1

Nàsciu a Nuxis e allevau,

esti s'amigu "Pisanu Serafinu",

sia po' fortuna o po' destinu

a Carbonia però s'è coiau.

Sa mulleri est' "Iride Pau"

e su babbu è s'affabili ...Ginu

con "Elena e Claudia luxentis che s'oru

si funti creausu sa famiglia inzoru.

2

Qusta famiglia de santa unioni

unu "situ internet" ha realizzau,

giai de prima ...dia progettàu,

segundu sa mia impressioni,

e ancora, segundu sa previsioni,

qustu scrittu ad'essi registrau,

sa storia de "Nuxis" si non mi cunfundu,

ad'essi conotta in tottu su mundu.

3

Ad'essi conotta in d'ogna nazioni,

grazias a su costant'impegnu de ...Pisanu,

ma po chi ddèu ddu pozza donai una ...manu

m'è neccessaria....un'escursioni.

"Fruminaramu, Maccumata" e "Barisoni",

e a su "Casteddaiu" de primu mengianu,

poi de "Tiriccu"...torru a "Giradroxiu",

poi mi pon'in branda a su scurigadroxiu.

4

Sa dom'e "Giradroxiu" lassu stai,

e sigu su camminu stabiliu,

"Serregànnasa" è su puntu preferiu,

chi meda genti bolli visitai.

Sa dom'e su "conti", po citai,

e su "Corroppexirdesu" in mes'arriu,

de "Tamara" fazzu a S'Acqu'e su Stampu"

atraversendi tottu qussu ...campu.

5

De "S'Acquedda" sigu su..camminu

a s'Acqua 'e su "Tipu" po sostai,

cantu genti ddi àndad a pappai

cun pezza arrustu, pisci, pani e binu.

Arribu a Ses Pisanus de "Tattinu",

canc'è su "Puzzu Sacru" de ammirai,

e de "Traviana" in s'antigu furriadroxiu,

ddi hant'agatau finze unu "schisorxiu"

6

In s'ingruxeri de "Tattinu" nc'è su mori..

chi portad'a sa cresiedd'e "Sant'Elia",

dèu ddu bollu lodai in poesia,

ch'esti su santu, chi si faid'onori,

in prusu ch'esti "santu" intercessori,

s'è bolau in "celu" che  a "Maria"

e in qusta campestri cresietta,

fainti grandu festa a su "profeta".

7

A ses "Panis" bandu prontamenti

dopu ch'in sarch'e mengianu seu passau

est'un antigu furriadroxeddu sciusciau,

e de bellu non si bì nienti,

si nòtanta i murus solamenti

e acetottu esti "Montepau",

in sa migg'e "Sperdàiasa" e sa migg'è "Scardiasa"

no ddi passa prus personas "bìasa".

8

O'i su logu è tottu abandonau

sìada in monti che in pianura,

in "Ses-Panisi" segundu scrittura

Santu "Giorgi" ddi ha regnau

una cresiedda ddianta edificau,

po dd'onorai sa santa figura.

Si ddu scisi, o lettori, naraddu

ca "santu Giorgi" viaggiada a cuaddu.

9

Su cuadd'e santu Giorgi fu biancu,

ca dd'hapu liggiu in d'una scrittura.

De ses Pànisi, abasciu in pianura

a ses Pillonis, po ddu nai...francu..

Mi firmu e mi riposu, essendi stancu

ch'esti su logu miu po natura,

in ses Pillonis seu nàsciu e cresciu,

e qussu logu nò dd'hapu scheresciu.

10

Non si scheresci su logu natiu,

non si scheresci sa bidda natali.

Su Morin'e Impera... esti in sa statali

e sa Migg'e ntiogurangiu ge dda sciu

e su "Miggiotu" in peis de s'arriu

in terren'e Nicolinu Serra, fora mali

de ses Ollarxius, ses Pittaus e ses Serras

conosciu beni tuttu qussas  terras..

11

In Bacchera nc'est'una sorgenti,

e un'àtara 'ncind' esti in Fonnesu,

un'atara grandu miggia è posta in mesu

de s'abitau de "S'Acqua callenti"

in Ses Serafinisi nc'esti sa sorgenti

e de i dòmusu non è troppo atesu

e in mesu a unu campu de gureu

esistidi ancora sa miggia in "Murdeu".

12

In Murdeu nc'esti unu "tutoni"

aundi s'aprigànta is pasciròisi

pascendi baccasa, brebeisi o boisi

in s'ierrara fenta sa stagioni.

Ddi papànta puru calincun'angioni

mancai nu essinti portau coccoisi,

asunt'e sa "Coronarrubuia in Pranedda"

esìstidi sempri sa "Foss'e Cancedda".

13

Sempiri i nì fundus de Pranedda

scurri s'acqua de unu miggiotu

in Chicumei puru hapu conotu

un'atara frischissim' acquedda

ma nc'esti unu campu de spina niedda

chi non si podi passai scrucciu tottu

cun sa miggi'e is crabaxius hapu visitau

s'acque su "Toccu" in su camp'e merau.

14

Sa Migg'e sutu in peis de Piscellana

e sa migg'e sa Murta e prusu a costera

in sa Costa e Ferreri nc'è sa miniera

e in Ses Cuccusu nc'esti una funtana

ma s'imprusu est'acqua piovana

basta chi procciara in primavera

e tra custus carus bellus logus miusu

regna su furriadroxiu becc'e Ses Pilliusu.

15

Sa migg'e is Crabaxiusu 'e s'acqu'e su Toccu

duas sorgentis in su cam'e "Merau"

a piccioccheddu ddi seu crocau

in sa barracca de unu certu "Coccu".

'Oi perou , a Deusu dd'invoccu

ca qussu tempus dd'hapu superau

sa migg'e sa "Murta" cun sa migg'e "Ghiani"

cun sa migg'e "Sutu".. nò ddi passa cani.

16

In Ses "Curreisi" de basciu e de sùsu

ddoi bivi paghissimus picciocus,

disabitau esti "Ses Marroccus"

e iin Su "Peppimereu" non prus de dùsu

e si seu sbagliendi ...mi scusu

ma genti non dd'hadi in su de...Sproccus

in Ses "Meis" puru e Ses "Crobeddus"

troppu pagus..funt'is piccioccheddus.

17

Prim'e lompi a sa conclusioni,

de sa cresi'e Nuxis bollu fueddai:

intrendi in sa porta si podi notai

unu robustissimu portoni,

pensu chi siada rivestiu in ottoni,

chi solu Nuxis ddu podi vantai,

oltre a i santus Perdu e sant'Elia,

Gususu in cruxi e sa Mamma Maria.

18

Sa Vergini Maria Immacolada,

è mamma de su Rei de Paradisu,

in su tabernacculu Cristu est'assisu,

rappresentau in s'ostia consacrada,

e candu sa cresia è tottu illuminada,

a is fedelis imprimi su sorrisu,

e poi 'nci funti i bràvasa scaccinasa,

po ponni a postu ..bancus e ainnasa.

19

Sa Cresia nosta, a miu giudiziu,

est'una cresia meravigliosa,

est'abbastanza larga e spaziosa,

accoglienti po unu sposaliziu,

ma in cas'e mortisi est'unu supliziu,

poita sa genti prangi dolorosa,

su collaboradori de "Don Silvanu"

è s'insostituibili..."Ginu Pisanu".

20

In Prazz'e Cresia nc'è su monuumentu,

po arregordai i mortus in gherra

pàrtiri a "piramidi" de terra,

e de marmu esti su rivestimentu

essendi esposta a d'ogna bentu,

dda sfiora su soli, cand'est'in sa serra

Nuxis possididi monti e pianura,

e terrenus fertilis, po s'agricoltura.

21

Nuxis possididi vastu territoriu,

ca vastissima è s'estensioni,

de is pontis de "Brentigota" a "Barisoni",

qussu confini a tottus'è notoriu,

ch'esti stabiliu e non provisoriu,

de Ses Aioasa a S'Arch'e Orioni,

non seu studiosu e mancu studiau

ma su chi hapu scrittu nò dd'hapu inbentau.

22

O Serafino, ti depu onorai

po tottu s'impegnu chi ti ses pigau,

cun mulleri tua..Iride Pau,

sèisi in quattru de depi elogiai,

Elena e Claudia funti de ammirai,

po su situ internet giai realizzau

ma candu m'anta nai..."sa bona memoria",

qustu scrittu miu...ad a fai storia.

23

Finiu hapu qust'elaborau,

e a Serafino ddu dongu in cunsigna

in tottu su mund' e su rest' e Sardigna,

in Internet.. ad'essi osservau

de i nuxiàiusu ad'essi onorau,

poit'è persona veramenti digna

cun Babbu.. Ginu e Mamma.. Maria

saludu a tottusu in sarda....poesia.

Componimento poetico

in Sardo-Campidanese

di  Marcello Saba, poeta dialettale di Nuxis, che ringraziamo per la simpatica collaborazione prestata alla realizzazione della sezione "Poesia" del sito.