatti so’! Su dd’intra a so’ matassa. Dinnu cu’ cuvernu menti a tassa, pi figghiuleddi fatti fora jazzu. C’apposta la "mammina" passa e spassa Eh...vvu ! comu sa passa me cumpari ? camina sempri ddrittu o è "papazzu"? ...armenu mi vi dassa rrispirari . S’u ffruntu cercu mi vu ddrizzu ? Ferma, cumma’! Dassatimi campari ! non mmi s’ampara cu lu rrivulizzu ...trovu sempri mi pozzu paliari Eh ! vvu : chi spissu jt’o mulinu .... forsi purtati rrobbi di lavari ? o jti mi truvati o’ "principinu" ? Nenti pi nnenti, simu tutti gguali, ..mparamu l’arti e la sapimu fari. A veru...non simu nimali ! Facimu finta chi vva tuttu lisciu ! pur’a mmenz’e carduni e li cricali Mbasta non mmi s’avi a prubbicari I fatticeddi so’ si ponnu fari ! U maru muru ( 11-10-1997 ) Mina Cicciu, llonga Micu, acqua Ninu e, vva’ pi rrina. Quant’avi chi vvu dicu, viditi chi vvi cadi ssu cimentu! All’atru mpastu u facimu o’ cincucentu! Parrau u muraturi d’arti fina! A...pò,...non hjiacca, mpena si bbagna’ dopp’a prim’acqua. Facimu a prima manu di bujiacca, ....cacciatimi sti cosi du me cantu, viditi ch’eu a juntu a ccud’e vacca. Muvitivi: jungiti ‘mpocu d’acqua. Micu si jsa chi nci doli a schina. Eh, dammi ssa manicula cchiù ffina, atru cimentu e ddu palati i rrina. All’undici ncignammu stamatina, doppu chi turnammu da nasida chi nci ggiustamm’i scarpi a cavallina. A sudura rrivava nde gunocchia, e ccurri a soru mi ndi porta acqua. Mbiviti pocu ch’esti fridda assai, vi dassu sta bbuttigghia supr’a vasca. Quandu vi pari a vvu’ jam’e mmangiamu, ddu fungi d’ra n’annu scungelai..... Ora pparecchia fra ppocu muddamu, sulu sta mpastata ndi chiumpimu. Cu doppu pranzu, oh...chi vvaj’a ddiri: tumpi, tiritumpi e u muru ncuminci’a ssudari; tumpi, tirtumpi...prestu bbagnari, rrina, cimentu, a cassalora,...mpastari! Tumpi, tiritumpi e...a me’ testa ncumenz’a ggirari. Prestu chi ppi sei am’a ffiniri, Ninu, tutti i ferri po’ cugghiri e i caddareddi mi ncign’a llavari. Certu chi ssimu mastri i ntonacari, na bella fracassiata, pi llisciari. Va pigghindi carcosa pi mbiviri. Cugghimul’a mmunzeddu sta llurdia armanu ccuntintamu a soru Lia. Na sula stampa ndavi, e ll’atr’è ovu. Na bella sciacquariata e ppò u provu. Chissu no mmi piaci! Chind’av’atru? Nu culu d’amarettu, o puru vinu. Ma puru vermut friddu ndi mbivimu. Eu sugnu prontu, nchianu p’ammunti. Eu sugnu prontu pa casa vaiu Eu rrestu sulu...e cchi ffazzu? Mi ment’e scrivu! Navigare....in questo mare ! ( 04.05.1999 ) Cu ffurienza naviga’ stu mari, quand’erinu liggeri l’anni mei. Ora c’a bbarca ncigna a bbrafagghiari fazzu chi gguard’all’addu pi ffulei cu ndavi ggiuvintù poti passari . Pozzu ciangiri tutt’i larm’amari . Nesciu da casa tuttu llicchittatu cammiscia dintr’e cazzi Cu ffurienza naviga’ stu mari, quand’erinu liggeri l’anni mei. Ora c’a bbarca ncigna a bbrafagghiari fazzu chi gguard’all’addu pi ffulei cu ndavi ggiuvintù poti passari . Pozzu ciangiri tutt’i larm’amari . Nesciu da casa tuttu llicchittatu cammiscia dintr’e cazzi Palori ( 23 - 10 - 1998 ) Nd’avi ‘npocu chi nnon trovu palori mi dicu quanta luci faci u suli, mi dicu quant’è bbellu chistu celu, mi cuntu li culuri di stu mari , mi dicu quanta forza nd’avi u ventu.... Nenti mi dicu du virdi i sti muntagni mi sacciu i stiddi quantu su luntani, s’a luna faci sempri u stessu ggiru si nda sti campi nc’è sempr’a virdura..... Nuci, castagni: gnunu ndo so’ rregnu, cirasi, mmenduli, puma di cutugni, pira di ggiugnu nfin’a ttuttu l’annu, rrosi, carompuli e hjuri p’ogni jiornu. Mi sacciu com’è fatta st’armunia, comu si faci luci e mmenzanotti e quantu cunta a viticedda mia, a mmenz’a sti miliardi di crischiani . Senza ‘nvidia e senza nostalgia di quandu vinni nsina a punt’i morti. Cudduredd’e festa ( 16 – 09 - 98 ) Vuliva nu mors’i pani a cudduredda, fattu di casa nda nu furnu a ligna, chi cimi di hjnestra e di castagna, quantu mi provu mmors’i costicedda , - doppu chi salutu a Madunnedda - pigghiata nda caddara a San Fulippu, senza pisari ‘nchil’e mmenzu i lippu . Eh, ddopu ‘ncocc’i calia i ddu cotti, e m’bicchireddu i chiddu i ll’atri porti cu ‘nfilu di cazzusa ca pallina . |
|
Per non appesantire la pagina, già abbastanza ricca, apriremo
un'altra da cui si può accedere cliccando su poesia 2