In pìe sòra la riva,

vardàndo la corènte,

el pensièro me rapìva

la marèa de crezènte.

Che festa sta aqua neta,

che porta del màr el respiro,

e come 'na scolareta

curiòsa la spenze e la vàrda in ziro.

In laguna la vien drento

e, andàndo per i canàli,

la sènte premùra e fermento

de la zente per le càli.

Pò via fòra in canalazzo,

portando le ciàcole del campièlo

e, soto le finestre de un palazzo,

l’odor del salso la porta in tinelo.

Drènto per el canalèto,

la zoga a fàr le sconte,

spiàndo ch'el bazeto

dei moròsi sòra 'l ponte.

Ma cofà de Cenerentola la scadènsa,

finìo’l tempo de la bubàna,

in colma un àtimo la se indormènsa

e co la se svègia… la xe dosàna.

Co un bòvolo la se volta,

e la scomenza tornar indrìo

come un caìn che se revolta

la buta acqua fora dal rio.

La barèna la descoverze,

la barba a le briccole la ghe lecca

e, par chi svelto no se acorze,

la ghe lassa la barca in secca.

Via svelta la lava via,

le miserie e tute le strasse

e, per ricordo o compagnia,

la porta via anca le scoàsse.

Cussì finìo de carezzàr,

la " Regina " su le sponde,

stanca la torna in alto màr

a confònderse co le onde.

E in pìe sora la riva

la saludo, ma sò za,

che quela capricciosa dìva,

fra sìe ore, la torna qua.