TUTTI I DIRITTI RISERVATI ! (C) SIAE 2010
LA PREGHIERA DEL CALABRESE AL PADRE ETERNO CONTRO I PIEMONTESI,NEL 1874.
Signuri chi dormendu vigilati
e tutti li segreti canusciti,
chi senza testimoni giudicati
e premi e peni, tardu, cumpartiti,
chi siti vecchiaredhu e non tremati,
eternu sempr' in celu e non muriti,
ssi pili, ntra ss'aricchi, mu sciuppati,
è tempu, e li preghieri mu sentiti:
lu vostru Cristu e tutti li cristiani
su' mpaticati di li porci e cani.
Fortissimu, di nudhu vi spagnati,
guappi, guappotti, bravi e mascansuni,
scherzandu, cu na mani, ammutilati,
comu tropianu ammattula cuttuni,
Teniti senza paga, pi sordati
li gridhi,li ranocchi e muscagghiuni,
e chisti, appena n'occhiu nci ammaccati,
darrupanu nebucchi e farauni.
Eppuru nta l'Italia siti nenti:
derisu vui, la Chiesa e li sacramenti.
Calaru di Piemunti allindicati,
na razza chi mangiava dha pulenta,
e di Natali e Pasca dui patati.
Iestimaturi orrendi e miscredenti
e facci tosti e latri cedulati,
superbi, disprezzanti, impertinenti,
sédinu all'umbra e fannu tavulati
cu lu suduri chi jettamu ardenti,
e di li fundi nostri cilorani
nui diventammu, e idhi proprietari.
Di cannavedhu vinniru vistuti,
scarpi ammuffati, robba di becchini:
mò di castoru, e vannu petturuti,
cu stivaletti alla moda li cchiù fini .
Calaru ccittu ccittu, ntimuruti e
vrigognusi comu fanciullini:
nchi vittiarti a nui, manzi e arricchiuti,
apriru nasca e isaru li cudini,
a cui ndi chiamau “locchi” e cui “nimali”,
e ndi ncignaru a fari servizziali.
Guardaru i prima misi l'olivari,
l'agrumi, li vigneti e mandri e frutti,
e disseru fra loru:”n'c'è chi fari”....
cc'a nc'è di beni ma ngrassamu tutti!
E subitu si misaru a scancari
a scatta panza, ad alleggiari gutti,
poi dazi senza fini a mmunzedhari
pe comu s'ammuunzheda ligna rutti,
e pe dicchiù “ li schiavi conquistati “
ndi chiamanu li facci d'ammazzati.
Già li famigghi ricchi impezzuntiru,
lì poveri su sicchi pi la fami,
l'argentu e l'oru tuttu lu periru,
e scumpariu di nui finna la rami.
L'impieghi fra di loru si spartiru,
faciaru schiananzia di lu bestiami,
gadhini ed ova e pasta l'incariru,
lu ranu, vinu, pisci e la fogghiami.
Non pensanu'autru cha mangiati sulu :
mu faannu bonu chippu e grossu culu.
La santa castità la currumpiru,
su all'ordini del iornu lì pansati,
li religioni tutti l'abbuliru,
cummenti e monasteri prufanati.
Li chiesi nostri quali li chiudirunu,
quali su stadhi, e quali su triati,
l'enti morali tutti supprimiru ,
li beni sacri tutti ncammerati;
la carità fraterna puru cundannata,
la povertà, si cerca , carcerata.
Li sacerdoti chiamanu imposturi,
li statui trunchi di arburi pittati,
e la Madonna fannu tanti n'giuri,
li santi pè briganti su trattati.
Non vonnu festi, né predicaturi,
vigìli e santi jiorna disprezzati,
spijuni dinnu che lu cunfessuri,
li setti sacramenti poi nchiastriati.
Ah si, d'Italia e sua consorteria
parlava lu profeta Geremia.
Signuri, vui nci siti, e nui cridimu,
e sutta stu fragellu vi adoramu.
Peccati cu li sarmi, si, nd'avimu,
ma sempri a vui fidili e stritti stamu.
Diciasett'anni sugnu chi ciangimu,
lu pani cu li gralimi ammogghiamu,
cercamu a vui succursu e peju iamu.
Suffritimi, Signuri, nu mumentu,
mu sfocu di stu cori lu turmentu.
Sapiti ca vi simu crjiaturi,
perciò vi parlu francu, in cunfidenza:
simu arrustuti, e a menzu a lu duluri
perdimmu lu curduni e la pacienza.
Non promettiti vui nta li Scritturi
ca siti occhiu amorusu e pruvvidenza,
pe cui vi servi, e di li peccaturi
ca fati, mu si perdi la simenza ?....
Vi chiamu a la parola, non mancati,
ca siti via diritta e veritati.
Lu furmini ,lu tronu, ntra su pugnu,
su l'armi vostri pi l'eternitati,
lu caddu di giugnettu, agustu e giugnu,
la nivi di dicembri dominati,
tempesti, e lu levanti cu lu ncugnu,
non siti vui chi spissu li mandati?....
Cannuna e hajionetti chi mai sugnu,
rimpettu a sa tremenda majestati?
Ebbeni mu struggiti chi nci voli
si figghji di puttana si marioli?
Giustizia voli pemmu li puniti,
l'onori vostru mu li scuncassati,
e si riguardu a vui li compatiti,
l'ingiuri a la Madonna vindicati,
la vostra santa chiesa risurgiti,
lu sacru vostru cultu rianimati,
Nui tutti ntra nu zaccanu cogghjiti ,
e vui, durci pasturi, ndi guidati.
E allura riverenti vi cantanu
lu “ tantumergu” e lu “te deum lodamu”
e rispundendu, ammen li cristiani
lu sagristanu sona li campani.
( abate Antonio Martino).
L'abate Martino di Galatro, non contento del risultato ottenuto, nella precedente poesia scritta in calabrese “ Il paternoster dei liberali calabresi....”indirizzata proprio a Vittorio Emanuele II come monito di cambiamento, da inizio ad una protesta singolare quanto originale. Non contento di ciò, ancora una volta, visto che le cose non cambiarono negli anni successivi, ma oltre tutto peggiorarono aggravandosi drasticamente. Pubblica, nel 1874, la Preghiera del calabrese al Padre Eterno contro i Piemontesi : Indirizza le parole proprio a nostro Signore (il corsivo è mio), che avendo in mano il potere più grande del cielo e della terra, vive un momento di sconforto in terra di Calabria. Scesero dal Piemonte tutti allindhicati( pieni di pidocchi) bestemmiatori orrendi disprezzatori delle nostre tradizioni che badano solo a fare tavolate col sudore del popolo calabrese. Vestiti malissimo scarpe ammuffite intimoriti come fanciullini ma appena videro iL popolo calabrese calmo e rispettoso iniziarono a dettare legge ed “isari li cudini”.Iniziarono a guardare tutte le cose alberi olivi, mandrie e frutti trattando il popolo da schiavo li conquistarono. Tutti gli impieghi si divisero, incarirono ogni cosa, abolirono la religione e profanarono le chiese rendendole teatri. Giustizia si chiedeva al Signore per le offese al padre e le offese alla terra depredata .
Maria Lombardo
Commissione cultura dei Comitati Due Sicilie
Centro Studi e Ricerca Comitati Due Sicilie.
Web Master (C) 2010 Raffaele Fameli