Il Grant Dizionari Bilengâl Talian Furlan al è distribuît par cumò dome par funzionâ in Windows, ma in teorie al pues zirâ su un grum di sistemis operatîfs diferents, oltri a dutis lis versions di Windows (Windows 3.1/95/98/NT/2000/XP), ancje in scuasit ducj i Unix (e duncje ancje Linux) e Mac.
Ce che al separe la teorie de pratiche a son un bon numar di programs di 'supuart' di instalâ cun ducj i problemis che a puedin vignî fûr. Lis istruzion che a vegnin daûr si riferissin a un sisteme Linux [viôt screenshot] ma no varessin di jessi masse diferents par altris sistemis Unix.
Atenzion: chestis notis a son dadis fûr cence cualsisei garanzie. L'autôr nol è responsabil di dams morâi o materiâi a robis e/o a personis causionâts dal vê metût in vore ce che culì al è scrit. Se dilunc la leture di chest document, ti ven sù une rabie di chês e tu cjapis a pidadis il monitor, tu muardis la tastiere e podopo par finî la vore tu dâs fûc al intîr computer causionant cussì il brusarili de tô cjase e di mieç paîs - ti visi - jo no ai colpe.
Programs che a coventin (par tacâ):
Se tu sês fortunât tu puedis vêju bielzà instalâts sul to sisteme (il Perl scuasit di sigûr) o tu puedis discjamâju ben impachetâts dal sît de tô distribuzion e instalâju tal solit mût.
Câs contrari:
Note: controle che i svariâts programs a sein compatibii come version jenfri di lôr, probabilmentri se tu sielzis lis version plui resints no varessin di jessi fastidis.
Magari cussì no, i file dal Grant Dizionari che a coventin no si puedin gjavâ fûr diretementri dal CD di instalazion, ma dome dal program bielzà instalât in Windows. Se no tu âs Windows tu varâs ben un amì/morôs(e)/parint che lu vebi? Bon, convincilu a instalâ il Grant Dizionari (che al impari ancje lui alc) e fasiti copiâ i files che disarai tal seguit, stant che la dimension e passe i 200Mb (30Mb comprès) tu varâs dibisugne di un CD, che un discut nol baste.
Note: Se tu sês un vêr 'Linuxist' dûr e sclet che nol si impace cun nissun che al dopri Windows, tu puedis simpri provâ a instalâ il program in Linux cun wine (windows emulator).
I files che a coventin si cjatin te directory dulà che al è instalât il Grant Dizionari (par solit C:\Programmi\gdbtf) e a son:
src\VLF-0.9913.tar.gz (il program) files (i dâts pal program)Cumò vierç la shell e digite (fale che i coments scrit jenfri lis parentesis):
tar xvfz VLF-0.9913.tar.gz (al scompate VLF-0.9913.tar.gz)
cd VLF-0.9913 (al jentre te directory creade)
Culì copie la directory files che tu ti sês procurât (e larà a sorescrivi une za presint) podopo digite
perl Makefile.PL
Cjale ben l'output dal ultin comant e note se a son riis come
Warning: prerequisite Non Numar not found. Dulà che Non e Numar a son il non e il numar di version dal modul che ti mancje.
Se no tu viodis riis di cheste fate salte ae sezion Scuasit insom cul GD.
Câs contrari notiti ducj i nons e numars dai modui mancjants fale chei che a tachin cun Test:: che si pues fâ cence. A cheste liste zonte, se nol è bielzà, ancje il modul DB_File-1.811
Dal sît CPAN http://search.cpan.org cîr fûr i modui segnâts cul numar di version uguâl o plui alts e discjamiju.
Cumò tu âs di instalâ i modui discjariâts, par ognidun fale DB_File-1.811 fâs cussì: [nonModul al è il non dal modul di instalâ]
tar xvfz nonModul.tar.gz
cd nonModul
perl Makefile.PL
controle che nol mancji nuie altri, câs contrari va discjarilu tal lûc di prin. Podopo:
make
make install (tu âs di vê i permès di root)
Se a ven fûr cualchi erôr prove a lei il file README che tu cjatis te directory.
Se il modul DB_File-1.811 al jere domandât esplicitementri par instalâlu continue cu la Sezion instalâ modul DB_File.
Câs contrari torne te directory VLF-0.9913 e torne digite perl Makefile.PL, cumò tal output no varessin di vignî fûr lis riis di prin. Salte ae Sezion Scuasit insom cul GD.
Se no tu âs bielzà discjamât il modul DB_File-1.811 va cirilu a http://search.cpan.org.
Il probleme cumò al è chel di 'leâ' il modul ae juste version de librarie Berkeley DB. Prin controle di vê tal sisteme la librerie Berkeley DB cun numar di version 4.2 o plui, il package al varès di clamâsi dbXX (cun XX numar) câs contrari cîr tal sît de tô distribuzion o in http://www.sleepycat.com e instalile.
Podopo digite:
tar xvfz DB_File-XXX.tar.gz
cd DB_File-XXX
in cheste directory tu cjatis il file config.in, vierzilu cun tun editor, leilu cun atenzion e imposte lis vôs INCLUDE, LIB, DBNAME daûr di ce che e à non e di dulà che je instalade la librerie.
Tal gno câs par esempli cu la librerie db4.2 o ai:
INCLUDE = /usr/include/db4
LIB = /usr/lib
DBNAME = -ldb-4.2
Daspò salve e continue come par solit:
perl Makefile.PL
make
make install (tu âs di vê i permès di root)
Par lâ indenant scrîf:
make
e spiete fintremai che nol à finît. Daspò prove a inviâ il program cun:
perl -Mblib script/vlf.pl
Se ti da l'erôr ... va ae Sezion instalâ modul DB_File e podopo torne prove.
Se invezit si invie tu puedis creâ un leam (link) ae aplicazion sul Desktop:
/home/cjossul/VLF-0.9913)VLF-0.9913/files/images/logo48.pngP: Intant dal inviament mi dîs: ....
S: Il program nol cjate la directory files, sêstu sigûr di vêle copiade tal just puest? Torne da un cuc ae sezion Scompatâ e cjatâ fûr i modui mancjants.
P: Intant dal inviament al ven fûr un balconut cuntun messaç che al par scrit di un alien cjoc.
S: Se al è come chest (il messaç no l'alien) al è suficient cjalcjâ il boton Annulla e il program si invie. Par evitâ che al vegni fûr a ogni inviament, tu âs di ricompilâ lis WxWidgets cence il flag debug.
P: Lis frasis di esempli (chês in colôr narant) a àn i acents curts al puest di chei circonflès.
S: Al è un probleme di visualizazion, prove gambie font (menù Mude->Opzions), magari sielzilu plui grant e al varès di comedâsi scuasit dut (scuasit dut, stant che cuntun font diferent di chel di default la interface dal program e divente graficamentri plui sclagne).