Vai al brano corrispondente in Italiano

Nam quid ea memorem quae, nisi eis qui videre, nemini credibilia sunt, a privatis conpluribus subvorvos montis, maria constrata esse? Quibus mihi videntur ludibrio fuisse divitiae; quippe quas honestae habere licebat abuti per turpitudinem properabant. Sed lubido stupri, ganeae ceterique cultus non minor incesserat: viri muliebra pati, mulieres pudicitiam in propatulo habere; vescendi causa terra marique omnia exquirere, dormire prius quam somni cupido esset, non famem aut sitim, neque frigus neque lassitudem opperiri, sed ea omnia luxu antecapere. Haec iuventutem, ubi familiares opes defecerant, ad facinora incendebant. Animus inbutus malis artibus haud facile lubidinibus carebat; eo profusius omnibus modis quaestui atque sumptui deditus erat.