8 settembre
B. VERGINE DEL RIMEDIO

Tesorera chelestiale
Divina dispensadora
Alcanzadenos,
Segnora, Remediu
pro dogni male.

1- Pro Patrona titulare
De su Remediu bos laman,
Ue totus Bos acclaman
Protettora singulare,
Cherindenos amparare
In custa vida mortale.

2 - Cherinde restaurare
Custa santa devozione
Cun occulta relazione
Azis cherfidu mostrare
Cudd'affettu singulare
E amore maternale.

3 - Conoschinde sa clemenzia
De Bois, Virgen sagrada,
Benit sa zente affannada
Cun votos e reverenzia,
Dande pro dogni dolenzia
Consolu meighinale.

4 - Sos chi de coro supplicant,
Sende cosa cumbeniente,
Alcanzades prontamente
Sa grazia chi nezzessìtant,
Pro sa quale s'accredìtant
De su titulu speciale.

5 - Consolu de affligidos,
Refugiu de paccadores,
Remediu de sos dolores
Domandant tottus unidos,
Zegos, zoppos e tulidos
De ogni gutta corale.

6 - Ses de su mundu allegria!
Ses de su Chelu bel lesa!
De sos Anghelos prinzipesa!
De sos Santos melodia!
Ses consolu e vera ghia
Contra sa culpa mortale.

7 - Cale Giudita has prostradu
A Oloferne mortale,
Chi cun istragu fatale
Has destruidu su peccadu,
Lassende incadenadu
A Luciferu infernale.

8 - Turre Davidica forte,
Rosa mistica sagrada,
Oliva fruttificada
Cipressu de s'altu monte,
De sos navigantes norte
Ses ghia universale.

9 - Nave mistica divina
Chi de su Chelu has portadu
Su Pane Sacramentadu,
Verdadera meighina,
E de s'anima meschina
Remediu meighinale.

10 - Già ch'in su Regnu Divinu
Bos tenimos avvocada
Pro s'anima tribulada
Supplichende de continu,
Mustradenos su caminu
De sa patria chelestiale.

11- In cudda ultima ora
De s'agonia mortale
Alcanzadenos, Segnora,
Su remediu generale,
Alcanzadenos, Segnora,
Remedìu pro dogni male.