Tenpu fa insce'n banchettu da repesin ho atruvòu 'na myxicascetta d'u 1983 cun d'e puexîe de Firpu interpretæ da Linn-a Vulunghi, Sandru Bobbiu e Etture Giöxepetti.

Gh'é chi cunscíddera a nòmmina de Eduardu Firpu (1889-1957) stramezyaa á petu d'u valure artísticu d'e so cunpuxisyin.

De segŷu u so zeneize u nu l'é d'i ciy viâxi.

A prunúnsia di 3 intèrpreti, pôi, a láscia benben á dexiderâ...

...'Nsumma, mi ve ne fassu sentî dötréi pessi, se viâtri gh'ei quarcosa de megiu, metéilu insciaa Rè e insemme furmiêmu yn bell'archívviu myrtimediale internòuticu.

Bunn-a oudisiun!

A trascrisiun di testi d'e puexie a l'é stæta adeguaa aa prunúnsia di intèrpreti:
E lettie in russu pœan êse cunscideræ d'i eruî de prunúnsia duvŷi aa grafîa originâle d'e puëxîe.
Anæ cuu "ratin" inscee parolle cuu balin pe lêzine a tradysiun.
Clicæ insci atuparlantin pe descaregave e registrasyin òudiu

Cumme e unde d'u gran mâ Yn'undetta ch'a curiva tytt'allegra e 'n pô zvaiaa cun sprescetta versu a riva per andâseghe á acuëgâ a nu vedde, quella néscia, che inte'n puntu tyttu ghe reméscia e int'a smánnia d'u curí pròppriu la a te va á finî!... U l'é 'n scœggiu, a se gh'infranze e a se mette fitu á cianze. Tytti i so cristalli fin, e so perle, i gingilin, e culann-e, i so pendin, i diademi, i brasaletti, e so frange, i so pisetti, s'ariguêlan, se ne van e dezlénguan, pe camin, inscii flytti zmeraldin... Doppu lê n'ariva 'n'atra e a l'incuntra a stessa fin; pôi 'n'atra, 'n'atra ancun, né diversu u l'é u destin!... Cuscí va l'umana gente cumme e unde d'u gran mâ; tytti andemmu á zbatte la, ma u mutivu u nu se sá.	interpret. de Linn-a Vulunghi 52 seg. - 616 Kb.
turna in çimma
interpret. de Linn-a Vulunghi 32 seg. - 380 Kb.	Dixéiva a mæ bezava Dixéiva a mæ bezava, rangutan de'na vegetta, che i vegi en cumme stanchi pelegrin tytti diretti versu u canpusantu: e ciy sun vegi e ciy ghe sun vixin. "E mi - a dixéiva - pôi che sun stravegia e sun tostu sutî cumme 'na negia, sun za la dai rastelli, e têgnu in man l'anellu, e se me vêgne da stranyâ, daggu yn strepun, reciocca u canpanin, te me vêgnan á arvî e me fan intrâ.
turna in çimma
Testanéigra Tytte e matin, apenn-a spunta u giurnu, sentu 'na testanéigra sciy int'i rammi ch'a se desgösezza (1) meludiûza synandu u so floutin línpidu e nettu cuscí che se e so notte fŷsan (2) perlinn-e o prie de rybin che ghe cazéssan tytte dau bechettu truviéivu inghirlandòu tyttu u giardin. 1 Int'u tèstu se leze "desgoscezza". 2 Int'u tèstu se leze "fossan", a furma ciy viâxa a duviéiva ese "fuîsan" o "fîsan".	interpret. de Linn-a Vulunghi 24 seg. - 291 Kb.
turna in çimma
interpret. de Linn-a Vulunghi 29 seg. - 353 Kb.	U grande sciymme u me piggia - Adîu!... - u me zbraggia 'n rianellu cuntentu d'andâsene in mâ. - U mâ u l'é troppu distante - ghe diggu meténdume á rîe, - e avanti che ti gh'arivi t'aresti seccu int'e prîe! - Pocu distante daa liggia - u me rispunde curindu, - u grande sciymme u me piggia e vaddu avanti cun lê. Ti a veddi a gussa ch'a pende á quellu spigu de grunda? Fra pocu a cazze, e duman a l'é insciaa cresta de'n'unda!"
turna in çimma
A fèsta de San Gianbatista Quante figiœ gjâvan pee stradde e i carugin cun d'e latte amacæ, cafetee o tiänin, á dumandâ palanche pe u santu d'a çitæ!... - Ghe metéi ninte pe San Gianbatista? - Pigiæ, gh'ei meza mutta... E tytti á fâse sutta allegri, invexendæ, e pôi á fâ tunbarelle, che diâi descadenæ!... Ancun me pâ de véddive belli figiœ d'a Fuxe, cœtti, rustiîi dau sû, á streppe (1), mezi nŷi, tytti dezbandelæ, cua testa azberyfaa, quande sutt'ai barcuin ve metéivi á cantâ: "Caciæ e légne da bryxâ dunque andiéi á ca d'u diâu, á ca d'u diâu se ghe stá mâ, caciæ e légne da bryxâ, d'e careghe, d'i careghin, d'e barchette, d'i barchetin (2), d'e spasuîie, d'i spasulin (3), dæne e légne pe fâ u fòu...". Bèlli figiœ d'a Fuxe a m'é restaa inte l'ánnima a vostra fresca vuxe!... Aa seja, pôi, d'a fèsta che invexendu! Baluin areustáttici cua spúnsia á spírritu, e cumete sciy int'u çê, e pôi, ciy tardi, fûgai, tricchetracche, ciocchette, scüriserve da fâ criâ e donne inscii scalin, e pésci friti, e inbriæghi in stranbelun (4) e inbriæghi driti. Baracche e baracchette tytte frasche de pin e de castágna e lanpiünetti, ghirlande de papê e organetti de quelli cua maneggia destunæ, lymetti inscii barcuin e inscee terasse fèste da ballu e figge ammalucæ. E pôi u fòu, u grande fòu au mâ, in mezu aa nœtte fantaziûzu fœgu che l'ægua a riflettéiva maavegiaa. 1 "á strœppe" 2 Int'u tèstu se leze "d'e banchette, di banchetin" 3 "spassuiín" 4 "stranbælún"	interpret. de Sandru Bobbiu 2.09 men. - 1.52 mega
turna in çimma
interpret. de Etture Giöxepetti 1.03 men. - 739 Kb.	Perché u cantava troppu... U galettu argentin me l'han stranguòu. Fyrbu, picin, frenétticu, u xuâva in gîu pei giardin cumme 'n öxellu. Lyccidu da pai 'na purçelann-a da mette insciuu tremò sutt'aa canpann-a, u cantava á tytt'ûe, ou tenpu bellu e ou bryttu. Quante votte ciyvendu anche á derrŷu u sätava de spréscia insciaa rametta ciy ata d'u brignun e de lasciý u lanciava triunfante a so fanfara ch'a picava int'i veddri cumme u sû. E quante votte u m'adesciava u cœ cumme á zbragiame: "E vanni sciy in Carúppua fin che ti pœ..." Perché u tegniva tésta á gatti e chen u l'andava de spessu in galisoppu... Perché u cantava troppu u gallettu argentin me l'han stranguòu.
turna in çimma
Quande a necescitæ a særa l'ánnima Gh'é d'a gente insciaa costa de San Zorzu che a runpe a tæra á forsa de sufrî; inscee cadense lente d'a fadiga anche e muntágne pán schenn-e chinæ. Á l'inpruvizu yn ventixœ u l'ariva festuzu, allegru cumme 'n can da caccia e rammi e fiuri e erbe u fa mesciâ. Pâ ch'u segge vegnŷu á cunfurtâ e, cumme á Cristu, pe sciygâghe a faccia, ma lû però cuntínnuan á sapâ. Da li á'n pitin u turdu canpagnollu u l'é insce l'armurin á garlezâ... pe l'âia se ne van e ghirlandette d'u so floutin de paggia: finîu u barbaxu (1), cumme tiòu da'n fîu (2) u sparísce spedîu int'a buscaggia. Nu l'han mancu sentîu; cumme fŷsan (3) sens'uêge e sensa vista, chinæ insciaa tæra dŷa duve picca au stessu moddu a vitta cumme a morte, calandu a nœtte, cuntínnuan á sapâ. 1 "barbacîu" 2 "fî" 3 Int'u tèstu se leze "fossan", a furma ciy viâxa a duviéiva ese "fuîsan" o "fîsan".	interpret. de Linn-a Vulunghi 1.10 men. - 830 Kb.
turna in çimma
interpret. de Sandru Bobbiu 34 seg. - 407 Kb.	L'öchin Eccu pea fosca marinn-a yn'atra unda a s'avansa; a gúnfia, a s'adrissa, a s'inarca cumme 'na chiggia de barca, pâ ch'a sou vœgge aberâ. Ma lê, tranquillu e bëâtu cun a caressa d'e ae u te ghe scyggia de d'âtu. Puêsse fâ cumme l'öchin, pe ogni unda che arrîva ars âme senpre 'n pitin.
C.Montpetit, zenâ 2001. turna in çimma