O patri nostru,
ch'a Firenzi stati,
lodatu sempi sia lu nomi vostru,
però li mali nostri rimirati,
sentiti cu pietà lu dolu nostru,
ca si cu carità vui ndi sentiti
certu non fati cchiù ciò chi faciti.
Patri Vittoriu, re d'Italia tutta,
apriti ss'occhi, ss'aricchi annettati:
lu regnu vostru è tuttu suprasutta,
e vui, patri e patruni, l'ignorati.
Li sudditi su' tutti ammiseriti:
vui jiti a caccia, fumati e dormiti.
Ministri, senaturi e deputati
fannu camurra e sugnu ntisi uniti,
prefetti, cummessari e magistrati
sucandu a nui lu sangu su' arricchiti.
E vui patri Vittoriu non guardati:
vui jiti a caccia, dormiti e fumati.
Cummessi e cancelleri di preturi,
prùbbica sicurezza e abbocati
e speciarmenti li ricivituri
a tutti ndi spogghiaru e su' ngrassati.
E vui patri Vittoriu li viditi:
Sindaci, segretari e salariati
e cunsigghieri tutti e assessuri,
su latri cittadini patentati:
su idhi li judei, nui lu Signuri!
E vui patri Vittoriu li viditi,
e jiti a caccia fumati e dormiti.
A l'esatturi, poi, lupi affamati,
uh, lampu mu li mina e mu li cogghi,
li roli mu li strazza a mudhicati,
ca quantu furti, frodi, quantu mbrogghi!
E vui patri Vittoriu vi scialati,
e jiti a caccia, dormiti e fumati.
L'agenti di li tassi su' na piaga
cancarenusa supa a lu vidhicu,
sempi la pinna loru scrivi 'paga',
e di li murti loru nenti dicu...
E vui patri Vittoriu non spijati...
Dormìstivu? Mò jiti e caccijati!
E di li sù notara chi cuntamu?
La pinna loru è lanza di langinu,
uh, poravedhi nui si stipulamu:
notaru oji dinota 'latru finu',
tariffa loru è sulu lu capricciu.
Patri, pacenzia, ca mò vi la spicciu,
posati ssu ddubbotti e rifrettiti,
jettati chissu sicaru e sputati,
guardati chisti piaghi ca ciangiti,
e canusciti tutti li mpiegati.
Certu, si vui guardati, aviti a diri:
mannaja lu fumari e lu dormiri!
E vi accorgiti ca regnati in guerra,
odiatu di lu celu e di la terra.
PANEM
NOSTRUM
Lu pani ndi strapparu di li mani,
lu pani nostru, o patri, e mò langumu,
simu trattati peju di li cani,
pagamu supra l'acqua chi mbivimu.
La curpa èni ca fummu liberali;
l'Italia fatta ndi portau sti mali!
Pacenza... Mò mparammu ca lu mundu
prima t'alletta e poi si mustra ngratu,
ch'è vasu duci ncima, amaru in fundu,
ch'è fàuzu e tradituri d'ogni latu...
E chistu spega lu tempu presenti,
peccùi di ricchi sciurtimmu pezzenti.
Pezzenti pe fundaria e manimorta,
pezzenti pe cunguagliu dupricatu,
pe prèstiti forzusi ed ogni sorta
di pisi, ch'ogni riccu hannu stancatu.
Et quia venturi sunt fabbricati,
lu daziu su li porci e su l'entrati.
Pezzenti, e si pretendi di pagari
lu daziu di cunsumu già appardatu,
li murti, supraimposti, ed autri affari
chi già Scialoja nostru ha progettatu.
Si parla di finestri, ciucci e cani,
daziu di furnu, di pili e di lani.
La mobili ricchezza sbrigonata,
e lu registru cu la murta e senza,
marchi di bullu, la carta bullata,
la posta chi ndi suca e non si penza,
tabaccu caru, carissimu sali:
patri Vittoriu, pe bui tanti mali!...
Finimu cu li pisi e li misuri,
lu decalitru, vilanza e stratia,
lu metru, pisi grossi e li minuri,
la revisioni ogni annu... uh, porcarla!
Patri, cuntempra tu chist'orazioni
et ne nos inducas in tentazioni:
ca di la furca passammu a lu palu,
sed libera nos a malo.
AMEN
Cchiù suffriri non potimu,
caru patti, riparati!
Ca si nui ndi annichilimu
di st'Italia chi ndi fati?
Fussi regnu di lu nenti
e vui re di li pezzenti,
e tornamu in giografia
zeru e nenti e così sia.
|
Signuri,
chi dormendu vigilati
e tutti li segreti canusciti,
chi senza testimoni giudicati
e premi e peni, tardu, cumpartiti,
chi siti vecchiaredhu e non tremati,
eternu sempr'in celu e non moriti,
ssi pili, ntra ss'aricchi, mu sciuppati
è tempu, e li preghieri mu sentiti:
lu vostru Cristu e tutti li cristiani
su' mpaticati di li porci e cani.
Fortissimu, di nudhu vi spagnati:
guappi, guappotti, bravi e mascansuni,
scherzandu, cu na mani, ammattulati,
comu tropianu ammàttula cuttuni.
Teniti senza paga, pe sordati
li gridhi, li ranocchi e muscugghiuni,
e chisti, appena n'occhiu nci ammaccati,
darrupanu nabucchi e farauni.
Eppuru ntra l'Italia siti nenti:
derisu vui, la Chiesa, i sagrarnenti.
Calaru di Piemunti allindicati,
na razza chi mangiava dhà pulenti
e di Netali e Pasca dui patati.
Iestimaturi orrendi e miscredenti
e facci tosti e latri cedulati,
superbi, disprezzanti, impertinenti,
sèdinu all'umbra e fannu tavulati
cu li suduri chi jettamu ardenti.
E di li fundi nostri cilonari
nui diventammu, ed idhi propetari.
Di cannavedhu vinnaro vestuti,
scarpi ammuffati, robba di becchini:
mò di castoru, e vannu petturuti,
cu stivaletti a moda li cchiù finì.
Calaru ccittu ccittu, ntimuruti
e virgognusi comu fanciullini:
nchi vittarti a nui, manzi ed arricchiuti,
apriru nasca e isaru li cudini,
e cui ndi chiamau « locchi» e cui «nimali»,
e ndi ncignaru a fari servizziali.
Guardaru in prima misa l'olivari,
l'agrumi, li vigneti e mandri e frutti,
e disseru fra loru: «Nc'è di fari!...
ccà nc’e di beni mu ngrassamu tutti».
E sùbitu si misaru a sciancari
a schiatta panza, ad alleggiari gutti,
poi dazi senza finì a mmunzedhari
pe comu s'ammunzedha ligna rutti,
e pe dicchiù «li schiavi cunquistati»
ndi chiamanu, li facci d’ammazzati.
Già li famigghi ricchi impezzentiru,
li pòvari su' sicchi pe la fami,
l'argentu e l'oru tutti lu periru,
e scumpariu di nui finna la rami.
L'impieghi fra di loru si spartiru,
ficiaru schiananzia di lu bestiami:
gadhini ed ova e pasta l'incarìru,
lu ranu, vinu, pisci e la fogghiami.
Non pensan’autru ch'a mangiati sulu:
mu fannu bonu chippu e grossu culu.
La santa castità la currumpiru,
su' all'ordini del gìornu li pansati;
li religioni tutti l'abboliru,
cummenti e monasteri profanati.
Li chiesi nostri quali li chiudiru,
quali su' stadhi, e quali su' triati,
l'enti morali tutti supprimiru,
li beni sagri tutti ncammerati;
la carità fraterna cundannata,
la povertà, si cerca, carcerata.
Li sacerdoti chiamanu imposturi,
li statui trunchi di arburi pittati,
a la Madonna fannu tant'ingiuri,
li santi pe’ briganti su' trattati.
Non Vonnu festi, nè predicaturi,
vigìli e santi jorna disprezzati,
spijuni dinnu ch'è lu confessuri,
li setti sagramenti, poi, nchiastrati.
Ah, sì, d'italia e sua consorteria
parlava lu profeta Geremia.
Signuri, vui nci siti, e nui cridimu,
e sutta stu fragellu vi adoramu,
peccati cu li sarmi, sì, nd'avimu,
ma sempri a vui fidili e stritti stamu.
Diciassett'anni sugnu chi ciangimu,
lu pani cu li gràlimi ammogghiamu
e tra sigghiuzzu e chiantu l'agghiuttimu:
cercamu a vui succursu e peju jamu.
Suffritimi, Signuri, nu mumentu,
mu sfocu di stu cori lu turmentu.
Sapiti ca vi simu crijaturi,
perciò vi parlu franco, in cunfidenza:
simu arrustuti, e a menzu a li doluri
perdimmu lu curduni e la pacenza.
Non promettiti vui, ntra li Scritturi
ca siti occbiu amurusu e providenza
pe cui vi servi, e di li peccaturi
ca fati mu si perdi la simenza?...
Vi chiamu a la palora, non mancati,
ca siti via diritta e veritati.
Lu fùrmini, lu tronu, ntra su pugnu,
su' l'armi vostri di l'eternitati;
lu caddu di giugnettu, agustu e giugnu,
la nivi di dicembri dominati;
tempesti, e lu levanti cu lu ncugnu
non siti vui chi spissu li mandati?...
Cannuna e hajonetti chi mai sugnu,
rimpettu a sa tremenda majestati?
Ebbeni, mu struggiti chi nci voli
si figghì di puttana, si marioli?
Giustizia voli pemmu li puniti,
l'onuri vostru mu li scuncassati,
e si riguardu a vui li cumpatiti,
l'ingiuri a la Madonna vindicati,
la vostra santa Chiesa risurgiti,
lu sagru cultu vostru rianimati.
Nui tutti ntra nu zàccanu cogghiti
e vui, durci pasturi, ndi guidati.
E allura riverenti vi cantamu
lu 'tantumergu' e lu 'tedèu lodamu',
e rispundendu « ammèn» li cristiani
lu segristanu sona li campani. |
