28 Maggio

SAN PRIAMO (Pilimu) Martire Sardo

Già chi tantu prodigiosu 
Ses pro divina favore,
Siat nostru intercessore
Santu Pilimu gloriosu.

I - De gente illustre pagana
Bies in Sardigna sa lughe
A bint' annos de sa rughe;
Sa scienzia soberana,
E sa fide cristiana
Prest' abbrazzas fervorosa.

2 - Sa Divina Onnipotenzia
In su fiore de s'edade,
T' infiammat de caridade
E fervida penitenzia;
Solitaria in s'astinenzia,
Chircas s'eternu riposu.

3 - In s'aspera costa perdosa
Vives vida angelicale
Meighina a dogni male
Ses in sa grutta orrorosa;
A sa gente fervorosa
Chi t' agatat amorosu.

4 - Ses apostolu fervente
De Gesùs crucificadu,
S'evangeliu has predicadu
A totu sa sarda gante,
Chi ascurtat devotamente
Cust' apostolu diciosu.

5 - Pro tantu zelu e fervore
Su presidente inumanu,
Cun Pilimu e Lucianu
Ti persighet cun rigore;
E t'inserrat cun furore
In su presone orrorosu.

6 - Ses, o Pilimu innocente
Post' impare cun sos reos,
Chi adores falsos Deos
Cumandat subitamente,
Felice su presidente
Cun edittu rigorosu.

7 - Cun popolare furore
Ses a su templu portadu,
Ma a su populu adunadu
Sa lee de su Signore,
Cun singulare fervore
Tue esplicas coraggiosu.

8 - Su presidente ostinadu
Pro consighires'intentu,
Inventat dogni turmentu
Cun su martire sagradu
Ma de totu has triunfadu
Che gherreri valorosu.


9 - Una spada finalmente
Ponet fine a sa gherra;
De cust' infelice terra,
Partit s'anima fervente;
Bolas columba innocente
A su regnu avventuradu.

10 - De s'altu tronu de onore
Ue ti han collocadu,
De sa Sardigna avvocadu
Miranos cun amore;
E faghe chi su Signore
Nos ascurtet piedosu.

11- Faghe chi nos ottenimos
Dae Deus fruttu abbundante,
Mira comente costante
A s'abba nois currimos;
Chi in custa grutta ischimos
Cantu sias amorosu.

12 - De nois tene memoria
In s'ora estrema de morte,
Pro chi tengamus sa sorte
De consighire vittoria,
In s'altu regno de gloria
De paghe eterna e riposu.