Con gucia e filsela
(e ‘n tòch ed sigarèt pendent dai làver)
cusia e trapontava ij matarass:
tapiss d’amor ambotì ‘d lan-a,
nìvole d’ij seugn del borgh.
A l’avìa, ‘l magassìn, madama Gina,
pròpi darè ‘d la piòla;
con màchina da cuse, cardatrìs,
feudre, fodrette
e tut l’òn ch’a servìa:
organisà da bin.
La sèira,
con sò bib cit carettin
passava per soe care vie ‘d Vanchija
e peui, con el pesant fardel
carià ‘n sle spale,
pensava ‘ij so sagrìn
contand gradin e scale.
Me smija ‘d vedde ‘ncora,
col bèch ed le tisòire fè babòja
da la sacòcia frusta ‘d so faudal
ma l’è mach pì na cita fantasia,
na fervajetta
abandonà ‘n sla tàula ‘d la memoria,
che ‘l vent del temp,
da la mia ment,
l’è desmentiasse ‘d portè via